ދުންފަތުގެ އިސްތިއުމާލު ކުރެވޭނެ ވަކި ތަންތަން ކަނޑައަޅައިފައިވީ ނަމަވެސް އެކަމާ ގުޅުންހުރި ގާނޫނުތަކާއި ގަވައިދު ތަންފީޒު ކުރުމުގައި ދޫދެވިފައި އޮތްކަން ގަބޫލުކުރައްވާ ކަމަށާއި އެކަމަށް ފަރުދީ އެއްބާރުލުން މުހިންމު ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.
ސަރުކާރައް އަހަރެއް ފުރުމާއި ގުޅިގެން "ސަން"އަށް ދެއްވި ޚާއްސަ ބަސްދީގަތުމެއްގައި ނާޒިމް ވިދާޅުވީ އާންމު ތަންތަނުގައި ދުންފަތުގެ އިސްތިއުމާލު ކުރުން ހުއްޓުވުމަށް ޓަކައި ރައްޔިތުންގެ ދިރިއުޅުމުގެ ވައްޓަފާޅިއަށް ބަދަލު ގެންނަން ޖެހޭ ކަމަށާއި މިކަމަށް މުޅި މުޖްތަމައުގެ އެހީތެރިކަމާއި އެއްބާރުލުން ބޭނުންވާ ކަމަށެވެ.
ހަމައެކަނި ތަންފީޒީ އިދާރާތަކުން ކުރެވޭ ކަމެއް ނޫން މިއީ. މިސާލަކަށް ބަލަމާ ހިނގާ ރެސްޓޯރެންޓްތަކުގަ ދުންފަތުގެ އިސްތިއުމާލުކުރުން މަނާ ސަރަހައްދުތައް ކަނޑައެޅިފައި ހުންނައިރު އެ ރެސްޓޯރެންޓް ހިންގާ ވެރިންގެ ވެސް ޒިންމާއެއް މިއީ ވަކި ނިޔަތެއްގައި މަނާ ކޮށްފަހުރި ތަނެއްކަން އެހެންވީމަ އެތަންތަނުގައި އެކަން އެލޯ ކުރެވިގެން ނުވާނޭ ކަން. ސިއްހަތާބެހޭ ވަޒީރު އަބްދުﷲ ނާޒިމް އިބްރާހިމް
ނާޒިމް ވިދާޅުވީ ސަރުކާރުގެ އިލްތިމާސަކީ ތަންފީޒީ އިދާރާތަކުން މި ކަންކަން ކުރުމަށް ބާރު އަޅާއިރު އާންމު ރައްޔިތުން ވެސް ފަރުދީ ޒިންމާ އަދާކުރުން ކަމަށެވެ. މިފަދަ ރިވެތި އާދަތަކާއި މުހިންމު ކަންކަމަކީ ގައުމުގެ އެންމެން ގުޅިގެން ނޫނީ ހާސިލްކުރެވޭނޭ ކަންކަން ނޫންކަން އޭނާ ވަނީ ފާހަގަކުރައްވާފައެވެ.
ނާޒިމް ވިދާޅުވީ މިކަން އަދި އެންމެ ރަނގަޅަށް ތަނފީޒުވަމުން ނުދާކަމާއި ތަންފީޒީ އިދާރާތަކުން މިކަން އިތުރަށް ހަރުދަނާ ކުރަން ޖެހޭކަމަށް ވެސް އެއްބަސްވެވަޑައިގަންނަވާ ކަމަށެވެ. އަދި މިކަމަށްޓަކާ ކުރަންޖެހޭ ކަންކަން ކުރައްވާނެ ކަމަށް ނާޒިމް ވަނީ ވިދާޅުވެފައެވެ.
ހެލްތު މިނިސްޓްރީން މިއަދު ވަނީ ދުންފަތް ކޮންޓްރޯލް ކުރުމާ ބެހޭ ގަވާއިދު އާންމުކުރުމުން ދުންފަތުގެ ބާވަތްތަކުން ވިޔަފާރިކުރެވޭނީ ސަރުކާރުގެ ކަމާބެހޭ އިދާރާއިން ދޫކުރާ ވިޔަފާރިކުރުމުގެ ހުއްދައިގެ އިތުރުން މިނިސްޓްރީން ދޫކުރާ ސައްހަ ލައިސެންސް އޮވެގެން ކަމަށް ބުނެފައެވެ.
ރާއްޖޭގައި އާންމު ތަންތަނުގައި ސިނގިރޭޓު ބުއިމާއި ވޭޕް ކުރުމުގެ މައްސަލަ ބޮޑުވެފައިވާއިރު މި ސަރުކާރުން އަންނަނީ ދުންފަތުގެ އިސްތިއުމާލު ކުރުމާ ދެކޮޅަށް ފިޔަވަޅުތައް އަޅަމުންނެވެ.
މި ފަހުން އެކްސްޕޯޓް އިމްޕޯޓްގެ ގާނޫނަށް ބަދަލުގެނެސް ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް ތިން ރުފިޔާއިން އަށް ރުފިޔާއަށް ވަނީ މަތިކޮށްފައެވެ. އެއާއެކު ސިނގިރޭޓް ފޮއްޓެއްގެ އަގު 110 ރުފިޔާއިން 240 ރުފިޔާއަށް ވަނީ އަގު ބޮޑުވެފައެވެ.
މީގެ އިތުރުން ސަރުކާރުން ވަނީ ވޭޕް އެތެރެކުރުން މިމަހުގެ 15ގައި މަނާކޮށް، އަންނަ މަހުގެ 15އިން ފެށިގެން ވޭޕް ބޭނުން ކުރުން ވެސް މަނާވާ ގޮތަށް ވެސް ފިޔަވަޅުތައް އަޅައިފައެވެ.