މެދު ރާއްޖެތެރޭގެ އަތޮޅެއްގައި 18 އަހަރުން ދަށުގެ ފިރިހެން ކުއްޖަކު ކުޑަކުއްޖަކަށް ޖިންސީ ގޯނާ ކުރި ކަމަށް ތުހުމަތު ކުރެވޭ މައްސަލައެއް ފެންމަތިވެއްޖެއެވެ.
ފުލުހުން "ސަން" އަށް ބުނީ، ކ، އއ، އދ، އަދި ވ އަތޮޅުގައި ހިމެނޭ ރަށެއްގައި 18 އަހަރުން ދަށުގެ ފިރިހެން ކުއްޖަކު ހަތަރު އަހަރުގެ އަންހެން ކުއްޖަކަށް ޖިންސީ ގޯނާ ކުރި ކަމަށް ތުހުމަތު ކުރެވޭ މައްސަލައެއް މިދިޔަ ބުރާސްފަތި ދުވަހު ރިޕޯޓުކޮށްފައިވާ ކަމަށެވެ.
ފުލުހުން ބުނީ ކުޑަކުދީންނާ ގުޅޭ މިފަދަ މައްސަލަތަކަކީ ސީރިއަސް މައްސަލަތަކަަކަށް ވާތީ ކުއްޖާގެ އައިޑެންޓިޓީ ރައްކާތެރިކުރުމުގެ ގޮތުން ކުއްޖާގެ އަތޮޅާއި ރަށް ހާމަނުކުރާ ކަމަށެވެ.
މި މައްސަލަ މިހާރު ފުލުހުން އަންނަނީ ތަހުގީގު ކުރަމުންނެވެ.
މިފަހުން މި ވަނީ ޖިންސީ ގޯނާގެ މައްސަލަތައް ފެންމަތިވާ މިންވަރު އިތުރުވެފައެވެ. މިގޮތުން، މ، ފ، ދ، ތ ނުވަތަ ލ. އަތޮޅުގެ ތެރެއިން އަތޮޅެއްގައި ހިމެނޭ ރަށެއްގައި އުމުރުން 10 އަހަރުގެ އަންހެން ކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއް މިމަހުގެ 25ގައި ފުލުހުންނަށް ރިޕޯޓުކޮށްފައިވެއެވެ.
އެ މައްސަލާގައި 51 އަހަރުގެ މީހަަކު ހައްޔަރުކޮށްފައިވާއިރު، އޭނާގެ ބަންދަށް ކޯޓުން ވަނީ 30 ދުވަސް ޖަހާފައެވެ.