އެސްއެސްޓީވީ އާއި މޯލްޑިވްސް މިޔުޒިކް އެންޑް އާޓްސް ސެންޓަރު (އެމްއެމްއޭސީ) ގުޅިގެން ގެނެސްދޭ މަދަހަ ރަން އަޑު މުބާރާތުގެ ހަވަނަ ސީޒަންގައި ބައިވެރިވުމުގެ ފުރުސަތު ހުޅުވާލައިފިއެވެ.
މަދަހަ ރަން އަޑު ސީރީސްއަކީ 2020 ވަނަ އަހަރުން ފެށިގެން އެމްއެމްއޭސީއިން ބާއްވަމުން އަންނަ ސިލްސިލާ މަދަހަ މުބާރާތެކެވެ.
މިދިޔަ އަހަރުގެ މުބާރާތުގައި ރާއްޖޭގެ ހުރިހާ އަތޮޅަކުން 165 ބައިވެރިން މަދަހަ ހުށަހަޅާފައިވެއެވެ. މިދިޔަ އަހަރުގެ މުބާރާތް ބާއްވާފައިވަނީ އެސްއެސްޓީވީ އާއި އެމްއެމްއޭސީ ގުޅިގެންނެވެ.
މިއަހަރުގެ މުބާރާތުގައި ބައިވެރިވުމުގެ މުއްދަތު ހަމަވާނީ އަންނަ މަހުގެ 15 ވަނަ ދުވަހަށެވެ. މިމުބާރާތަކީ މިހާތަނަށް އެންމެ ގިނަ އަމިއްލަ ޅެމާއި އެންމެ ގިނަ އަމިއްލަ ރާގު ގެނެސްދިނުމުގެ ރެކޯޑް ގާއިމްކޮށްފައިވާ މަދަހަ މުބާރާތެވެ.
މިމުބާރާތުގައި ވާދަ ކުރާ އުމުރުފުރާތަަކަކީ:
- ހަ އަހަރުން ދަށް
- ނުވަ އަހަރުން ދަށް
- 11 އަހަރުން ދަށް
- 13 އަހަރުން ދަށް
- 16 އަހަރުން ދަށް
- 18 އަހަރުން ދަށް
މީގެ އިތުރުން ޒުވާނުންގެ އުމުރުފުރާއިން 18 އަހަރާއި 35 އަހަރާ ދެމެދުގެ ބައިވެރިންނަށް ވެސް ފުރުސަތު އޮންނާނެއެވެ.
މަދަހަ ރަން އަޑު ސިލްސިލާގައި ރަށްފުށުގެ ރީތި މަންޒަރުތައް ފެންނަ ގޮތަށް، ވާޗުއަލްކޮށް މަދަހަ ހުށަހެޅުމުގެ ފުރުސަތު ވެސް ލިބޭނެއެވެ. މިގޮތުން ވޭތުވެ ދިޔަ ފަސް މުބާރާތުގައި އެއް ވަނަ ދެވަނަ ތިން ވަނަ އަތޮޅާއި އެއް ވަނަ ދެ ވަނަ ތިން ވަނަ ރަށް ވެސް ވަނީ ހޮވައިފައެވެ. ވޭތުވެދިޔަ މުބާރާތުގައި ވަނަތަކަށް ހޮވުނު ބައިވެރިންނަށް އަގު ބޮޑު އިނާމުތަކެއް ވަނީ ދީފައެވެ. މިފަހަރުގެ މުބާރާތުގައިވެސް އަތޮޅުތަކުން މަދަހަ ބައިވެރިކުރުމުގެ ފުރުސަތުވަނީ ހުޅުވާލާފައެވެ.
މިދިޔަ އަހަރުގެ މަދަހަ ރަން އަޑު ސީޒަން ފަހެއްގެ އިނާމު ދިނުމުގެ ޖަލްސާ ޝަރަފުވެރިކޮށް ދެއްވާފައިވަނީ ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވަޒީރު ޑރ. ޢަލީ ހައިދަރު އަހްމަދެވެ. މީގެ އިތުރުން ދިވެހިބަހާއި ތަރިކައާއި ސަގާފަތާ ބެހޭ ވަޒީރު އާދަމް ނަޞީރު އިބްރާހީމާއި މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމްގެ އިތުރުން ސްޓޭޓް މިނިސްޓަރުންނާއި ރާއްޖޭގެ މަޝްހޫރު ފަންނާނުންނާއި، ސްކޫލްތަކުގެ ޕްރިންސިޕަލުން އިނާމު ދެއްވާފައިވެއެވެ.
މިދިޔަ އަހަރު މަދަހަ ރަން އަޑުގެ ވެރިއަކަށް ހޮވިފައިވަނީ އަހްމަދިއްޔާ އިންޓަނޭޝަނަލް ސްކޫލްގެ ދަރިވަރު މުޝާޠު މުސްތާޤުއެވެ.
މަދަހަ ރަން އަޑު ސީޒަން ހަޔެއްގައި ބައިވެރިވުމަށް ބޭނުންވާ ފަރާތްތަކަށް 7316256 މި ނަމްބަރަށް ގުޅުމުން މައުލޫމާތު ސާފުކުރެވޭނެއެވެ.