ވެރިކަން ކުރާ ޕާޓީ ޕީއެންސީގެ ރިޔާސީ ޕްރައިމަރީއެއް 2028އަށް ނުބާއްވާނެ ކަމަށާއި، ރައީސް ޑރ. މުޙައްމަދު މުއިއްޒަށް ރިޔާސީ ޓިކެޓް ލިބިވަޑައިގަންނަވާނެ ކަމަށް އެ ޕާޓީގެ ޗެއާޕާސަން އަބްދުއްރަހީމް އަބްދުﷲ މިރޭ ވިދާޅުވެއްޖެއެވެ.
ޕީއެންސީގެ އެތެރޭގެ އިންތިޚާބާ ގުޅޭ ގޮތުން މައުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ، އެ ޕާޓީގެ ޓިކެޓުގައި ވާދަކުރައްވައިގެން ރައީސް ކަމަށް ވަޑައިގަންނަވާ ބޭފުޅަކު ދެވަނަ ދައުރެއް ބޭނުންފުޅުވާ ނަމަ ރިޔާސީ ޓިކެޓް އެ ބޭފުޅަކަށް ލިބިވަޑައިގަންނަވާނެ ކަމަށެވެ.
"އެހެންވީމަ ޕްރައިމަރީއެއް ބާއްވަން ޖެހޭ ކަމެއް ނޫން ތިއީކީ،" އެ މަނިކުފާނު ވިދާޅުވިއެވެ.
މިދިޔަ އަހަރުގެ ސެޕްޓެމްބަރު މަހު އޭރުގެ ރައީސް އިބްރާހީމް މުޙައްމަދު ޞާލިޙާ ވާދަކުރައްވައި ރިޔާސީ އިންތިޚާބު ކާމިޔާބު ކުރެއްވި ރައީސް މުއިއްޒު، ދެވަނަ ދައުރަކަށް ވާދަކުރައްވާނެ ކަމަށް ރަސްމީ ގޮތެއްގައި އިއުލާން ކުރައްވައިފައިނުވެއެވެ. ނަމަވެސް އެ މަނިކުފާނު ވަނީ ދެވަނަ ދައުރަކަށް ވާދަކުރައްވާނެ ކަމުގެ އިޝާރާތްތައް ކުރައްވައިފައެވެ.
މީގެ އިތުރުން އަބްދުއްރަހީމް ހިމެނޭ ގޮތަށް މި ސަރުކާރުގެ އިސް ބޭފުޅުން ގެންދަވަނީ ރައީސަށް ދެވަނަ ދައުރެއް ދިނުމަށް މަސައްކަތް ކުރަމުންދާ ކަމަށް ތަކުރާރުކޮށް ވިދާޅުވެފައެވެ.
އެގޮތުން މިހާރު އަމަލުކުރަމުން އަންނަ ގާނޫނު އަސާސީގެ ދަށުން ދެވަނަ ދައުރެއް ކާމިޔާބު ކުރައްވާ ފުރަތަމަ ރައީސްގެ ގޮތުގައި 2028 ވަނަ އަހަރު ރައީސް އިންތިޚާބު ކުރުމުގައި ސާބިތުވެ ހުންނަވާނެ ކަމަށް މިރޭ ވެސް އެ އަބްދުއްރަހީމް ވިދާޅުވިއެވެ.
އެ މަނިކުފާނު ވަނީ އަމިއްލައަށް ވެރިކަމަށް ވާދަކުރެއްވުމުގެ އެއްވެސް ވިސްނުމެއް ނުގެންގުޅުއްވާ ކަމަށް ވެސް ވިދާޅުވެފައެވެ.
ދެހާސް އަށާވީސް ވަނަ އަހަރުގެ ރިޔާސީ އިންތިޚާބުގައި ވާދަކުރާނެކަން މިހާތަނަށް އިއުލާންކުރައްވައިފައިވަނީ ކުރީގެ ރައީސް އަބްދުﷲ ޔާމީން އަބްދުލްގައްޔޫމާއި އެމްޑީޕީގެ ޗެއާޕާސަން ފައްޔާޒު އިސްމާއީލެވެ.