ރާއްޖޭގެ ސިޔާސީ ހާލަތާ ގުޅޭގޮތުން މަޝްވަރާކުރުމަށްޓަކައި ކުރީގެ ތިން ރައީސުން ކަމަށްވާ ރައީސް މުޙައްމަދު ނަޝީދު، ރައީސް އިބްރާހީމް މުޙައްމަދު ޞާލިޙް އަދި ރައީސް ޢަބްދުﷲ ޔާމީން ޢަބްދުލްޤައްޔޫމްގެ މަންދޫބުންގެ ދެވަނަ ބައްދަލުވުމެއް ބާއްވައިފިއެވެ.
މިދިޔަ އަންގާރަ ދުވަހު ބޭއްވި މި ބައްދަލުވުމުގައި މައިގަނޑު ގޮތެއްގައި މަޝްވަރާކޮށްފައިވަނީ ސަރުކާރު ޒިންމާދާރުކުރުވުމާ ގުޅޭގޮތުންނާއި، މިހާރު ރާއްޖޭގައި އޮތް ސިޔާސީ ހާލަތާ ދެކޮޅަށް ގުޅިގެން މަސައްކަތް ކުރެވޭނެ ގޮތްތަކާ ބެހޭގޮތުންނެވެ.
މިދިޔަ މެއި މަހުގެ 15 ވަނަ ދުވަހު ކުރީގެ ތިން ރައީސުން ބައްދަލުކުރައްވައި، އެކުގައި މަސައްކަތްކުރައްވަން ނިންމެވުމާ ގުޅިގެން އުފެއްދެވި ހާއްސަ ކޮމިޓީގައި ހިމެނިވަޑައިގަންނަވަނީ ޖުމްލަ ހަ މެންބަރުންނެވެ. އެއީ ކޮންމެ ރައީސެއްގެ ފަރާތްޕުޅުން ދެ މަންދޫބުންނެވެ.
އެގޮތުން ރައީސް ނަޝީދުގެ ފަރާތްޕުޅުން ރައްޔިތުންގެ މަޖިލީހުގެ ކުރީގެ ނައިބު ރައީސް އީވާ ޢަބްދުﷲ އާއި ފައްޔާޒް އިސްމާއީލް ހިމެނިވަޑައިގަންނަވާއިރު، ރައީސް ޔާމީންގެ ފަރާތްޕުޅުން ތިއްބަވަނީ ޕީއެންއެފްގެ އަމީންއާންމު މުޙައްމަދު މަލީޙް ޖަމާލާއި މާލީ ތަޖުރިބާކާރު އިސްމާޢީލް ޒަރިޔަންދެވެ. އަދި ރައީސް ޞާލިޙްގެ ފަރާތްޕުޅުން ތަމްސީލުކުރައްވަނީ ރައްޔިތުންގެ މަޖިލީހުގެ ކުރީގެ ނައިބު ރައީސް އަޙްމަދު ސަލީމާއި އެމްޑީޕީގެ ޕާލަމެންޓަރީ ގްރޫޕްގެ ކުރީގެ ލީޑަރު މުޙައްމަދު ރަޝީދު ޙުސައިން (ބިގޭ) އެވެ.
މި ކޮމިޓީގެ ފުރަތަމަ ބައްދަލުވުން މެއި މަހުގެ 18 ގައި ބާއްވާފައިވާއިރު، އެ މަޝްވަރާ ބައްދަލުވުމަށް ފަހު، މަސައްކަތްތަކާ ގުޅޭގޮތުން ނޫސްވެރިންނަށް މައުލޫމާތު ދެެއްވަމުން ފައްޔާޒް ވިދާޅުވެފައިވަނީ، ކޮމިޓީން ކުރިއަށް ގެންދާ ހަރަކާތްތަކުގެ އަދާހަމަ ކޮންމެ ދުވަހަކު ނޫސްވެރިންނަށް ލިބޭނެ އިންތިޒާމު ހަމަޖައްސާނެ ކަމަށެވެ. އަދި ރާއްޖޭގެ މިސްރާބު މިހާރު ހުރިގޮތުން، ތިން ލީޑަރުން ގުޅިގެން ރަނގަޅު މަސައްކަތެއް ކުރެވޭނެ ކަމުގެ އުންމީދު ބޮޑުކަން އޭނާ އޭރު ފާހަގަކުރެއްވިއެވެ.
ތިން ރައީސުންގެ މަންދޫބުންގެ ފަހުގެ ބައްދަލުވުމާ ގުޅޭ އިތުރު ތަފްސީލްތައް ހާމަކުރުމަށްޓަކައި ވަރަށް އަވަހަށް ނޫސްވެރިންގެ ބައްދަލުވުމެއް ބޭއްވުމަށް ނިންމާފައިވާކަމަށް އެ މަންދޫބުންގެ ޓީމުން މައުލޫމާތު ދީފައިވެއެވެ.