ނޭޝަނަލް އިންޓެގްރިޓީ ކޮމިޝަން (އެންއައިސީ)ގެ މެންބަރުކަމަށް ގ. ނޫރަންފިނި، އަލްއުސްތާޛާ މަރިޔަމް އިންޝާ ފައިސަލް ނަން، ރައީސް ޑރ. މުހައްމަދު މުއިއްޒު މިއަދު ހުށަހަޅުއްވައިފިއެވެ.
އިންޝާ، އެ މަގާމަށް އައްޔަނުކުރުމަށް ނަން ފޮނުއްވާފައިވަނީ، އެންއައިސީގެ މެންބަރު އަހުމަދު ޖިހާދުގެ ދައުރު ހަމަވުމާ ގުޅިގެންނެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި ރައީސްގެ މޭޒުން ހުށަހަޅާ ކަމެއްގެ ގޮތުގައި އޮތީ އެންއައިސީގެ މެންބަރުކަމަށް ރައީސް މުއިއްޒު ފޮނުއްވި ނަން، ދާއިމީ ކޮމިޓީއަށް ފޮނުވުމެވެ. އެގޮތުން، ރައީސް ހުށަހަޅުއްވާފައިވަނީ އިންޝާގެ ނަމެވެ.
އެހެންވެ، ރިޔާސަތުން ވަނީ މިނިވަން މުއައްސަސާތަކުގެ ކޮމިޓީއަށް އެ މައްސަލަ އިތުރަށް ދިރާސާކުރަން ފޮނުވާފައެވެ.
މިހާރު އެ ކޮމިޝަންގައި ތިއްބަވާ ބޭފުޅުންނަކީ:
- އެންއައިސީގެ ރައީސް ގާސިމް އަބްދުލްކަރީމް
- އެންއައިސީގެ ނައިބު ރައީސާ އަލްއުސްތާޛާ އާޝިޔަތު ޝިއުނާ
- އެންއައިސީގެ މެންބަރު އާމިނަތު ޝާދިޔާ
- އަލްއުސްތާޛު ޝުއައިބު އަބްދުއްރަހްމާން
މި ހަތަރު ބޭފުޅުން އައްޔަނުކުރައްވާފައިވަނީ 2020 ވަނަ އަހަރެވެ. އެހެންކަމުން، އެ ބޭފުޅުންގެ ދައުރު ހަމަވާނީ އަންނަ އަހަރެވެ.
އިންޝާ ވަނީ މީގެ ކުރިން އެ ކޮމިޝަންގެ ސީނިއާ އިންވެސްޓިގޭޓަރެއްގެ މަގާމު ވެސް އަދާކުރައްވާފައެވެ.
އެންއައިސީއަށް މެމްބަރުން އައްޔަންކުރެއްވުމާއި ވަކި ކުރެއްވުމުގެ ބާރު އޮންނާނީ ރައީސަށެވެ.
އެ ކޮމިޝަނުގެ މަސްއޫލިއްޔަތުތަކުގެ ތެރޭގައި ގާނޫނު ތަންފީޒުކުރާ އިދާރާތަކާއި އެ އިދާރާތަކުގެ މުވައްޒަފުން ކުރާ ގާނޫނާ ޚިލާފު އަމަލުތައް ބަލައި ތަހުގީގުކުރުން ހިމެނެއެވެ. އަދި، އެފަދަ އަމަލެއް ކަމަށް ތުހުމަތުކުރެވޭ އަމަލެއް އެއްވެސް ފަރާތަކުން ހިންގައިފި ކަމަށް ނުވަތަ ހިންގަން އުޅޭ ކަމަށް ތުހުމަތުކޮށް، އެފަދަ މައްސަލައެއް ހުށަހަޅައިފި ނަމަ އެ ކަމެއް ވެސް ބަލައި ތަހުގީގުކުރަން އެ ކޮމިޝަނަށް ލާޒިމުވާނެއެވެ.