ރާއްޖޭގެ ޓޫރިޒަމްގެ ޕީކް ސީޒަން ވެސް ދިމާވާ މި ދުވަސްވަރާ، ވައި ނުސާފުވުމުގެ މައްސަލަ ދިމާވާތީ، ތިމާވެށީގެ މައްސަލަތަކުގައި ވަކާލާތުކުރައްވާ ކުރީގެ ރައީސް މުޙައްމަދު ނަޝީދު ކަންބޮޑުވުން ފާޅުކުރައްވައިފިއެވެ.
އާންމު ގޮތެއްގައި ޖެނުއަރީން ފެށިގެން، ނުވަތަ އިރުވައި މޫސުން ފެށުމާއެކު ރާއްޖެއަށް ވައި ނުސާފުވުމުގެ މައްސަލަ މެދުވެރިވެއެވެ.
މިދިޔަ ހަފުތާ ތެރޭ މާލެ ސަރަހައްދުގައި ސިއްހަތަށް ނުރައްކާ މިންވަރަށް ވަނީ ވައި ނުސާފުވެފައެވެ.
މި ކަމާ ގުޅިގެން ކަންބޮޑުވުން ފާޅުކުރައްވައި އެކްސްގައި ކުރެއްވި ޕޯސްޓެއްގައި ކްލައިމެޓް ވަލްނެރެބެލިޓީ ފޯރަމް (ސީވީއެފް)ގެ ސެކްރެޓަރީ ޖެނެރަލްކަން ވެސް ކުރައްވާ ނަޝީދު ވިދާޅުވީ ރާއްޖޭގެ ވައިގެ ކޮލިޓީ ކޮންމެ އަހަރަކު ވެސް މި ދުވަސްވަރު ދަށްވާއިރު މިއީ ޓޫރިޒަމްގެ ވެސް ޕީކް ދުވަސްވަރު ކަމަށެވެ.
އަދި މި ކަން އަބަދު މެދުވެރިވާނަމަ ފަތުރުވެރިކަމަށް ނޭދެވޭ އަސަރުތަކެއް ކުރާނެކަން ޔަގީންވާ ކަމަށް ނަޝީދު ވިދާޅުވިއެވެ.
ނަމަވެސް ވައި ނުސާފުވާ ހުރިހާ ތަޣައްޔަރުކަމެއް ރާއްޖޭގެ ސަރަހައްދަށް އަންނަނީ އެހެން ގައުމުތަކުން ކަމަށާއި މި މައްސަލަ ހައްލުކުރުމަށް ގައުމުތަކުން މަސައްކަތް ކުރަންޖެހޭކަމަށް ވެސް ނަޝީދު ވިދާޅުވިއެވެ.
މީގެ ކުރިން ވެސް އެ މަނިކުފާނު ވަނީ މިފަހުން ރާއްޖެއަށް ވިއްސާރަކުރާ މިންވަރު ކުރިއަށްވުރެ އިތުރުވެ ލިބޭ ގެއްލުންތައް އިތުރުވަމުން އަންނަކަން ފާހަގަކުރައްވައި ކަންބޮޑުވުން ފާޅުކުރައްވައިފައެވެ.
މޫސުމީ މައްސަލަތައް ރާއްޖެއަށް ކުރިމަތިވާ މިންވަރު އިތުރުވަމުން އަންނަކަން ފާހަގަވާން ފަށައިފައިވާއިރު ސަރުކާރުން ވެސް އެކަމާ ދެކޮޅަށް ފިޔަވަޅުތައް އެޅުމަށް އެކި ބައިނަލްއަގްވާމީ ޖަމިއްޔާތަކާއި، ގައުމުތަކުގެ އެހީ ބޭނުންވާކަމަށް އަންނަނީ ބުނަމުންނެވެ.