މީގެ 18 އަހަރު ކުރިން ރިލީޒްކުރި ހެއްވާ މަޖާ ފިލްމު "ބާގަމް ބާގް"ގެ ދެވަނަ ބައެއް އުފައްދަން ނިންމާފައިވާ ކަމަށް ފިލްމު ކުންފުނި ޝެމަރޫ އެންޓަޓެއިންމަންޓްއިން ބުނެފިއެވެ.
ޕްރިޔާދަރްޝަން ޑައިރެކްޓްކުރި "ބާގަމް ބާގަމް" ފިލްމު ކުރިން ގެނެސްދިން ދެ ފިލްމު ކުންފުނިން ވަނީ ޝެމަރޫ އެންޓަޓެއިންމަންޓަށް ފިލްމުގެ ކޮޕީ ރައިޓްސް ވިއްކާލާފައެވެ. މި ފިލްމުގެ ސީކުއަލް "ބާގަމް ބާގް 2" ޕްރޮޑިއުސް ކުރާނީ ޝެމަރޫ އެންޓަޓެއިންމަންޓްގެ ފަރާތުން ސަރީތާ އަޝްވިން ވަރުދޭއެވެ.
ފިލްމީ ޚަބަރުތައް ގެނެސްދޭ ބޮލީވުޑްހަންގާމާގައި ބުނެފައިވާ ގޮތުން ސަރީތާ "ބާގަމް ބާގް 2"ގެ ސްކްރިޕްޓްގެ މަސައްކަތް ކުރަމުން އަންނަތާ ދުވަސްކޮޅެއް ވެއްޖެއެވެ. ސަރީތާ ބުނެފައިވާ ގޮތުގައި "ބާގަމް ބާގް" ފަދަ އައިކޮނިކް ފިލްމަކަށް ސީކުއަލްއެއް ވަރަށް މުހިއްމުވެފައި ފިލްމުގެ ސީކުއަލް ގެނެސްދިނުން ލަސްކުރީ އެންމެ ފުރިހަމަ ދަނޑިވަޅު ބެލުމަށް ފަހު ފިލްމު އިއުލާނުކުރުމަށެވެ.
ސަރީތާއަކީ މަގުބޫލު ފިލްމުތައް ކަމަށްވާ "މުބާރަކަން"،"ކަބީރު ސިންގް"، "އޯއެމްޖީ-2" އަދި "ކޭލް ކޭލް މޭ"ގެ ޕްރޮޑިއުސަރު އަޝްވިނު ވަރުދޭގެ އަންހެނުންނެވެ. މި ފިލްމުތައް އުފެއްދުމުގައި ސަރީތާ ވަނީ ފިރިމީހާ އަޝްވިނާ އެކު އެސިސްޓެންޓެއްގެ ގޮތުގައި މަސައްކަތްކޮށްފައެވެ.
ފިލްމު "ބާގަމް ބާގް"ގެ މަންޒަރެއްގައި އަކްޝޭ ކުމާރު ބަތަލާ ލާރާ ދައްތާއާ އެކު--ފޮޓޯ/ފޭސްބުކް
ގޯވިންދާއާއި އަކްޝޭ ކުމާރުގެ ހެއްވާ މަޖާ ހާދިސާތައް ހިމެނުނު 2006 ވަނަ އަހަރުގެ ފިލްމަކީ ބެލުންތެރިން ހެއްވާލުމުގެ އިތުރަށް ވަރަށް ބޮޑަށް ފިލްމުގެ ވާހަކައަށް ބެލުންތެރިން ޝައުގުވެރިކުރުވި ފިލްމެކެވެ. އެންމެ 32 ކްރޯޑު ރުޕީސްއިން އުފެއްދި އެ ފިލްމަށް އޭގެ ދެގުނަ ފައިދާ އޭރު ލިބުނެވެ.
ބޮޑު ކާސްޓަކާ އެކު އޭރު ގެނެސްދިން ފިލްމުގެ ސީކުއަލްއިން އަކްޝޭއާއި ގޯވިންދާ ފެންނާނެކަން ކަށަވަރުވެފައިވާއިރު މި ސީކުއަލްގެ އިތުރު ކާސްޓުން އަދި އިއުލާނެއް ނުކުރެއެވެ. މި ފިލްމުގެ މަސައްކަތް އަންނަ އަހަރު ތެރޭ ފަށާނެކަން ފިލްމު ގެނެސްދޭ ޝެމަރޫން އެންޓަޓެއިންމަންޓްއިން ވަނީ ބުނެފައެވެ.