އިއްޔެ ގާނޫނުއަސާސީއަށް ގެނައި އިސްލާހުތަކަކީ ރާއްޖޭގެ ތަރައްގީއާއި މިނިވަންކަމަށް މުހިންމު ނިންމެވުންތަކެއް ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
އިއްޔެ ހުށަހަޅައި އިއްޔެ ފާސްކުރި އިސްލާހުތައް:
- މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން މަޖިލިސް ގޮނޑި ގެއްލޭ ގޮތް ހެދުން
- ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުން
- ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ހެދުން
މަޖިލީހުން ގާނޫނު އަސާސީ އިސްލާހު ކުރީ، އިއްޔެ ބިލު ހުށަހަޅައި، މުޅި މަޖިލީހުގެ ކޮމިޓީން ފާސްކުރުމަށް ފަހު އިއްޔެ ހަވީރު ބޭއްވި ޖަލްސާއެއްގައެވެ.
ސަރުކާރުގެ ފަރާތުން އެ ބިލް ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ. ރައީސް ރޭ ވަނީ އެ ބިލު ތަސްދީގުކުރައްވާފައެވެ.
އެ އިސްލާހުތައް ގެނައުމާ ގުޅުވައި ރައީސް މުއިއްޒު ރޭ ވަނީ ވީޑިއޯއެއް ހާމަކުރައްވާފައެވެ. އެމަނިކުފާނު އެ ވީޑިއޯގައި ވިދާޅުވީ، އެ އިސްލާހުތަކަކީ ދިވެހި ގައުމުގެ ހަމަޖެހުމާއި ސިޔާދަތު ގާއިމުކުރުމުގައި ވަރަށް މުހިންމު ނިންމެވުންތަކެއް ކަމަށެވެ.
އެގޮތުން، ރާއްޖޭގެ ކަނޑުގެ ސަރަހައްދަށް ބަދަލެއް ގެންނަ ނަމަ މީގެކުރިން މަޖިލީހުގެ ތިންބައިކުޅަ ދެބައިގެ އަގުލަބިއްޔަތަކުން ފާސްވާން ޖެހޭކަން ފާހަގަކުރައްވައި ރައީސް ވިދާޅުވީ ގާނޫނަށް ގެނައި އިސްލާހާ އެއްކޮށް އެކަން އިތުރަށް ވަރުގަދަވެ، މަޖިލީހުގެ ހަތަރުބައިކުޅަ ތިންބައިކުޅައިގެ ވޯޓުން ފާސްކުރަން ޖެހޭ ގޮތަށް ކަނޑައެޅީ ކަމަށެވެ.
އެ އިސްލާހާ އެއްކޮށް، ރާއްޖޭގެ ކަނޑުގެ ސަރަހައްދުގެ އީއީޒެޑާ ހަމައަށް ކަނޑައެޅޭ ކަމަށާއި އެގޮތަށް ކަނޑައަޅާ ސަރަހައްދަކަށް ވެސް ބަދަލުގެނެވޭނީ މަޖިލީހުގެ ހަތަރުބައިކުޅަ ތިންބައި ވޯޓު ނަގައި، ރައްޔިތުންގެ ފެންނަ ނުފެންނަ ވޯޓަކުން ކަމަށް އެމަނިކުފާނު ވަނީ ވިދާޅުވެފައެވެ.
މީގެއިތުރުން، ރާއްޖޭގައި ބޭރުގެ އެއްވެސް އަސްކަރީ ބަޔަކު ޢަމަލީ ގޮތުން ޙަރަކާތްތެރި ވާނަމަ، އެކަމަށް މަޖިލީހުން ރުހުންލިބި ފާސްވާންޖެހޭ ކަމަށް ކަނޑައަޅާފައިވާކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވި ގޮތުގައި، އިޞްލާޙަށްފަހު ރައްޔިތުންގެ ފެންނަ ނުފެންނަ ވޯޓު ނަގާ ކަންކަމަށް ބަދަލު ގެނެވޭނީ ވެސް އެ ބަދަލު ގެނައުމަށްޓަކައި ރައްޔިތުންގެ ރުހުން އޮތްތޯ ބަލަން ވޯޓަކަށް އެހުމަށްފަހުގައި ކަމަށެވެ.
