އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ އިޓަލީއަށް ޒިޔާރަތްކުރައްވައިފިނަމަ، ހައްޔަރު ކުރަންޖެހޭނެ ކަމަށް އިއްޔެ ނެރުނު އިންޓަނޭޝަނަލް ކްރިމިނަލް ކޯޓު (އައިސީސީ)ގެ އަމުރާ ގުޅިގެން އިޓަލީގެ ދިފާއީ ވަޒީރު ގުއިޑޯ ކްރޮސެޓޯ ވިދާޅުވެއްޖެއެވެ.
އިޓަލީގެ އާރްއޭއައި ޓީވީއަށް ދެއްވި އިންޓަވިއުއެއްގައި އޭނާ ވިދާޅުވީ, އައިސީސީގެ ނިންމުމަކީ ގޯސް ނިންމުމެއް ކަމަށް ގަބޫލުކުރައްވާ ކަމަށާއި ނަމަވެސް ބައިނަލްއަގުވާމީ ގާނޫނުތަކުގެ ދަށުން ނަތަންޔާހޫއާއި އޭނާގެ ކުރީގެ ދިފާއީ ވަޒީރު ޔޮއާވް ގަލަންޓް އިޓަލީއަށް ޒިޔާރަތްކުރައްވައިފިނަމަ އެ މީހުން ހައްޔަރުކުރަން ޖެހޭނެ ކަމަށެވެ.
އައިސީސީން ވަނީ ނަތަންޔާހޫއާއި ގަލަންޓްގެ އިތުރުން ހަމާސްގެ އަސްކަރީ ވެރިޔާ މުހައްމަދު ޟައީފް ހައްޔަރުކުރުމުގެ އަމުރު އިއްޔެ ނެރެފައެވެ.
ނަތަންޔާހޫ ވަނީ އެ އަމުރު ކުށްވެރިކުރައްވާފައެވެ. އަދި، އައިސީސީގެ އެ އަމުރު އިސްރާއީލުން ބަލައިނުގަންނަކަމަށް ވެސް ނަތަންޔާހޫ ވަނީ ވިދާޅުވެފައެވެ.
އެމެރިކާ ހިމެނޭ ގޮތަށް އިސްރާއީލުގެ އެންމެ ގާތް އެކުވެރިން ވެސް ވަނީ އިސްރާއީލުގެ ސިޔާސީ ބޭފުޅުންނާ ދެކޮޅަށް ނެރުނު އަމުރު ކުށްވެރިކޮށްފައެވެ. ނަމަވެސް، އެމްނެސްޓީ އިންޓަނޭޝަނަލް ހިމެނޭ ގޮތަށް ހައްގުތަކާ ބެހޭ ޖަމާއަތްތަކުން ވަނީ އެ އަމުރަށް މަރުހަބާ ކިޔާފައެވެ.
ނަތަންޔާހޫއާ ގަލަންޓްގެ މައްޗަށް ކޮށްފައިވަނީ މިދިޔަ އަހަރުގެ އޮކްޓޫބަރު ހަތްވަނަ ދުވަހުން ފެށިގެން މި އަހަރުގެ މޭ މަހުގެ 20ގެ ނިޔަލަށް ހަނގުރާމައިގެ ޖަރީމާތައް ހިންގައިފައިވާކަމުގެ ތުހުމަތެވެ.
އެ ދެ މީހުންގެ އިތުރުން، އިސްރާއީލާއި ފަލަސްތީނުގައި އިންސާނިއްޔަތާ ޚިލާފު ޖަރީމާތަކާއި ހަނގުރާމައިގެ ޖަރީމާތައް ހިންގާފައިވާ ކަމަށް ތުހުމަތުކުރެވޭ ކަމަށް ބުނެ މުޙައްމަދު ޟައީފްގެ ނަމުން މަޝްހޫރު ހަމާސްގެ އަސްކަރީ ކޮމާންޑަރު މުހައްމަދު އަލް މަސްރީ ހައްޔަރުކުރުމުގެ އަމުރެއް ވެސް ކޯޓުން ވަނީ ނެރެފައެވެ. އެގޮތުން، އޭނާގެ މައްޗަށް ތުހުމަތުކޮށްފައިވަނީ މީހުން މެރުމާއި އަނިޔާކުރުމާއި ރޭޕްކުރުމާއި އެހެނިހެން ޖިންސީ އަނިޔާތައް ފަދަ ކުށްތައް ކުރިކަމުގެ ތުހުމަތެވެ.
ނަތަންޔާހޫގެ އިރުޝާދުގެ ދަށުން އިސްރާއީލުން ޣައްޒާއަށް ދެމުންގެންދާ ލާއިންސާނީ ހަމަލާތަކުގައި މިހާތަނަށް ވަނީ 44،056 މީހުން ޝަހީދުކޮށްލާފައެވެ. ހަމަލާތަކުގައި ޒަޚަމުކޮށްލާފައިވާ މީހުންގެ އަދަދު ވަނީ 104،286 އަށް އުފުލިފައެވެ.