އެންޓި ކޮރަޕްޝަން ކޮމިޝަން (އޭސީސީ)ގެ ނައިބު ރައީސް އަބްދުއްސަލާމާއި އެ ކޮމިޝަންގެ މެންބަރު ތޯހާ މުހައްމަދު މަގާމުން ވަކިކުރަން ރައްޔިތުންގެ މަޖިލީހުގެ ތަޅުމުގައި ވޯޓަށް އެހުމުގެ ކުރިން އެ ދެ ބޭފުޅުން ވެސް މިއަދު މަގާމުން އިސްތިއުފާދެއްވައިފިއެވެ.
ދެ ބޭފުޅުން މަގާމުން ދުރުކުރަން އިއްޔެ މިނިވަން މުއައްސަސާތަކާ ބެހޭ ކޮމިޓީން ވަނީ ފާސްކޮށްފައެވެ. އެ ރިޕޯޓު ތަޅުމުން ފާސްކުރަން އެޖެންޑާކުރީ މިއަދަށެވެ.
އެކަމަކު، 'ސަން'އަށް މައުލޫމާތު ލިބިފައިވާ ގޮތުގައި ދެ ބޭފުޅުން ވަކިކުރަން މަޖިލީހުގެ ތަޅުމުގައި ވޯޓަށް އެހުމުގެ ކުރިން ދެ ބޭފުޅުން ވެސް ވަނީ ކޮމިޝަނުން އިސްތިއުފާދެއްވައިފައެވެ.
ފާހަގަކޮށްލެވޭ ގޮތުގައި ދެ ބޭފުޅުން ވަކިކުރަން މަޖިލީހުން ނިންމީ ބޮޑެތި ތުހުމަތުތަކެއް ކުރުމަށް ފަހެވެ.
އެ މެންބަރުން މަގާމުގެ މަސްއޫލިއްޔަތު އަދާނުކުރާ ކަމަށާއި، މަގާމުގައި ހުރެ ގަވާއިދާ ޚިލާފަށް އެތައް ކަމެއް ކޮށްފައިވާކަމަށް ވަނީ ތުހުމަތުކޮށްފައެވެ. އޭގެ ތެރޭގައި، ބައެއް މައްސަލަތަކުގައި އަމަލުކޮށްފައިވާ ގޮތާއި މުވައްޒަފުންނާ ދޭތެރޭ ގޯސްކޮށް އަމަލުކުރުމުގެ ތުހުމަތުތައް ވެސް ހިމެނެއެވެ.
އޭސީސީގެ ނައިބު ރައީސް ސަލާމްގެ މައްޗަށް ކޮށްފައިވާ ތުހުމަތުތައް:
- ކުރީގެ ބަންޑާރަނައިބެއްގެ މައްޗަށް ތުހުމަތުކުރެވުނު މައްސަލައެއްގައި ދައުވާ ކުރެވޭ ވަރަށް ހެކި ހުރި ނަމަވެސް އެ ފަރާތުގެ މައްޗަށް ދައުވާނުކުރެވޭނެ ކަމަށް ކަނޑައަޅާ އެ މައްސަލަ ފައިލްކުރުމުގައި އިސް ދައުރެއް އަދާކުރުން.
- ވަކި ސިޔާސީ ޕާޓީއަކަށް ގެއްލުންތަކެއް ވެދާނެތީ ބިންވެރިޔާ މައްސަލަ އިތުރަށް ތަހުގީގުކުރުމަށް ފުރުސަތު ނުދީ މައްސަލަ ހުއްޓުވައި، އެ މައްސަލައިގެ ހެކި ނައްތާލަން މަގުފަހިކޮށްދިނުން.
- ފޮރެންސިކް ސެކްޝަނުން ކުރާ މާ ބޮޑު މަސައްކަތެއް ވެސް ނެތް ނަމަވެސް، އެ ސެކްޝަން ހަދައި އެތަނުގެ ހެޑަކަށް ގާތް މުވައްޒަފެއްލައި އެތަން ކުރިއަރުވަން މަސައްކަތް ކޮށްފައިނުވުން.
