ގަވާއިދުތަކާއި އުސޫލުތައް ހިމެނޭހެން ދިވެހި ސަރުކާރުގެ ގެޒެޓުގައި ޝާއިއުކުރުމަށް ފޮނުއްވާ ގާނޫނީ ލިޔުންތައް ފޮނުވާނެ އުސޫލަށް މިއަދުން ފެށިގެން ބަދަލު ގެނެސްފިއެވެ.
މި ބަދަލު ގެނެސްފައިވާކަން ހާމަކުރީ ރައީސް އޮފީހުން މިއަދު ނެރުނު ދެންނެވުމެއްގައެވެ.
އެ ގޮތުން، ދެން ދައުލަތުގެ އެންމެހައި ވުޒާރާތަކާއި މުއައްސަސާތަކާއި އިދާރާތަކުން، ދިވެހި ސަރުކާރުގެ ގެޒެޓުގައި ޝާއިއުކޮށްދިނުމަށް އެދި ޤާނޫނީ ލިޔުންތައް ފޮނުވަން ޖެހޭނީ [email protected] މި އީމެއިލަށެވެ.
ގެޒެޓުގައި ޝާއިޢުކުރުމަށް ފޮނުވާ ލިޔުމެއްގައި އިސްލާހު ކުރަންޖެހޭ ކަންކަން ހުރި ނަމަ، އެ ކަންކަން އިސްލާހު ކުރުމަށް ފަހު، ދިވެހި ސަރުކާރުގެ ގެޒެޓުގައި ޝާއިއުކޮށްދިނުމަށް އެދި، އެންމެ ފަހުގެ ދެލިކޮޕީ ފޮނުވަންޖެހެނީ ރައީސް އޮފީހަށް ފޮނުވާ ލިޔުންތަކުގައި ސޮއިކުރުމާ ގުޅޭގޮތުން ބަޔާންކޮށްފައިވާ ގޮތަށް، އެ ވުޒާރާގެ ވަޒީރު ނުވަތަ އެ ވަގުތަކު އެ ވުޒާރާ ހިންގެވުމާ ހަވާލުވެވަޑައިގެން ހުންނެވި ބޭފުޅަކު ސޮއިކުރައްވައިފައިވާ ލިޔުމަކާ އެކުގައި ކަމަށް އެ ދެންނެވުމުގައިވެއެވެ.
މީގެ އިތުރުން، ގެޒެޓުގައި ޝާއިޢުކުރުމަށް، ޤާނޫނީ ލިޔުންތައް ފޮނުއްވާއިރު، ބަންޑާރަނައިބުގެ ޤާނޫނީ ލަފާފުޅު ހޯއްދަވަންޖެހޭ ދައުލަތުގެ އިދާރާތަކުން އެ ލަފާފުޅު ހޯއްދަވައި، އެ ލަފާފުޅާ އެއްގޮތަށް ޤާނޫނީ ލިޔުންތައް ތައްޔާރުކޮށް، ބަންޑާރަނައިބުގެ ޤާނޫނީ ލަފާފުޅު ވެސް ފޮނުވަން ޖެހޭނެއެވެ.
އެ ލިޔުމަކާ ގުޅޭގޮތުން ރައީސް އޮފީހުގެ ފަރާތުން އެ ވުޒާރާއަކާ ނުވަތަ އެ މުއައްސަސާއަކާ ނުވަތަ އެ އިދާރާއަކާ މުޢާމަލާތުކުރާނެ ބޭފުޅެއްގެ ނަމާއި މަގާމާއި ގުޅޭނެ ފޯނު ނަންބަރު އެނގޭ ގޮތަށް ފޮނުވަމުން ގެންދިއުމަށް ވެސް އެ ދެންނެވުމުގައިވެއެވެ. އަދި، ގާނޫނީ ލިޔުންތައް ފޮނުއްވާއިރު ބަހުގެ ހަމަތަކަށާއި ގާނޫނީ ހަމަތަކަށް ރަނގަޅަށް ބައްލަވައި، ކުށް ފިލުއްވުމަށް ފަހު، ފޮނުވަންޖެހޭނީ ގެޒެޓުގައި ޝާއިއުކުރާ ގާނޫނީ ލިޔުންތައް ތައްޔާރުކުރާ ފޯމެޓުގައެވެ.
ގެޒެޓުގައި ޝާއިއުކޮށްދިނުމަށް އެދި ވުޒާރާތަކާއި މުއައްސަސާތަކުން ގާނޫނީ ލިޔުންތައް ފޮނުވުމުގެ އުސޫލަށް ބަދަލު ގެނަޔަސް، ސަރުކާރުގެ އޮފީސްތަކުން ގެޒެޓްކުރުމަށް ގަވާއިދު ފޮނުވާއިރު، ބަންޑާރަނައިބުގެ އޮފީހުގެ ލަފަޔާ އެކު ފޮނުވުމާ ގުޅޭގޮތުން ބަދަލެއް ގެނެސްފައިނުވާ ކަމަށް އެ ދެންނެވުމުގައިވެއެވެ.