އިންޑިއާއާއި ރާއްޖެއާ ދެމެދު ކުރެވޭ ފައިސާގެ މުއާމަލާތްތަކުގައި ދެ ގައުމުގެ ފައިސާ ބޭނުންކުރެވޭ ގޮތަށް ހެދުމުން ދެ ގައުމުގެ ދެމެދުގައި ކުރެވޭ އިންވެސްޓުމަންޓުތައް އިތުރުވާނެ ކަމަށް އިކޮނޮމިކް މިނިސްޓްރީން މިއަދު ބުނެފިއެވެ.
އިންޑިއާއިން ރާއްޖެއަށް ގެންނަ މުދަލުން ދިވެހި ރުފިޔާއިން ފައިސާ ދެއްކޭ ގޮތް ހަދަން ރިޒާވް ބޭންކް އޮފް އިންޑިއާ (އާރުބީއައި)އާ އެކު އެމްއޯޔޫއެއްގައި ސޮއިކޮށްފައި ވަނީ މިދިޔަ ބުރާސްފަތި ދުވަހެވެ.
އެމްއެމްއޭއިން ބުނި ގޮތުގައި، އެ އެމްއޯޔޫއިން، ކަރަންޓް އެކައުންޓް މުއާމަލާތްތަކާއި ހުއްދަކުރެވޭ ކެޕިޓަލް އެކައުންޓް މުއާމަލާތްތަކާއި އެހެނިހެން ވެސް އިގުތިސާދީ މާލީ މުއާމަލާތްތައް ދެ ގައުމުން އެއްބަސްވާ ގޮތެއްގެ މަތިން ދިވެހި ރުފިޔާއާއި އިންޑިއާ ރުޕީން ކުރުމަށް ބާރުއަޅާނެއެވެ. އަދި, އެގޮތަށް ހަމަޖެހުމުން، ދެ ގައުމުގެ ވިޔަފާރިތަކުން މުދަލާއި ޚިދުމަތް އެތެރެކުރުމާއި ބޭރުކުރުމުގައި އެ ބައެއްގެ އަމިއްލަ ފައިސާއިން ބިލްކޮށް އަދި އެ ބިލްތަކުގެ ސެޓްލްމަންޓް ހެދޭނެ ކަމަށް މަރުކަޒީ ބޭންކުން ފާހަގަކުރިއެވެ.
އެ އެއްބަސްވުމަށް މަރުހަބާ ކިޔައި އިކޮނޮމިކް މިނިސްޓްރީން ނެރުނު ބަޔާނެއްގައި ބުނީ، އެއްބަސްވުމުގެ ދަށުން ދެ ގައުމުގެ ދެމެދުގައި ކަރަންޓް އެކައުންޓު މުއާމަލާތްތަކާއި ދެ ގައުމުގެ ފައިސާއިން ސީދާ އިންވެސްޓުމަންޓުތައް ހިންގަން މަގުފަހިކޮށްދޭ ނިޒާމެއް ގާއިމުކޮށް، ދެ ގައުމުގެ މެދުގައި ވިޔަފާރީގެ ގުޅުންތައް ހަރުދަނާ ވާނެ ކަމަށެވެ.
ކެޕް އާރުބީއައިއާއެކު އެއްބަސްވުމުގައި ސޮއިކުރުން: މި އެއްބަސްވުމުގެ ސަބަބުން ދެ ގައުމުގެ މެދުގައި އިންވެސްޓުމަންޓުތައް އިތުރުވާނެ ކަމަށް އިކޮނޮމިކް މިނިސްޓްރީން ވަނީ ބުނެފައި --- ފޮޓޯ/ އާރުބީއައި
ރައީސް ޑރ. މުޙައްމަދު މުއިއްޒު މިދިޔަ މަހު އިންޑިއާއަށް ކުރެއްވި ރަސްމީ ދަތުރުފުޅަށް ފަހުގައި ވަރަށް ކުރު މުއްދަތެއްގެ ތެރޭގައި ދެ ގައުމުގެ މެދުގައި އެއްބަސްވުމުގައި ސޮއިކުރެވުމުން އެކަމުން ރަމްޒުކޮށްދެނީ ދެ ގައުމުގެ ދެމެދުގައި އޮތް ގާތް ގުޅުން ކަމަށް މިނިސްޓްރީން ވަނީ ބުނެފައެވެ.
