އެއް އަހަރު ނިމުނު އިރު، މި ސަރުކާރުން އެއް ބިލިއަން ރުފިޔާއިން މި ގައުމު ދަރުވާލައިފި ކަމަށް އިދިކޮޅު އެމްޑީޕީގެ ޕީޖީ ލީޑަރު އިބްރާހީމް ނާޒިލް މިރޭ ތުހުމަތު ކުރައްވައިފިއެވެ.
އެސްއެސްޓީވީގެ ބާރު ހަތަރެއް ޕްރޮގްރާމުގައި ވާހަކަދައްކަވަމުން ނާޒިލް ވިދާޅުވީ، މިދިޔަ ސަރުކާރުގެ ވާހަކަ މި ސަރުކާރުން ދައްކާއިރު، އެ ސަރުކާރުގެ ފުރަތަމަ އަހަރުގެ ބަޖެޓަކީ 31 ބިލިއަން ރުފިޔާ ކަމަށެވެ.
ނަމަވެސް، މި ސަރުކާރުގެ ފުރަތަމަ އަހަރުގެ ބަޖެޓަކީ 55 ބިލިއަން ރުފިޔާ ކަމަށާއި މިދިޔަ ސަރުކާރުގެ ބަޖެޓަށް ވުރެ 24 ބިލިއަން ރުފިޔާގެ އިތުރު ބަޖެޓެއް ކަމަށް ނާޒިލް ވަނީ ވިދާޅުވެފައެވެ.
އެ ފައިސާއިން ރައްޔިތުންނަށް އެއްވެސް ކަމެއް ނުކޮށްދެވޭ ކަމަށް ނާޒިލް ވަނީ ސިފަކުރައްވާފައެވެ.
ސަރުކާރުން އެއް އަހަރު ކުރި މަސައްކަތަށް ދެއްވަނީ "ޔޫ ސެޓެއް" ނުވަތަ އެއަށް ވުރެ ދަށަށް އޮތް މާކުހެއް ކަމަށް ނާޒިލް ވަނީ ވިދާޅުވެފައެވެ.
"އޭގެ މިސާލެއްގެ ގޮތުން، އަޅުގަނޑު ދެންނެވީ އެއް އަހަރު ނިމިދިޔައިރު، 150 ބިލިއަނުން ގައުމު ދަރުވާލީ." ނާޒިލް ވިދާޅުވިއެވެ.
އިތުރަށް ވާހަކަދައްކަވަމުން ނާޒިލް ވިދާޅުވީ، މި ސަރުކާރުގެ ޕާފޯމަންސް މިދިޔަ އެއް އަހަރު ދިޔައީ ވަރަށް ދަށްކޮށް ކަމަށާއި ނަމަވެސް، ރައީސް ޑރ. މުޙައްމަދު މުއިއްޒުގެ ދަތުރުފުޅުތައް ވަރަށް ގިނަ ކަން ފާހަގަކުރެވޭ ކަމަށެވެ.
ނަމަވެސް، ރައްޔިތުންގެ ޓެކްސް ފައިސާއިން ސަރުކާރުން ބޭނުންވާ ކަންތައްތަކެއް ކޮށްފައިވާ ކަމަށް ނާޒިލް ތުހުމަތުކުރެއްވިއެވެ.
އޭގެއިތުރުން، ރަށްތަކުގެ ހާލަތު ހުރީ ވަރަށް ދަށް ހާލަތުގައި ކަމަށާއި ތަރައްގީގެ މަޝްރޫއުތައް ނުހިނގާ ކަން ނާޒިލް ވަނީ ފާހަގަކުރައްވާފައެވެ.
"އެހެންނަމަވެސް، އަޅުގަނޑު ދަންނަވާނީ 55 ބިލިއަން ރުފިޔާ ހުސްވެއްޖެ. 49.9 ބިލިއަން ރުފިޔާ އެންމެ ފުރަތަމަ ބަޖެޓު ކުރީ. އެ ހުސްވެގެން އަނެއްކާ 5.1 ބިލިއަން ރުފިޔާ އެކީ ޖުމުލަ 55 ބިލިއަން ރުފިޔާ ހުސްކޮށްލެވިއްޖެ، ކުރެވުނު ކަމެއް ނެތް," އޭނާ ވިދާޅުވިއެވެ.
ނުސީދާކޮށް، ސަރުކާރަށް އަމާޒު ކުރައްވައި ނާޒިލް ވިދާޅުވީ، ކޮންމެސް އެއް ބަޔަކަށް ސަރުކާރުގެ އެއް އަހަރުގެ ޕާފޯމަންސް ރަނގަޅުވި ނަމަވެސް، ރައްޔިތުންނަށް ޕާފޯމަންސް ރަނގަޅެއް ނޫން ކަމަށެވެ. މިގޮތުން، 'އެބަޔަކަށް' ޕާފޯމަންސް ރަނގަޅު ވެގެން ނޫނީ ހުރިހާ ފައިސާ އެއް ހުސްނުވާނެ ކަމަށް ނާޒިލް ވަނީ ވިދާޅުވެފައެވެ.
ނާޒިލްގެ އިތުރުން އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު (ވައްޑެ) ވެސް މިރޭ ވަނީ މިދިޔަ އެއް އަހަރު ސަރުކާރުން ކޮށްފައިވާ މަސައްކަތްތަކުގައި އޭނާ ދެކޭ ގޮތް ހިއްސާކުރައްވާފައެވެ. މިގޮތުން، ވަހީދު ވަނީ ގާނޫނަށް އިސްލާހެއް ގެނައުމުގެ މާނައަކީ ކުރިން އެ ގާނޫނެއް އޮތް ގޮތަށްވުރެ ފަސޭހަ ކުރުންކަން ފާހަގަކުރައްވައިފައެވެ.
އެހެން ނަމަވެސް މިހާރު އޮތް "ދިވެހީންގެ ރާއްޖެ" މަޖިލީހުން ރައްޔިތަކަށް ތުރާވާ ގޮތަށް ނޫނީ ގާނޫނެއް ފާސްކޮށްފައި ނެތް ކަމަށް އޭނާ ތަކުރާރުކޮށް ވިދާޅުވިއެވެ.