ބޮލީވުޑްގެ އެކްޓަރު އާމިރު ޚާން ނަފުސާނީ ދުޅަހެޔޮކަމަށް ފަރުވާ ލިބިގަތުމަށް ނަގާ ތެރަޕީ ސެޝަންތަކަށް ދަނީ އަންހެން ދަރިފުޅު އިރާ ޚާން ގޮވައިގެން ކަމަށް އެކްޓަރު ބުނެފިއެވެ.
ނެޓްފްލިކްސް އިންޑިއާއަށް ދިން އިންޓަވިއުއެއްގައި އާމިރު ވަނީ މެންޓަލް ހެލްތުގެ މުހިއްމުކަމާ ގުޅޭގޮތުން ޑޮކްޓަރު ވިވެކް މުރުތީއާ އެކު މަޝްވަރާތަކެއް ކޮށްފައެވެ. އެންމެ ފުރަތަމަ ތެރަޕީ ސެޝަންތަކަށް ދިއުމަށް ފަސްޖެހުނު ކަމަށާއި ނަމަވެސް އެކަމުގައި އެންމެ ބޮޑު ހިތްވަރެއްދީ އެހީތެރިވެދިނީ ދަރިފުޅު އިރާ ކަމަށް އާމިރު ވަނީ ބުނެފައެވެ.
އާމިރުއާއި އިރާ އެކީގައި ނަގާ ތެރަޕީ ސެޝަންތައް ބިނާވެފައި ވަނީ ދެބަފައިންގެ ގުޅުން ރަނގަޅު ކުރުމަށް އިތުރަށް ކުރެވިދާނެ ކަންތައްތަކުގެ މައްޗަށް ކަމަށް އެކްޓަރު ވަނީ ބުނެފައެވެ. އާމިރު ބުނެފައި ވަނީ އެތައް އަހަރުތަކެއް ވަންދެން ކުދިންނަށާއި އާއިލާއަށް ވަގުތު ނުދެވި އޮތުމުން އެ ކަންކަން ކުރިއަށްވުރެ އިސްލާހު ކުރުމަށް މި ސެޝަންތަކުން ވަރަށް ބޮޑު އެހީއެއް ލިބޭ ކަމަށެވެ.
ޑޮކްޓަރު ވިވެކް މުރުތީއާ އެކު ކުރިއަށްދިޔަ މި އިންޓަވިއުގައި އާމިރު ބުނެފައި ވަނީ ތެރަޕިސްޓެއްގެ އެހީ ހޯދަންޖެހޭ ކަމުގެ އިހުސާސް ކުރެވޭ ހިސާބުން އެފަދަ ސެޝަންތަކަށް ދިއުމަކީ މީހާގެ ނަފުސާނީ ދުޅަހެޔޮކަމަށް ހެޔޮ ބަދަލުތަކެއް ގެނުވައިދޭ ކަމެއް ކަމަށެވެ. އެހެންކަމުން އެފަދަ އެހީއަކަށް ބޭނުންވެއްޖެ ކަމުގެ އިހުސާސް ކުރެވޭ ހިސާބުން ކޮންމެ މީހަކު ވެސް ތެރަޕީ ސެޝަންތަކަށް ދިއުމަށް އާމިރު ވަނީ ގޮވާލާފައެވެ.
އާމިރު ޚާން އަންހެން ދަރިފުޅު އިރާ ޚާންއާ އެކު--ފޮޓޯ/ފިލްމުފެއަ
ގިނަބަޔަކު އާމިރު ސިފަކުރަނީ ވަރަށް ވިސްނުންތޫނު ކަންކަން ފަސޭހައިން ހައްލުކުރަން އެނގޭ މީހެއްގެ ގޮތުގައި ނަމަވެސް ނަފުސާނީ ދުޅަހެޔޮކަމާ ގުޅިގެން ދިރިއުޅުމަށް އައި ބަދަލުތަކުން އޭނާ ސަލާމަތްނުވި ކަމަށް ކާމިޔާބު އެކްޓަރު ވަނީ ބުނެފައެވެ.
ނަފުސާނީ ދުޅަހެޔޮކަމަށް ފަރުވާ ހޯދުމަކީ އެހެން މީހުން ތިމާ މޮޔަ މީހަކަށް ހަދާލާނެ ކަމުގެ ބިރުހީވެފައި އޮތުމުން ވަރަށް ގިނަ ބަޔަކު އެ ފަރުވާ ހޯދަން ފަސްޖެހޭކަން ފާހަގަ ކުރެވިފައިވާ ކަމަށް އާމިރު ވަނީ ބުނެފައެވެ.
އާމިރުގެ ފުރަތަމަ ކައިވެންޏަށް ލިބިފައިވާ އިރާ އަކީ މީގެކުރިން ވެސް މެންޓަލް ހެލްތަށް އާއްމުން ހޭލުންތެރި ކުރުވުމަށް ވަކާލާތު ކުރަމުން އައިސްފައިވާ ޒުވާނެކެވެ. އެގޮތުން އިރާ ވަނީ 2021 ވަނަ އަހަރު އެކަމަށް ހާއްސަކޮށް އަމިއްލަ ފައުންޑޭޝަނެއް ވެސް ހުޅުވާފައެވެ.