އިސްރާއީލު ޕާސްޕޯޓު މަނާކުރަން ތާއީދުކުރާ ކަމަށާއި ނަމަވެސް، އެގައުމު އެންމެންގެ ޕާސްޕޯޓު މަނާކުރުމުގެ ބަދަލުގައި މަނާކުރަންވީ އެގައުމުގެ ވެރިންގެ ޕާސްޕޯޓު ކަމަށް މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ)އިން ވެސް މިއަދު ބުނެފިއެވެ.
އިސްރާއީލް ޕާސްޕޯޓު މަނާކުރާނަމަ، ތާއީދުކުރަނީ ހަމައެކަނި އެ ގައުމުގެ ވެރީންގެ ޕާސްޕޯޓު މަނާކުރުމަށް ކަމަށް ނޭޝަނަލް ހޮޓެލްސް އެންޑް ގެސްޓް ހައުސް އެސޯސިއޭޝަނުން ބުނީ އިއްޔެއެވެ. އެ އެސޯސިއޭޝަނުން އެފަދައިން ބުނީ، އިސްރާއީލް ޕާސްޕޯޓު މަނާކުރުމާ ގުޅޭގޮތުން 241 ކޮމިޓީއަށް ހާޒިރުކުރުމުންނެވެ.
މިއަދު ވަނީ އެކަމާ ގުޅިގެން މަޓާޓޯ ވެސް 241 ކޮމިޓީއަށް ހާޒިރުކޮށްފައެވެ. މި ކޮމިޓީގައި ވާހަކަދައްކަވަމުން މަޓާޓޯގެ ރައީސް އަބްދުﷲ ގިޔާސް ވިދާޅުވީ، އިޒްރޭލު ޕާސްޕޯޓު މަނާކުރަން ފުރިހަމައަށް ތާއީދު ކުރާކަމަށެވެ.
"އެކަމަކު އަޅުގަނޑުމެންނަށް ފެންނަނީ ގެސްޓްހައުސް އެސޯސިއޭޝަނުން އިއްޔެ ދެއްކި ވާހަކައަށް ބަލާފައި ވެސް މެމްބަރުންގެ ވާހަކައަށް ބަލާފަ ވެސް ޓާގެޓެޑް އެޕްރޯޗަކަށް ދިއުމޭ އެންމެ ރަނގަޅީ،" އޭނާ ވިދާޅުވިއެވެ.
އޭނާ ވިދާޅުވީ އިސްރާއީލުން ވެސް ރާއްޖެ ބޮއިކޮޓު ކޮސްފައި ވާކަމަށެވެ. އެހެންކަމުން ކުރިއަށް އޮތް 10 އަހަރުތެރޭ ވެސް އެގައުމުގެ ފަތުރުވެރިން ރާއްޖެ އަންނަތަން ނުފެންނަ ކަމަށް އޭނާ ވިދާޅުވިއެވެ.
އެއާޕޯޓުގައި ފަތުރުވެރިންތަކެއް: މަޓާޓޯއިން ވެސް އެދުނީ ހަމައެކަނި އިސްރާއީލު ވެރިންގެ ޕާސްޕޯޓު މަނާކުރަން -- ސަން ފޮޓޯ/ އަމަން ލަތީފް
އިސްރާއީލު ޕާސްޕޯޓު ގެންގުޅުމުގައި ގޮންޖެހުމަކީ އެހެން ގައުމުތަކުގެ މީހުން ވެސް އިސްރާއީލު ޕާސްޕޯޓު ބޭނުންކުރުން ކަމަށް އޭނާ ބުންޏެވެ.
