ހިއުމަން ރައިޓްސް ކޮމިޝަން (އެޗްއާރުސީއެމް)ގެ ނައިބު ރައީސަކަށް އެކޮމިޝަނުގެ މެންބަރު މުއުމިނާ ވަހީދު އައްޔަން ކުރަން ރައްޔިތުންގެ މަޖިލީހުން މިއަދު ރުހުންދީފިއެވެ.
އެޗްއާރުސީއެމަށް ނައިބު ރައީސަކު އައްޔަންކުރަނީ ކުރިން އެމަގާމުގައި ހުންނެވި ޑރ. އަހުމަދު އަދުހަމް އަބްދުﷲ އިސްތިއުފާ ދެއްވާފައިވާތީއެވެ.
އެ ކޮމިޝަނުގެ ނައިބު ރައީސަކަށް މުއުމިނާ އައްޔަންކުރަން މިއަދުގެ މަޖިލީހުގެ ޖަލްސާގައި ވަނީ ވޯޓަށް އަހާފައެވެ. އެގޮތުން، އެމާގަމަށް އޭނާ އައްޔަންކުރަން ފާސްވީ ވޯޓުގައި ބައިވެރިވި 69 މެންބަރުންގެ އިއްތިފާގުންނެވެ.
މުއުމިނާ އެޗްއާރްސީއެމްގެ މެންބަރު ކަމަށް އައްޔަނުކޮށްފައި ވަނީ 2020ވަނަ އަހަރެވެ.
އެޗްއާރުސީއެމްގައި މުއުމިނާގެ އިތުރުން މިހާރު ތިއްބަވަނީ އެ ކޮމިޝަންގެ ރައީސް މަރިޔަމް މުނާއާއި އާމިނަތު ޝިފާއަތު އަބްދުއްރައްޒާގާއި ސަމާއު އަހުމަދު ނަޖީބުގެ އިތުރުން އިސްމާއީލް ހަބީބެވެ.