ކުރީގެ ރައީސް އަބްދުﷲ ޔާމީން އަބްދުލްގައްޔޫމް ފަތުރުވެރިކަމަށް ވ. އާރަށް ކުއްޔަށް ދޫކުރުމުގެ މައްސަލައިގައި ޕްރޮސެކިއުޓާ ޖެނެރަލް (ޕީޖީ) އޮފީހުން ހުށަހެޅި އާ ހެކިތަކުގެ މައްސަލަ ސުޕްރީމް ކޯޓުގައި ފެށުމާ އެކު، ހައިކޯޓުން އާ ހެކިތައް އެއް ފަރާތްކުރަން ނިންމީ ގާނޫނުއަސާސީއާ ހިލާފަށް ކަމަށް ދައުލަތުގެ ވަކީލުން މިއަދު ވިދާޅުވެއްޖެއެވެ.
ދައުލަތުން އާ ހެކި ހުށަހަޅާފައިވަނީ އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތަށް އެއް މިލިއަން ޑޮލަރު ގަބޫލުކޮށްގެން އެ ފައިސާ ލޯންޑާކުރި ކަމަށް ބުނެ، ޔާމީންގެ މައްޗަށް ހިންގި ޝަރީއަތުގައި ހެކިން ހެކި ބަހާ ގުޅޭ ކަންތައްތަކާ ގުޅޭގޮތުންނެވެ.
އެ މައްސަލާގައި މިއަދު ހެނދުނު 9:00ގައި ފެށި ޝަރީއަތުގައި ދައުލަތުގެ ވަކީލު އަހުމަދު ޝަފީއު ވިދާޅުވީ، ހައި ކޯޓުން ނިންމާފައިވާ ނިންމުން ގާނޫނު އަސާސީގެ 143 ވަނަ މާއްދާއާ ޚިލާފުވާ ކަމަށާއި އެ މާއްދާގައި މަތީ މަރުހަލާގެ ކޯޓުތަކުން ނިންމާ ނިންމުންތަކަށް އެއަށް ކޯޓަށް ވުރެ ދަށު މަރުހަލާގެ ކޯޓުތަކުން ތަބާވާން ވާނެ ކަމަށެވެ.
އާރަށު މައްސަލާގައި ސުޕްރީމު ކޯޓުގައި ކުރިއަށްދާ ޝަރީއަތުގެ ތެރެއިން -----
މިގޮތުން، ސުޕްރީމް ކޯޓުގެ އަލީ ޒުބައިރާއި އިތުރު ދެ މީހުން ހިމެނޭ މައްސަލާގެ ގަޒިއްޔާގައި ބަޔާންކޮށްފައިވާ އުސޫލާ ހައި ކޯޓުގެ ނިންމުން ޚިލާފުވާ ކަމަށް ވަކީލު ވިދާޅުވިއެވެ.
އެ ކަމުގައި ކަނޑައަޅާފައިވާ ގޮތުން، އިޖުއާރަތްތައް ފުރިހަމަކޮށްފައިނުވާ ހަލާތުގައި ނުވަތަ އައިބު ކަންތައްތަކާ އެއްކޮށް އިޖުރާއަތް ފުރިހަމަ ކޮށްފައިވާ ހާލަތުގައި އެކަން ފުރިހަމަކޮށް އިސްލާހުކުރުމުގެ ފުރުސަތު އޮންނާނެ ކަމަށް ޝަފީއު ވިދާޅުވިއެވެ.
ޝާފީއު ވަނީ އާ ހެކި އެއް ފަރާތްކުރަމުން ހައި ކޯޓުން އެންގިއިރުގައި ހިނގާފައިވަނީ އިޖުރާއީ މައްސަލައެއް ކަމަށާއި އެއީ އިސްލާހުކުރެވޭނެ ކަމެއް ކަމަށް ވިދާޅުވެފައެވެ. މިގޮތުން، އެކަން އިސްލާހުކުރާނީ އާ ހެއްކާ ގުޅޭ ގޮތުން ހުށަހެޅުމެއް އޮތް ކަމަށްވާނަމަ، އެ ކަމަށް ފުރުސަތު ދިނުމަށް ފަހުގައި އެއާ މެދު ބަހުސްކޮށް، ހެކި ބަލައިގަތުމާ މެދު ދަށު ކޯޓުގައި ޝަރީއަތުން ގޮތެއް ކަނޑައެޅުމުން ކަން ޝަފީއު ފާހަގަކުރެއްވިއެވެ. އެ ފުރުސަތު ކްރިމިނަލް ކޯޓުގެ ޝަރީއަތުގައި ހުޅުވިފައި އޮތް ކަމަށް ވިދާޅުވިއެވެ.