"އަޅުގަނޑުމެންނަށް އެނގިފައި ވާގޮތުން ވަރަށް ގިނަ ރަޝިޔާ މިހުން އެބަ ގެންގުޅޭ އިސްރާއީލު ޕާސްޕޯޓު. ގެސްޓު ހައުސް އެސޯސިއޭޝަންގެ ބޭފުޅުން ވެސް ވިދާޅުވީ ފަލަސްތީނުގައި އުޅޭ ބޭފުޅުން ވެސް ހަމަ އެބަހުއްޓޭ [އިސަރާއީލް ޕާސްޕޯޓު ގެންގުޅޭ މީހުން]. އެމީހުންނަކަށް ޔޫރަޕުގެ ގައުމުތަކަކަށް ނުދެވެއޭ ފަލަސްތީނު ޕާސްޕޯޓުގައެއް،" ގިޔާސް ވިދާޅުވިއެވެ.
މީގެއިތުރުން، އިސްރާއީލުން ފަލަސްތީނުގައި ހިންގާ ގަތުލުއާންމުގެ ފަހަތުގައިވާ ގައުމުތަކަށް ވެސް ބަލަންޖެހޭ ކަމަށާއި ޑޮލަރަށް ބަރޯސާވަނީ ވެސް އެގައުމުތަކަށް ކަމަށް އޭނާ ވިދާޅުވިއެވެ.
މިކަމުގައި މަޓާޓޯއިން ބަރޯސާވާންޖެހޭނީ ވެސް ގެސްޓުހައުސް އެސޯސިއޭޝަން ފަދަ ފަތުރުވެރިންނަށް ޚިދުމަތްދޭ އެސޯސިއޭޝަންތަކުން ދައްކާ ވާހަކައަށް ކަމަށް ވެސް އޭނާ ވިދާޅުވިއެވެ.
އިސްރާއީލު ޕާސްޕޯޓު މަނާކުރުމާ ގުޅިގެން އިއްޔެ ގެސްޓްހައުސް އެސޯސިއޭޝަނުން ވަނީ ކަންތައްތަކެއް ފާހަގަކޮށްފައެވެ. އޭގެތެރޭގައި ހިމެނެނީ:
- ފަލަސްތީނުގައި ދިރިއުޅޭ މުސްލިމުން ވެސް އިސްރާއީލުގެ ޕާސްޕޯޓު ގެންގުޅޭތީ މުޅި އިސްރާއީލުގެ ހުރިހާ ރައްޔިތުންގެ ޕާސްޕޯޓު މަނާކުރަން ތާއީދު ނުކުރާ ކަމަށް.
- ނަމަވެސް އިސްރާއީލުގެ ވެރިންގެ ޕާސްޕޯޓު މަނާކުރަން އެ އެސޯސިއޭޝަނުން ތާއީދުކުރާކަމަށް.
- އިސްރާއީލުގެ ޕާސްޕޯޓު މަނާކުރަން ވާނީ ސިފައިން ވެސް ނުހިމެނޭ ގޮތަށްކަަމަށާއި އެއީ މުޅި އިސްރާއީލުގެ ކޮންމެ ރައްޔިތަކީ އަސްކަރީ ޚިދުމަތުގައި އުޅެންޖެހޭ މީހަކަށް ވާތީކަމަށް.
އިޒްރޭލު ފަތުރުވެރިންނަށް ރާއްޖެ ނާދެވޭ ގޮތަށް އެ ގައުމުގެ ޕާސްޕޯޓު މަނާކުރަން ސަރުކާރުން ނިންމައި، އެ ކަން ކުރަން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ (241) ކޮމިޓީއަށް ފޮނުވީ މިދިޔަ ޖޫން މަހު 10 ގައެވެ. ނަމަވެސް އޭގެ ފަހުން އެ މައްސަލައަށް ކުރިއަށް ގެންގޮސްފައިނުވެއެވެ.
އެ މަސައްކަތް ލަސްވާތީ އިދިކޮޅާއި އާންމު ރައްޔިތުންގެ ފަރާތުން ސަރުކާރަށް ވަނީ ފާޑު ކިޔުންތައް އަމާޒުވެފައެވެ.