އިސްރާއީލުން ފަލަސްތީނުގެ ޣައްޒާ ސަރަހައްދުގައި ހިންގަމުންދާ ލާއިންސާނީ ހަނގުރާމަ އެއްވެސް ޝަރުތަކާ ނުލައި ދާއީމީކޮށް ހުއްޓައިލުމަށް ގޮވާލައި އދ.ގެ ސަލާމަތީ މަޖިލީހަށް އިއްޔެ ހުށަހެޅި ގަރާރު އެމެރިކާއިން އަނެއްކާ ވެސް ވީޓޯކޮށް ބޭރުކޮށްލައިފިއެވެ.
އެމެރިކާއިން އެ ގަރާރު ވީޓޯކުރިއިރު، ސަލާމަތީ މަޖިލީހުގެ އިންތިޚާބީ މެންބަރުންގެ ގޮތުގައި ހިމެނޭ އަލްޖީރިއާ، އެކުއަޑޯ، ގަޔާނާ، މާލްޓާ، މޮޒަމްބީކް، ދެކުނު ކޮރެއާ، ސިއެރަ ލިއޯން، ސްލޮވީނިއާ އަދި ސްވިޒަލޭންޑުން ހުށަހެޅި ގަރާރު ފާސް ކުރުމަށް 14 ވޯޓު ލިބުނެވެ.
ގަރާރުގައި ޣައްޒާގައި ރަހީނުކޮށްފައި ތިބި އަސީރުން ދޫކޮށްލުމަށް ގޮވާލާފައިވާއިރު، އެމެރިކާއިން ވަނީ "ޝަރުތުތަކާ ނުލައި" ހަނގުރާމަ ހުއްޓާލުމަށް އޮތް އޮތުމާ ދެކޮޅު ހަދާފައެވެ.
"މުޅި މަޝްވަރާތަކުގައި އަޅުގަނޑުމެން ސާފުކޮށްދިނީ ރަހީނުކުރި މީހުން ދޫކޮށްލުމަށް ޝަރުތުނުކޮށް ހަނގުރާމަ ހުއްޓާލުމަށް ތާއީދު ނުކުރެވޭނެ ކަމަށް،" ނިއުޔޯކުގައި ބޭއްވި ޖަލްސާގައި އެމެރިކާއިން އދ އަށް ކަނޑައަޅާފައި ހުންނަވާ ސަފީރުގެ ނާއިބު ރޮބާޓް ވުޑް ވިދާޅުވިއެވެ.
މިއީ މިދިޔަ އަހަރުގެ އޮކްޓޯބަރު މަހު އިސްރާއީލުން ޣައްޒާއަށް ހަމަލާތައް ދޭން ފެށިފަހުން، ހަނގުރާމަ ހުއްޓާލުމަށް ގޮވާލާ ގަރާރު އެމެރިކާގެ ރައީސް ޖޯ ބައިޑަންގެ ވެރިކަމުގައި ވީޓޯ ކުރި ހަތަރުވަނަ ފަހަރެވެ.
ސަލާމަތީ މަޖިލީހުގެ ގަރާރެއް ތަސްދީގު ކުރުމަށް، އެކަމަށް ތާއީދުކުރާ މަދުވެގެން ނުވަ ވޯޓާއި ދާއިމީ ފަސް މެންބަރުން ކަމަށްވާ އެމެރިކާ، އިނގިރޭސިވިލާތް، ފަރަންސޭސިލާތް، ރަޝިޔާ ނުވަތަ ޗައިނާގެ ތެރެއިން އެއްވެސް މެންބަރު ގައުމަކުން ގަރާރު ވީޓޯކޮށްގެން ނުވާނެއެވެ. ދާއިމީ ފަސް މެންބަރު ގައުމަކީ ވީޓޯކުރުމުގެ ބާރުލިބިފައިވާ ފަސް ގައުމެވެ.
އިސްރާއީލަށް ވަރަށް ބޮޑަށް ވާގިވެރިވެވަޑައިގަންނަވާ ބައިޑަންގެ އެ ސްޓޭންޑާ ގުޅިގެން ހައްގުތަކަށް ވަކާލާތުކުރާ ފަރާތްތަކުގެ ފާޑުކިޔުން އެމަނިކުފާނަށް ވަރަށް ބޮޑަށް ވަނީ އަމާޒުވެފައެވެ.
އެމެރިކާއިން އަހަރަކު މަދުވެގެން 3.8 ބިލިއަން ޑޮލަރުގެ އަސްކަރީ އެހީ އިސްރާއީލަށް ފޯރުކޮށްދޭއިރު، ޣައްޒާގެ ހަމަނުޖެހުން ފެށުނު ފަހުން ބައިޑެންގެ ވެރިކަމުގައި ވަނީ އެގައުމަށް އިތުރު އެހީގެ ގޮތުގައި 14 ބިލިއަން ޑޮލަރު ފޯރުކޮށްދިނުމަށް ނިންމާފައެވެ.