[ކަރަންސީ ސެޓްލްމަންޓު ނިޒާމު] މި ނިޒާމުގެ ސަބަބުން ދެ ގައުމުގެ ފައިސާއިން މުއާމަލާތްތައް ކުރުމަށް ފަސޭހަވެ، ދިވެހި ވިޔަފާރިވެރިންނަށް އިންޑިއާއިން އިމްޕޯޓުކުރުމަށް ފަސޭހަވެ، ދެގައުމުގެ މެދުގައި ކުރެވޭ އިންވެސްޓުމަންޓުތައް އިތުރުވެގެންދާނެއިކޮނޮމިކް މިނިސްޓްރީ
އިތުރަށް މިނިސްޓްރީން ވަނީ ދެ ގައުމުގެ ދެމެދުގައި ކަރަންސީ ސެޓްލްމަންޓް ނިޒާމެއް ގާއިމުކުރެވުމުން މުސްތަގްބަލުގައި ރާއްޖެއަށް ޒިޔާރަތްކުރާ އިންޑިއާގެ ފަތުރުވެރިންނާއި އެ ގައުމުގައި އުޅޭ ދިވެހީންނަށް ވިޔަފާރި ކުރުމަށާއި ތަކެއްޗަށް ފައިސާ ދައްކަން ވަރަށް ބޮޑެތި ލުއިތަކެއް ލިބޭނެ ކަމަށް ބުނެފައެވެ.
މި އެއްބަސްވުމަކީ ރާއްޖޭގެ އިގްތިޞާދު ފުޅާވެ، ބައިނަލްއަގުވާމީ ބައިވެރިންނާ އެއްކޮށް ވިޔަފާރީގެ ގުޅުން ވަރުގަދަކުރުމަށް ރައީސް މުއިއްޒު ގެންގުޅުއްވާ ސިޔާސަތުގެ ތެރެއިން އެޅުނު މުހިންމު ފިޔަވަޅެއް ކަން މިނިސްޓްރީން ވަނީ ފާހަގަކޮށްފައެވެ.
ރާއްޖޭގެ ދަރަނި ބޮޑުވެ ޑޮލަރުގެ ތާށިކަން ކުރިމަތިވެފައިވާއިރު، މި ސަރުކާރުން އަންނަނީ ބޭރު ގައުމުތަކާއެކު ކުރާ ވިޔަފާރީގައި އަމިއްލަ ފައިސާ ބޭނުންކުރެވޭނެ ގޮތްތައް ހަމަޖެއްސުމަށް މަސައްކަތް ކުރަމުންނެވެ. އެގޮތުން އިންޑިއާގެ އިތުރުން ޗައިނާއާއެކު ވެސް މަޝްވަރާތައް ބާއްވަން ނިންމައިފައިވާކަން އިކޮނޮމިކް މިނިސްޓްރީން ވަނީ މިއަހަރުގެ މެދު ތެރޭގައި ހާމަކޮށްފައެވެ.
މީގެ އިތުރުން ފައިސާގެ މުއާމަލާތްތަކަށް ބޭނުންކުރާ އިންޑިއާގެ ޔުނިފައިޑް ޕޭމަންޓް އިންޓަފޭސް (ޔޫޕީއައި) ރާއްޖެއަށް ތައާރަފުކުރުމުގެ މަސައްކަތްތައް ފެށުމަށް ރައީސް ނިންމަވައި، އެކަން މިދިޔަ މަހުގެ 20ގައި އިއުލާން ކުރައްވައިފައިވެއެވެ.