އެއާއެކު، ގައުމުގެ ހަމަޖެހުން ގާއިމުކުރުމަށްޓަކައި 'އެންޓި ޑިފެކްޝަން' ޤާނޫނު އަސާސީގައި ހިމެނުމަކީވެސް ރައްޔިތުންގެ މަޖިލީހުން ނިންމެވި ވަރަށް މުހިންމު ކަމެއް ކަމަށް ރައީސް މުއިއްޒު ވިދާޅުވިއެވެ. އަދި، މަޖިލީހުން ގާނޫނު އަސާސީއަށް ގެނައި އިޞްލާޙުތަކުގެ ތެރޭގައި ރާއްޖޭގެ ތަރައްޤީއަށް ކުރު މެދު އަދި ދުރު ރާސްތާގެ ޕްލޭންތައް ހެދުން ރައީސްގެ މަސްއޫލިއްޔަތުގެ ތެރޭގައި ހިމެނިގެން ހިނގައްޖެކަން ފާހަގަކުރެއްވިއެވެ.
އެ ވީޑިއޯ ނިންމަވައިލައްވަމުން، އެމަނިކުފާނު ވަނީ މަޖިލީހުން ގެނައި އިޞްލާޙުތަކަކީ ރާއްޖޭގެ ރައްޔިތުންގެ ހައްގުގައި މިނިވަންކަމާއި ސިޔާދަތާއި ތަރައްގީއާއި ހަމަޖެހުމަށްޓަކައި ނިންމެވި ވަރަށް މުހިންމު ނިންމެވުންތަކެއް ކަމުގައި ވިދާޅުވެފައެވެ. އަދި، އެފަދަ ނިންމެވުމެއް ރައްޔިތުންގެ މަޖިލީހުގެ މެންބަރުން ނިންމެވީތީ، އެ މެންބަރުންނަށް އެމަނިކުފާނު ވަނީ ޝުކުރު އަދާކުރައްވާފައެވެ.
ޕާޓީއިން ވަކިކޮށްފިނަމަ މަޖިލީހުގެ ގޮނޑި ގެއްލޭގޮތަށް އިއްޔެ ގާނޫނުއަސާސީ އިސްލާހުކޮށްފައިވާއިރު އެކަމާމެދު ޕީއެންސީ އާއި އެމްޑީޕީގެ މެންބަރުން ވެސް ވަނީ ކަންބޮޑުވުން ފާޅުކޮށްފައެވެ. އެގޮތުން ޕީއެންސީއަށް ނިސްބަތްވާ ހުރާ ދާއިރާގެ މެންބަރު ޑރ. އަނާރާ ނައީމާއި އެމްޑީޕީގެ ހުށަހެޅުމަކީ ޕާޓީއިން ވަކި ކުރާ ހާލަތުގައި ގޮނޑި ގެއްލުމުގެ ކުރިން އެ ދާއިރާއެއްގެ ރައްޔިތުންގެ ބަހެއް ވޯޓުން ހޯދުމަށެވެ. އެ އިސްހާލު މަޖިލީހަށް ހުށަހެޅި ނަމަވެސް ޕީއެންސީގެ މެޖޯރިޓީ އޮތް މަޖިލީހުން ވަނީ އެ އިސްލާހު ބޭރު ކޮށްލައިފައެވެ.
މިހާރު އޮތްގޮތުން ޕާޓީއިން އެ މެންބަރަކު ވަކިކުރާއިރަށް މަޖިލީހުގެ ގޮނޑި ގެއްލޭތީ މިއީ ރައްޔިތުންނަށް ވުރެން ޕާޓީތަކުގެ ވެރިންގެ ބާރު މެންބަރުންގެ މައްޗަށް ގަދަވާ އިސްލާހެއް ކަމަށް ވިދާޅުވެ ސިޔާސީ އެހެން ފިކުރު ތަކުގެ ލީޑަރުން ވެސް އަންނަނީ ކަންބޮޑުވުން ފާޅު ކުރަމުންނެވެ.