މޯލްޑިވްސް އިސްލާމިކް ބޭންކުގެ "އެޕްލައިނައު" ޕޯޓަލަށް ބައިނަލްއަގްވާމީ އެވޯޑެއް ލިބިއްޖެއެވެ.
އިންޑިއާގެ މުމްބައީގައި މިދިޔަ ހުކުރު ދުވަހު ބޭއްވި ގްލޯބަލް ފިންޓެކް އިނޮވޭޝަން އެވޯޑްސްގައި އެމްއައިބީގެ އެޕްލައި ނައު ޕޯޓަލަށް ލިބުނީ މޮސްޓް އިނޮވޭޓިވް ޑިޖިޓަލް އޮންބޯޑިން ރޯލްއައުޓްގެ އެވޯޑެވެ.
އައިބީއެސްގެ އިންޓަލިޖެންސުން ހޮވާ މި އެވޯޑު އެޕްލައި ނައު ޕޯޓަލަށް ލިބިފައި ވަނީ މެދު އިރުމަތީގެ ގިނަ ބޭންކުތަކަކާ ވާދަކޮށްގެންކަން އެމްއައިބީއިން ވަނީ ފާހަގަކޮށްފައެވެ. އެމްއައިބީގެ އެޕްލައި ނައު ޕޯޓަލަކީ ވަގުތުން އެކައުންޓް ހުޅުވުމުގެ ޚިދުމަތް ލިބޭ ރާއްޖޭގައި ލިބޭ ހަމައެކަނި ޕޯޓަލެވެ. އެކައުންޓް ހުޅުވުމުގެ އިތުރުން މި ޕޯޓަލް މެދުވެރިކޮށް އެ ބޭންކުގެ ހުރިހާ ޚިދުމަތަކަށް އެދެވޭނެ ކަން އެމްއައިބީން ވަނީ ފާހަގަކޮށްފައެވެ.
އެމްއައިބީގެ އެޕްލައި ނައު ޕޯޓަލަކީ އީފާސް މެދުވެރިކޮށް ކަސްޓަމަރުން ވެރިފައި ކުރުމުގެ ގާބިލުކަން ވެސް ލިބިގެންވާ ޕޯޓަލެކެވެ. އަމިއްލަ ފަރުދުންގެ އިތުރުން މި ޕޯޓަލް މެދުވެރިކޮށް ވިޔަފާރިތަކަށް ވެސް ބޭންކަށް ނުގޮސް އެކައުންޓް ހުޅުވޭނެ ކަމަށް އެމްއައިބީން ވަނީ ބުނެފައެވެ.
އަދި އިކޮނޮމިކް މިނިސްޓްރީގެ ޑޭޓާބޭސްގެ އެހީގައި ވިޔަފާރި ވެރިފައިކޮށް އެ ބޭންކުން ދަނީ އެންމެ ކުރިއަރާފައިވާ ގައުމުތަކުން ދޭފަދަ ޒަމާނީ ރައްކާތެރި ބޭންކިންގެ ޚިދުމަތްތައް ދެމުންނެވެ.
އެމްއައިބީއަށް މި އެވޯޑު ލިބުމާއި ގުޅިގެން އެ ބޭންކުގެ ޕީއާރް އޮފިސަރު ހަސަން ޖަމީލް ވިދާޅުވީ މި ޕޯޓަލްއަކީ ސައްތައިން ސައްތަ ދިވެހީންގެ މަސައްކަތެއް ކަމަށާއި މި އުފެއްދުމަށް މިފަދަ އެވޯޑެއް ލިބުމަކީ ދިވެހި ޑިވޮލަޕަރުންގެ ހުނަރު މުޅި ދުނިޔެއަށް ފެނިގެންދިޔަ ކަމެއް ކަމަށެވެ.
އެޕްލައި ނައު ޕޯޓަލްގެ އިތުރުން ވެސް އެ ބޭންކުން ދަނީ ޒަމާނީ ވަސީލަތްތަކުގެ އެހީގައި ރާއްޖެއަށް އާ ކަންތައްތައް ތާރަފުކުރަމުންނެވެ. އެގޮތުން ކޭޝް ކާޑުގެ ބަދަލުގައި ބޭނުންކުރެވިދާނެ އަނގޮޓިއެއް އެ ބޭންކުން މިހާރު ވަނީ ތާރަފުކޮށްފައެވެ.