ދަރުމަވަންތަ ހޮސްޕިޓަލާ ދިމާ ބޭރު ތޮށި މޫދުން އަނިޔާވެފައި އޮތް މީހަކު ފެނިއްޖެއެވެ.
މިކަމާ ގުޅިގެން މީޑިއާތަކަށް މައުލޫމާތު ދެއްވަމުން ފުލުހުން ބުނީ، އަނިޔާވެފައި އޮއްވާ ފެނުނީ ދިވެހި ފިރިހެނަކަށް ކަމަށެވެ. އަދި އޭނާ މިހާރު އައިޖީއެމްއެޗަށް ގެންގޮސްފައި ވާކަމަށް ފުލުހުން ބުންޏެވެ.
އައިޖީއެމްއެޗާ ހަވާލާދީ ފުލުހުން ބުނީ، އަނިޔާވެފައި ވަނީ އޭނާގެ ބޮލަށް ކަމަށާއި ބެލެވެނީ ބޮލުގައި އުޅަނދަކުން ޖެހިފައިވާކަމަށެވެ.
ހާދިސާ ހިނގި ސަރަހައްދުގައި ފުލުހުން ދަނީ ހަރަކާތްތެރި ވަމުންނެވެ. އަދި މި މައްސަލަ ފުލުހުން ދަނީ ތަހުގީގުކުރަމުންނެވެ.
މި ހާދިސާގެ ވީޑިއޯތަކެއް "ސަން"އަށް ލިބިފައިވާއިރު، ވީޑިއޯއިން ފެންނަނީ އެމީހާ އަށިގަނޑަށް ލައިގެން ގެންދަން މަސައްކަތްކުރާ މަންޒަރެވެ. އެ ސަރަހައްދަށް އާންމުންގެ ގިނަ ބަޔަކު އެއްވެފައި ވާއިރު، އެމީހާ މޫދުން ނަގައިގެން ގެންދިއުމުގައި ގިނަ އަދަދެއްގެ މީހުން އެހީވާ މަންޒަރު ފެނެއެވެ.
މީގެ އިތުރުން އެމީހާ އަށިގަނޑުގައި ބާއްވާފައި އޮތްއިރު، ހަރަކާތް ކުރާތަން ވެސް ވީޑިއޯއިން ފެނެއެވެ.
ދާދި ފަހުން އުސްފަސްގަނޑާ ދިމާ މޫދަށް ގެނބުނު މީހަކު ފުލުހުން ވަނީ ނަގާފައެވެ. ހޮސްޕިޓަލަށް ގެންދިޔަ އިރުވެސް އޭނާ މަރުވެފައި ވާކަމަށް ފުލުހުން އޭރު މައުލޫމާތު ދިނެވެ.