ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ން ބޭއްވި މޮނިއުމަންޓް ޑިޒައިން މުބާރާތުގެ އެއްވަނައަށް ދިޔަ ޑިޒައިނާ ގުޅިގެން އެ ކުންފުންޏަށް ލިބިފައިވާ ޝަކުވާތަކަށް ބެލުމަށް ފަހު، އެ ޑިޒައިންތައް ރިވިއު ކުރަން ފަށައިފިއެވެ.
މޮނިއުމަންޓް ޑިޒައިން މުބާރާތުގެ އެއްވަނަށް ހޮވިފައިވާ ޑިޒައިނަކީ، އާޓިފިޝަލް އިންޓެލިޖެންސް (އޭއައި) ބޭނުންކޮށްގެން އުފައްދާފައިވާ ޑިޒައިންތަކެއް ކަމަށް ބުނެ އާންމުން ވަނީ އެޗްޑީސީއަށް ޝަކުވާ ހުށަހަޅައިފައެވެ.
މި ކަމާ ގުޅިގެން އެޗްޑީސީން މިއަދު ނެރުނު ބަޔާނެއްގައިވަނީ ހުށަހެޅުނު ޝަކުވާތަކާ ގުޅިގެން، މުބާރާތުގެ އެއްވަނަ ޑިޒައިންތައް ރިވިއު ކުރުމުގެ މަސައްކަތް ކުރަމުން އަންނަ ކަމަށެވެ.
ހުޅުމާލޭގެ އެކި ސަރަހައްދުތަކުގައި މޮނިއުމަންޓްތަކެއް ބެހެއްޓުމަށް މޮނިއުމަންޓް ޑިޒައިން ކުރުމުގެ މުބާރާތެއް އެޗްޑީސީން ބޭއްވީ، ހުޅުމާލެއަކީ ހިތްފަސޭހަ ތަނަކަށް ހެދުމަށް ޓަކައި ކަމަށް ބުނެއެވެ. އެ ގޮތުން ހުޅުމާލޭގެ 17 ސަރަހައްދެއްގައި މޮނިއުމަންޓުތަކެއް ބަހައްޓަން ހަމަޖެހިފައިވާއިރު، އެ މުބާރާތަށް ޖުމްލަ ހަތް ހުށަހެޅުމެއް ލިބުނެވެ.
އެޗްޑީސީން ބޭއްވި މޮނިއުމަންޓް ޑިޒައިން ކުރުމުގެ މުބާރާތަކީ ހުޅުމާލޭގެ ތަރައްގީއަށް ކުރަމުން އަންނަ މަސައްކަތުގައި ދިވެހި ފަންނުވެރިންގެ ޚިޔާާއި ވިސްނުން ހިމެނުމުގެ މަގުސަދުގައި ކުރިޔަށް ގެންދިޔަ މުބާރާތެކެވެ. އެ ގޮތުން ފަންނުވެރިންނަށް ފުރުސަތު ނުލިބޭ ގޮތަކަށް އަމަލު ނުކުރާނެ ކަމުގެ ޔަގީންކަން އެޗްޑީސީން ވަނީ ދީފައެވެ. އަދި މި ފަދަ ކަންކަމުގައި ރައްޔިތުންގެ ޚިޔާލާއި މަޝްވަރާއަށް އަބަދު ވެސް މަރުހަބާ ކިޔާނެ ކަމަށް ބުނެފައިވެއެވެ.
އެޗްޑީސީން ބުނި ގޮތުގައި އެ ހުށަހެޅުންތަކުގެ މެދުގައި ވަނަ ހޮވީ، އެ ކަމަށްޓަކައި ކަނޑައެޅިފައިވާ ޕްރޮފެޝަނަލް ސްޓާފުންގެ ޖަޖުންގެ ޕެނަލަކުން ހުށަހެޅުންތައް އިވެލުއޭޓް ކުރުމަށް ފަހުގައެވެ.
މިދިޔަ ސެޕްޓެންބަރު 24ގައި އެޗްޑީސީން މޮނިއުމަންޓް ޑިޒައިން ކުރުމުގެ މުބާރާތެއް އިއުލާންކުރީ، އެއްވަނައަށް 100،000 ރުފިޔާގެ އިނާމަކާ އެކުގައެވެ. އެއީ ރާއްޖޭގެ ގައުމިއްޔަތާއި އިސްލާމީ ތަރިކައާއި، މުއްސަނދި ސަގާފަތްތަކާއި، ދިވެހީންގެ އެއްބައިވަންތަކަން ރަމްޒުކޮށްދޭ ބިނާތަކެއް އެޅުމަށެވެ.
އެ ކުންފުނިން ބުނީ އެ ތަނުގެ މަސައްކަތްތައް ރައްޔިތުންނަށް ފެންނަ ގޮތަށް ކުރިޔަށް ގެންދިއުމަކީ އަމާޒެއް ކަމަށެވެ. އަދި މި ފަދަ ކަންކަމުގައި ރައްޔިތުންދޭ އެއްބާރުލުމަށް ޝުކުރު އަދާކޮށްފައިވެއެވެ.