ރައްޔިތުން އެދޭގޮތަށް ރައްޔިތުންނާ ގާތުން ވެރިކަން ކުރާނަމަ، ވެރިކަމުގައި ދެވަނަ ދައުރެއް ލިބޭނެކަމަށް އިންތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
އެ މަނިކުފާނު މިފަދައިން ވިދާޅުވީ، ސަންގު ޓީވީން ގެނެސްދިން ޚާއްސަ ޕްރޮގްރާމެއްގައި ވާހަކަފުޅު ދައްކަވަމުންނެވެ. އެގޮތުން ޑރ. މުއިއްޒު ވިދާޅުވީ، ހަމަޖެހުން ގާއިމްކުރަން ޖެހޭނީ ހަމައެކަނި ދޭދޭ ގައުމުތަކުގައި އެކަނި ނޫން ކަމަށެވެ. އަދި، ގައުމުގެ އެތެރޭގައި ވެސް ހަމަޖެހުން ގާއިމް ކުރަން މަސައްކަތް ކުރަން ޖެހޭނެ ކަމަށާއި ގައުމުގެ މަސްލަހަތު ވެސް އިސްކުރަން ޖެހޭނެ ކަމަށް އެ މަނިކުފާނު ވިދާޅުވިއެވެ.
"އަޅުގަނޑަށް ގަބޫލު ކުރެވެނީ ފުރަތަމަ ދުވަހުން ފެށިގެން ރައްޔިތުން އެދޭ ގޮތަށް ރައްޔިތުންނާ ގާތުން މަސައްކަތް ކުރާކަމަށް ވަންޏާ ހަމަ ދެވަނަ ދައުރެއް ވެސް ރައްޔިތުން ދެއްވާނޭ،" ޑރ. މުއިއްޒު ވިދާޅުވިއެވެ.
އެހެންކަމުން އެ މަނިކުފާނު ވެރިކަން ކުރައްވާނީ އެފަދައިން ކަމަށް ޑރ. މުއިއްޒު ވިދާޅުވިއެވެ. އެގޮތުން އެންމެ ފުރަތަމަ ދުވަހުން ފެށިގެން ވެސް މަޝްރޫއުތައް ބައްޓަން ކުރައްވާނީ ރައްޔިތުން އެދޭފަދައިން ކަމަށް އެ މަނިކުފާނު ވިދާޅުވިއެވެ.
ވެރިކަމުގެ ވަކި ހިސާބަކުން ރައްޔިތުން ބާކީ ކޮށްލައި ސަރުކާރުގެ މިސްރާބު ބަދަލުވެއްޖެ ނަމަ ދެވަނަ ދައުރެއް ދޭން ރައްޔިތުން އެއްބަސް ނުވާނެކަމަށް އެ މަނިކުފާނު ވިދާޅުވިއެވެ. މުއިއްޒު ވިދާޅުވީ މިދިޔަ ސަރުކާރުން ކަންތައް ކޮށްފައި ވަނީ އެފަދައިން ކަމަށެވެ.
"މިފަހަރު އަޅުގަނޑުމެން އިންތިޚާބު ތެރޭގައި ރަށްރަށަށް ދިޔައީމަ ފެނުނީ، ރައްޔިތުން ތިބިތާ ތިއްބަ ސަރުކާރު އެހެން ގޮތަކަށް ދާތަން،" އެ މަނިކުފާނު ވިދާޅުވިއެވެ.
އެގޮތުން ރަށްތަކުގެ މަޝްރޫއުތައް ހުރީ ހުއްޓިފައި ކަމަށާއި، ކުރިއަށް ގެންދާ މަޝްރޫއުތަށް ވެސް ކުރިއަށް ގެންދަނީ ރައްޔިތުން ބޭނުންވާ ގޮތަށް ނޫންކަމަށް އެ މަނިކުފާނު ވިދާޅުވިއެވެ.
"އެކަހަލަ ގޮތަކަށް ސަރުކާރު ހިނގަންޏާ ދެވަނަ ދައުރެއް ނުލިބޭނެ،" ޑރ. މުއިއްޒު ވިދާޅުވިއެވެ.
އެހެންކަމުން އެ މަނިކުފާނު ވެރިކަން ކުރައްވާނީ ރައްޔިތުންނާ ގާތުން، ގައުމަށް އެންމެ ފައިދާހުރި ގޮތަކަށް ކަމަށް އެ މަނިކުފާނު ވިދާޅުވިއެވެ. އަދި، އެފަދައިން ވެރިކަން ނިންމާލެވިއްޖެ ނަމަ ދެވަނަ ދައިރެއް ދިނުމަށް ރައްޔިތުން ދެކޮޅު ނުހަދާނެ ކަމަށް އެ މަނިކުފާނު ވިދާޅުވިއެވެ.
މުއިއްޒު އެފަދައިން ވިދާޅުވެފައިވާއިރު، ޑިރެކްޓަރު ޖެނެރަލް އޮފް ޓްރާންސިޝަން އަބްދުއްރަހީމް އަބްދުﷲ ވެސް ވަނީ މި އަންނަނީ 10 އަހަރުގެ ވެރިކަމެއް ކުރަން ކަމަށް ވިދާޅުވެ، ދެވަނަ ދައުރެއްގެ ވާހަކަ މިއަދު ދައްކަވައިފައެވެ.
އިންތިޚާބީ ރައީސް ޑރ. މުއިއްޒު ރިޔާސީ އިންތިޚާބު ކާމިޔާބު ކުރެއްވީ 54 އިންސައްތަ ވޯޓު ހޯއްދަވައިގެންނެވެ. އެ މަނިކުފާނު ހުވާ ކުރައްވާނީ ނޮބެމްބަރު 17 ވާ ހުކުރު ދުވަހުއެވެ.