ގެއަކުން ވައްކަންކުރަން އުޅުނު މީހަކު ހައްޔަރުކުރަން ދިޔައިރު އެ މީހާ ހުރީ ފުލުހުންނާ ފިލަން ގޭގެ އަލަމާރި ތެރެއަށް ވަދެ، ބޮލުގައި ކަޅު ކޮތަޅެއް އަޅައިގެން ކަމަށް ފުލުހުން އިއްޔެ ކްރިމިނަލް ކޯޓުގައި ބުނެފިއެވެ.
މި މައްސަލައިގައި ހައްޔަރުކުރީ 33 އަހަރުގެ ދިވެހި ފިރިހެނެކެވެ.
އެ މީހާގެ ބަންދަށް އިއްޔެ ކްރިމިނަލް ކޯޓުން ވަނީ 15 ދުވަސް ޖަހައިފައެވެ. އެއީ، މި ބާވަތުގެ 45 މައްސަލައެއްގައި މީގެ ކުރިން ވެސް އެ މީހާ ހައްޔަރުކޮށްފައިވުމުންނެވެ. އޭގެ ތެރެއިން 27 ފަހަރު ބަންދުކޮށް މުއްދަތު ވެސް ޖަހާފައިވެއެވެ.
އޭނާ ހައްޔަރުކޮށްފައިވަނީ ދަންވަރުގެ ވަގުތެއްގައި މާލޭގެ ގެއަކަށް ވަދެ، ވައްކަންކުރަން އުޅުމުގެ ތުހުމަތުގައެވެ.
އެ ގޮތުން، އެ މީހާ ގެއަށް ވަންނަ މަންޒަރާއި ގޭތެރޭގައި ހަރަކާތްތެރިވާ މަންޒަރު ފެންނަ ސީސީޓީވީ ފުޓޭޖު ހުށަހަޅާފައިވާ ކަމަށް ކޯޓު އަމުރުގައި ބުނެފައިވެއެވެ. އެ މީހާ އެ ގެއިން އަގު ބޮޑު ދެ ފޯނު ވަގަށް ނެގި ކަމަށް ވަނީ ތުހުމަތުކޮށްފައެވެ.
ފުލުހުންތަކެއް: ވައްކަމުގެ މައްސަލައެއްގައި މީހަކު ހައްޔަރުކުރަން ދިޔައިރު ހުރީ އަލަމާރި ތެރޭ ފިލައި -- ސަން ފޮޓޯ/ ފަޔާޒު މޫސާ
ކޯޓު އަމުރެއްގެ ދަށުން އެ މީހާ ހައްޔަރުކުރަން ފުލުހުން ދިއުމުން އެ މީހާ އެ ވަގުތު ހުރި ގޭގެ އަލަމާރި ތެރެއަށް ވަދެ، ބޮލުގައި ކަޅު ކޮތަޅެއް އަޅައިގެން ފުލުހުންނާ ފިލަން މަސައްކަތްކުރި ކަމަށް ވެސް ކޯޓު އަމުރުގައިވެއެވެ.
އެ މީހާ ވަނީ ތަހުގީގަށް ހާޒިރުކުރުމުން ހަނުހުރީ މައްސަލަ ބެއްލެވި ފުލުސް އޮފިސަރު "އަވަސް ކޮށްލާށޭ.. ހަނު ބަޔާނެއް ދޭށޭ،" ބުނުމުން ކަމަށް ބުނެފައެވެ. އެހެންވެ، ޝަރީއަތުގެ މަޖިލީހުގައި ވެސް އޭނާ ދިފާއަށް އެއްވެސް އެއްޗެއް ބުނެފައެއް ނުވެއެވެ.
ވައްކަމުގެ މައްސަލަތައް ދޭތެރެދޭތެރެއިން ފެންމަތިވި ނަމަވެސް، ފުލުހުން މަގުމަތީގައި ހަރަކާތްތެރިވާ މިންވަރު އިތުރުކުރުމުން ވައްކަމާއި އެކްސިޑެންޓުތައް މަދުވި ކަމަށް ފުލުހުން މީގެ ކުރިން ބުނެފައިވެއެވެ.
ވައްކަމުގެ މައްސަލަތަކަކީ ފުލުހުންނަށް އެންމެ ގިނައިން ރިޕޯޓުކުރާ އެއް ބާވަތުގެ މައްސަލައެވެ. ޚާއްސަކޮށް، އެ ފަދަ މައްސަލަތަކުގައި ތަކުރާރުކޮށް އަތުލައިގަންނަ މީހުންގެ އަދަދު ގިނައެވެ.