ކުޑަކުއްޖަކަށް ޖިންސީ ގޯނާކުރި މައްސަލައެއްގައި 51 އަހަރުގެ ދިވެހި ފިރިހެނަކު ފުލުހުން ހައްޔަރުކޮށްފިއެވެ.
ފުލުހުން މިއަދު މީޑިއާތަކާ ހިއްސާކުރި މެސެޖެއްގައި ބުނީ މ، ފ، ދ، ތ ނުވަތަ ލ. އަތޮޅުގެ ތެރެއިން އަތޮޅެއްގައި ހިމެނޭ ރަށެއްގައި އުމުރުން 10 އަހަރުގެ އަންހެން ކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއް އިއްޔެ ފުލުހުންނަށް ރިޕޯޓުކޮށްފައި ވާކަމަށެވެ.
އަދި މި މައްސަލައާ ގުޅިގެން 51 އަހަރުގެ ދިވެހި ފިރިހެނަކު އިއްޔެ ފުލުހުން ހައްޔަރުކޮށްފައި ވާކަމަށް ވެސް ވަނީ ބުނެފައެވެ.
ފުލުހުން ބުނީ ކުޑަކުދީންނާ ގުޅޭ މިފަދަ މައްސަލަތަކަކީ ސީރިއަސް މައްސަލަތަކަަކަށް ވާތީ ކުއްޖާގެ އައިޑެންޓިޓީ ރައްކާތެރިކުރުމުގެ ގޮތުން ކުއްޖާގެ އަތޮޅާއި ރަށް ހާމަނުކުރާ ކަމަށެވެ.
އަދި މި މައްސަލަ މިހާރު ފުލުހުން ތަހުގީގުކުރަމުން ދާކަމަށް ވެސް ފުލުހުން ވަނީ ބުނެފައެވެ.
ޖިންސީ ގޯނާގ މިފަދަ މައްސަލަތަކީ އަދުގެ މުޖްތަމައުގައި އާންމުވެފައިވާ މައްސަލައެކެވެ. މީގެ ހަފުތާއެއްހާ ދުވަސް ކުރީން ވަނީ ހުޅުމާލޭގައި މޫދައްއެރި އުޅުނު ކުޑަކުއްޖަކަށް ޖިންސީ ގޯނާކުރި މައްސަލައެއް ވެސް ފެންމަތިވެފައެވެ.
އެ މައްސަލައިގައި ސޯޝަލްމީޑިއާގައި ދައުރުވި ޕޯސްޓުގައި ވަނީ އެ މީހާ ކުޑަކުދިންނާ ބެހި، އެ ކުދިން ކައިރީ އެކަހެރި ހިސާބުތަކަށް ދާން ބުނެ، އެ ކުދިންގެ ނުރުހުމުގައި ގައިގައި އަތްލާން އުޅުނު ކަމަށެވެ. އަދި އެ މީހާ ފުލުހުންނާ ހަވާލުކުރި ނަމަވެސް އެ މީހާ ދޫކޮށްފައިވާ ކަމަށް އެ ޕޯސްޓުގައި ވަނީ ބުނެފައެވެ.
ކުޑަކުދިންނަށް ޖިންސީ ގޯނާކުރުމުގެ މައްސަލަތައް އާންމުވެފައި ވާއިރު، އެފަދަ މައްސަލަތައް ސާބިތުވެފައިވާ މީހުން އެނގޭ ގޮތަށް އޮންލައިން ދަފުތަރެއް މިހާރު ވަނީ އެކުލަވާލާފައެވެ.