އޭނާ ވަނީ އާ ހެކިތައް އެއް ފަރާތް ކުރަން ހައި ކޯޓުން ނިންމާފައިވާ ނިންމުން ސުޕްރީމް ކޯޓުން ބާތިލުކުރުމަށާއި އާ ހެކި ތަކާ ގުޅޭ ގޮތުން ދަށު ކޯޓުގައި ބަހުސްކޮށްގެން އެ ކަމުގައި ކޯޓުން ގޮތެއް ކަނޑައަޅައިދިނުމަށް އެދިފައެވެ.
ދިވެހި ރާއްޖޭގެ ސުޕްރީމް ކޯޓު: އެ ކޯޓުގައި ވަނީ ޔާމީންގެ ޝަރީއަތް ފަށާފައި -- ސަމް ފޮޓޯ/ ފަޔާޒު މޫސާ
މި މައްސަލައިގައި ދައުލަތުގެ ވާހަކަތަކާ ގުޅުވައި ޔާމީންގެ ފަރާތުން ވަކާލަތުކުރައްވައި ގާނޫނީ ވަކީލު ހަމްޒާ ލަތީފް ވިދާޅުވީ، ނުބައި މަރުހަލާއެއްގައި ހެކި ހުށަހެޅުމުގެ ނަތީޖާއަކަށް ވާނީ ހެކި ބަލައިނުގަތުން ކަމަށެވެ. މި މައްސަލައިގައި ދައުލަތުން އަމަލުކޮށްފައި އޮތީ ހެކިން ދެއްކި ވާހަކަތަކަށް ރައްދު ދިނުމަށް އާ ހެކި ހުށަހަޅާ އުސޫލުން ކަމަށް އޭނާ ވިދާޅުވިއެވެ.
އެއީ، ގާނޫނުގައި ބުނާ ހަމަހަމަކަމުގެ ހައްގު ގެއްލޭ ކަމެއްކަން ފާހަގަކުރައްވައި ޔާމީންގެ ވަކީލު ވިދާޅުވީ، ޝަރީއަތުގައި ނިންމާފައިވަނީ ހެކިން ހުށަހަޅާ ހެއްކަށް ރައްދު ދޭން ހުށަހެޅި ހެކި ވަޒަންކުރުމަށް އެއަށް ރިއާޔަތްކޮށްގެން ކަމަށެވެ. އަދި، ދައުލަތުން އަމަލުކޮށްފައި އޮތް ގޮތުން ދައުވާ ލިބޭ ފަރާތުގެ ހައްގުތަކަށް އަސަރުކޮށްފައިވާކަން ވަކީލު ފާހަގަކުރެއްވިއެވެ.
އެހެންވެ، ދައުލަތުން ބޭނުންވާ ގޮތަށް ސުޕްރީމް ކޯޓުން އަމުރު ނެރެފިނަމަ، 'މިހާ ބޮޑު' ގޯހެއް ހަދާފައި އޮތް ބަޔަކަށް ދެވެނީ ހިތްވަރެއްގެ ގޮތުގައި ޔާމީންގެ ވަކީލު ވަނީ ސިފަކުރައްވާފައެވެ،
ސުޕްރީމް ކޯޓުގައި މި މައްސަލަ ބައްލަވާނީ ތިން ފަނޑިޔާރުންނެވެ. އެއީ، ފަނޑިޔާރު އައިޝާ ޝުޖޫން މުހައްމަދުއާއި ފަނޑިޔާރު ޑރ. އަޒްމިރަލްދާ ޒާހިރުގެ އިތުރުން ފަނޑިޔާރު ޑރ. މުހައްމަދު އިބްރާހިމެވެ.