ރާއްޖޭން ފަސް ވަނަ ފަހަރަށް ވޯލްޑް ލީޑިން ޑެސްޓިނޭޝަން އެވޯޑު ހާސިލްކޮށްފިއެވެ.
ޕޯޗުގަލްގައި އިއްޔެ ބޭއްވި ރަސްމިއްޔާތެއްގައި މި އެވޯޑުގެ އިތުރުން ރާއްޖޭން ވަނީ ވޯލްޑްސް ލީޑިން ގްރީން ޑެސްޓިނޭޝަން އެވޯޑު ވެސް ހާސިލްލުކޮށްފައެވެ.
މި ދެ އެވޯޑާ ހަވާލުވެވަޑައިގަތީ ޓޫރިޒަމް މިނިސްޓަރު އިބްރާހީމް ފައިސަލެވެ.
އެވޯޑުތައް ރާއްޖެއަށް ލިބުމުން މިނިސްޓަރު ފައިސަލް ވިދާޅުވީ، މިފަދަ އެވޯޑުތައް ރާއްޖެއަށް ލިބެނީ ދާއިރާގެ ހުރިހާ ފަރާތްތަކުގެ ބުރަ މަސައްކަތުން ކަމަށާއި އެވޯޑުތަކާ އެއްކޮށް ރާއްޖެ އިތުރަށް ޕްރޮމޯޓުކުރުމަށް މަގުފަހިވާ ކަމަށެވެ. އަދި، ވޯލްޑް ލީޑިން ގްރީން ޑެސްޓިނޭޝަން އެވޯޑު ލިބުމަކީ ދާއިރާއަށް ލިބުނު އިތުރު ކުރިއެރުމެއް ކަމަށް މިނިސްޓަރު ވަނީ ވިދާޅުވެފައެވެ.
މީގެއިތުރުން، މިއަހަރު ރާއްޖެއަށް ވަނީ ވޯލްޑް ޓްރެވަލް އެވޯޑްސް އިންޑިއަން އޯޝަން ކެޓެގަރީން އެވޯޑްތަކެއް ވެސް ލިބިފައެވެ. އޭގެތެރޭގައި، އިންޑިއަން އޯޝަންސް ކެޓެގަރީގެ ލީޑިން ހަނީމޫން ޑެސްޓިނޭޝަން އެވޯޑާއި ލީޑިން ގްރީން ޑެސްޓިނޭޝަނާއި ލީޑިން ޑައިވް ޑެސްޓިނޭޝަން އެވޯޑު ހިމެނެއެވެ.