- މައްސަލަތައް ނިންމަން ބޭނުންވާ ގޮތަކަށް ނިންމުމަށް މެންބަރުންނަށް ބާރު އަޅައި، މައްސަލަތައް ނިންމުމުގައި އަމިއްލަ މަސްލަހަތައް ބަލާފައިވުން.
- ނުފޫޒު ފޯރުވައިގެން މަސައްކަތްތައް ކުރިއަށް ގެންގޮސްފައިވުން.
އޭސީސީގެ މެންބަރު ތޯހާއާއި ނައިބު ރައީސް އަބްދުއްސަލާމް --- ދެ މެންބަރުންނަށް ބޮޑެތި ތުހުމަތުތަކެއް ކޮށްފައިވޭ --
އޭސީސީގެ މެންބަރު ތޯހާގެ މައްޗަށް ކޮށްފައިވާ ތުހުމަތުތައް:
- އޭސީސީން ވަކި ކުރި މުވައްޒަފެއްގެ މައްސަލަ ވަޒީފާއާ ބެހޭ ޓްރައިބިއުނަލުން ނިންމި ނިންމުން ހައި ކޯޓުގައި އިސްތިއުނާފު ކޮށްފައި ވަނިކޮށް، ނުފޫޒުން އެ އިސްތިއުނާފު ބާތިލުކޮށް، ކޮމިޝަންގެ ލީގަލް ޓީމުގެ ލަފަޔާ ޚިލާފަށް ދެ ލައްކައަށްވުރެ ގިނަ ރުފިޔާގެ ބަދަލުދިނުން.
- ކުރީގެ ބަންޑާރަނައިބެއްގެ މައްޗަށް ތުހުމަތުކުރެވުނު މައްސަލައެއްގައި ދައުވާ ކުރެވޭ ވަރަށް ހެކި ހުރިނަމަވެސް އެފަރާތުގެ މައްޗަށް ދައުވާނުކޮށް މައްސަލަ ފައިލްކުރުމުގައި އިސް ދައުރެއް އަދާކުރުން.
- އޭސީސީގެ މެންބަރުންނަށް އެހެން ވަޒީފާއެއް އަދާ ނުކުރެވޭއިރު، ލޯފާމެއްގެ އެޓާނީންގެ ތެރޭގައި ހިމެނުން.
މަޖިލީހުން ވަނީ އިލެކްޝަންސް ކޮމިޝަން (އީސީ)ގެ ތިން މެންބަރަކު ވަކިކުރަން ވެސް ފާސްކޮށްފައެވެ.
އީސީން ވަކިކުރަން ނިންމާފައިވަނީ އެ ކޮމިޝަންގެ ތިން މެންބަރުން ކަމަށްވާ ނައިބު ރައީސް އަލީ ނަޝާތާއި މުހައްމަދު އާސިފް އަދި ޑރ. މުހައްމަދު ޒާހިރެވެ. އެ ތިން މީހުންގެ މައްޗަށް ވެސް، ރީ-ރެޖިސްޓްރޭޝަންގައި އޮޅުވާލުމާއި ދަ ޑިމޮކްރެޓްސް ޕާޓީ އުފައްދަން ހުރަސް އެޅުން ފަދަ ތުހުމަތުތައް ކުރެއެވެ.
އީސީއާއި އޭސީސީގެ މެންބަރުންތަކެއް ވަކިކުރާއިރު، އެ ދެ ކޮމިޝަންގެ ރައީސުން ސީދާ ރައީސުލްޖުމްހޫރިއްޔާއަށް އައްޔަންކުރެއްވޭ ގޮތަށް ގާނޫނު އިސްލާހުކުރަން ވަނީ ހުށަހަޅާފައެވެ.