އިސްރާއީލުން ފަލަސްތީނުގެ ޣައްޒާގައި ކުރަމުންދާ ހަނގުރާމަ ނިމުމުން ޣައްޒާގެ ވެރިކަންކުރާ ހަމާސް ޖަމާއަތުން ޣައްޒާގެ ވެރިކަން ދެން ނުކުރާނެ ކަމަށާއި އެ ޖަމާއަތުގެ އަސްކަރީ ގާބިލުކަން ނައްތާލާފައިވާނެ ކަމަށް އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެއެވެ.
އަދިވެސް އެ ސަރަހައްދުގައި ބާކީ ތިބި ކަމަށް ބެލެވޭ 101 ރަހީނުން ހޯދުމުގެ މަސައްކަތް އިސްރާއީލުން ހުއްޓާނުލާ ކަމަށާއި ކޮންމެ ރަހީނެއް އަނބުރާ ގެނެސްދީފި މީހަކަށް ފަސް މިލިއަން ޑޮލަރުގެ އިނާމެއް ދޭނެ ކަމަށް ވެސް ނަތަންޔާހޫ ވިދާޅުވިއެވެ.
"އަޅުގަނޑުމެންނަށް ރަހީނެއް ގެނެސްދިން މީހަކު، އޭނާއާއި އޭނާގެ އާއިލާއަށް ނުކުމެވޭނެ ރައްކާތެރި ގޮތެއް ހޯދާނެ," އޭނާ ވިދާޅުވިއެވެ.
ނަތަންޔާހޫ އެގޮތަށް ވިދާޅުވެފައިވަނީ އިސްރާއީލުގެ ދިފާއީ ވަޒީރު އަދި އެ ގައުމުގެ ސިފައިންގެ ވެރިޔާއާ އެކު ޣައްޒާއަށް ކުރެއްވި ދަތުރުފުޅެއްގައެވެ.
މިދިޔަ އަހަރުގެ އޮކްޓޫބަރު މަހުގެ ހަތްވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންގެންދާ ހަމަލާތަކުގައި މިހާތަނަށް ގާތްގަޑަކަށް 44،000 މީހުން ވަނީ ޝަހީދުކޮށްލާފައެވެ. ހަމަލާތަކުގައި ޒަޚަމުކޮށްލާފައިވާ މީހުންގެ އަދަދު ވަނީ 103،898 އަށް އަރައިފައެވެ.