ރައްޔިތުންގެ މާލީ ހާލަތު ދަށްވެ، ސަރުކާރު ދެމިއޮތުމާ ދޭތެރޭ ވެސް މިހާރު ޝައްކު އުފެދޭ ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއިލް މިރޭ ވިދާޅުވެއްޖެއެވެ.
އެސްއެސްޓީވީގެ ބާރު ހަތަރެއް ޕްރޮގްރާމުގައި ފައްޔާޒު ވަނީ ސަރުކާރުގެ ވައުދުތަކަށް ވަރަށް ބޮޑަށް ފާޑުވިދާޅުވެފައެވެ. މިގޮތުން، ސަރުކާރަށް އެއް އަހަރުވީއިރު އުމްރާނީ ގޮތުން އެއްވެސް ކަމެއް ނުކުރެއޭ ބުނުމަކީ ދޮގަކަށް ނުވާނެ ކަމަށާއި ކުރެވުނީ ވަރަށް ކުޑަ ޕަސެންޓެއްގެ މަސައްކަތް ކަމަށް އޭނާ ވިދާޅުވިއެވެ.
ރައީސް ޑރ. މުޙައްމަދު މުއިއްޒުގެ މެނިފެސްޓޯއާއި ވައުދުފުޅުތައް އަޅައިކިޔާ ހިސާބުކޮށްލުމުން 100އަށް ވުރެ ގިނަ ބިލިއަން ރުފިޔާ އެކަމަށް ހޭދަވާ ކަމަށާއި އެއީ ރަސްމާލެއާއި މާލެ ސިޓީ ގުޅުވާ ކަނޑު އަޑީގެ ޓަނަަލްގެ ވައުދުފުޅު ނުލާ ކަމަށް ފައްޔާޒު ވިދާޅުވިއެވެ.
ފުށިދިއްގަރު ފަޅު ހިއްކަން ފެށުން: ފައްޔާޒު ވިދާޅުވީ ރަސްމާލެ ހިއްކަން އެކަނި ވެސް 700 ނުވަތަ 800 މިލިއަން ޑޮލަރު ޚަރަދުވާނެ ކަމަށް -- ފޮޓޯ/ ރައީސް އޮފީސް
މިގޮތުން، އެ މަޝްރޫއު އެކަނި ވެސް 400 ނުވަތަ 500 ބިލިއަން ޑޮލަރަށް ވުރެ ކުޑަކޮށް ކުރިއަށް ގެންދެވޭނެ ކަމަށް ގަބޫލުނުކުރައްވާ ކަމަށާއި ރައީސް މުއިއްޒުގެ ވައުދުފުޅުތަކުގެ ވިއްސަކަށް އިންސައްތަ ވެސް ފުއްދޭނެ ކަމަށް ގަބޫލުނުކުރައްވާ ކަމަށް ފައްޔާޒު ވަނީ ވިދާޅުވެފައެވެ.
މީގެއިތުރުން، ފައްޔާޒު ވަނީ ރަސްމާލެ މަޝްރޫއަށް ހިނގާނެ ކަމަށް ލަފާކޮށް، ޚަރަދުތަކެއްގެ ތަފްސީލުތައް ހިއްސާކުރައްވާފައެވެ.
"ރަސްމާލެއަށް އެކަނި ވެސް އެ ވިދާޅުވާ މިންވަރަށް ހިއްކާ، ތޮށިލުމާ މިކަންކަމަށް މަދުވެގެން އެބަ ދޭ 700އާ 800 މިލިއަން ޑޮލަރު. އަދި، އެތަން އާބާދުކުރުމަށްޓަކައި، ފެނާއި ނަރުދަމާޔާ ސުކޫލާއި ގެދޮރާ މި ހުރިހާ އެއްޗެއް އެބަ ވިދާޅުވޭތާ [ރައީސް މުއިއްޒު] އާބާދު ކުރާނަމޭ. އެތަން ހެދުމަށްޓަކައި އަދި އިތުރަށް މި ދެންނެވި އިންފްރާންޓަކްޗާ ބިލްޑުކޮށް، މީހުންނަށް ދިރިއުޅެލެވޭނެ ލެވެލަކަށް ގެންދަން އިތުރު ދެ ބިލިއަނެއްހާ ޑޮލަރު ބޭނުންވާނެ."
އެމްޑީޕީގެ ޗެއާޕާސަން ފައްޔާޒު އިސްމާއިލް: އޭނާ ވިދާޅުވީ ރައީސްގެ ވައުދުތައް ފުއްދެވޭނެ ކަމަށް ގަބޫލުނުކުރައްވާ ކަމަށް -- ފޮޓޯ/ އެމްޑީޕީ
މިހާރު ވެސް ރައީސް މުއިއްޒަށް ވާހަކަފުޅުދައްކަވަން ޕޯޑިއަމެއް ލިބިވަޑައިގެންފި ނަމަ އިތުރު ވައުދުފުޅުތައް ވެވަޑައިގަންނަވަމުންދާ ކަން ފާހަގަކުރައްވައި ފައްޔާޒު ވިދާޅުވީ، އެމަނިކުފާނުގެ ވައުދުތައް ފުއްދެވޭނެ ކަމަށް ގަބޫލުނުކުރައްވާ ކަމަށެވެ.
ސަރުކާރުގެ ވިސްނުމުގައި ހަމައެކަނި އޮތީ ސިޔާސީ މީހުންނަށް މުސާރަ ދިނުމާއި ސިވިސް ސާވިސް މުވައްޒަފުންނަށް މުސާރަ ދެވޭނެ ގޮތެއް ހޯދުން ކަމަށް ފައްޔާޒު ތުހުމަތުކުރެއްވިއެވެ.
އޭގެއިތުރުން، ގައުމެއްގެ މާލިއްޔަތު އެންމެ ބޮޑު އެއް އަސާސަކީ ޕްރައިވެޓް ސެކްޓާއެއް ކުރިއެރުންކަމާއި ގިނަ ދިވެހިން މަސައްކަތް ކުރަނީ އެ ސިނާއަތުގައިކަން ސަރުކާރަށް "ނޭނގޭ ކަމަށް" ފައްޔާޒު ވަނީ ވިދާޅުވެފައެވެ.
އަޅުގަނޑަށް ފެންނަނީ ވަރަށް ބިކަ، ދެރަ ދުވަސްތަކެއް. އަދި ހަމަ ރައްޔިތުން ގެ ހާލު ދެރަވަގެން ގޮސް، މި ސަރުކާރު އޮތުމާ ދޭތެރޭ ވެސް އަޅުގަނޑަށް ހަމަ ޝައްކު އުފެދޭ މިންވަރަށް އަޅުގަނޑަށް ކަންކަން އެބަ ފެނޭފައްޔާޒު
އޭނާ ވިދާޅުވި ގޮތުން، ފަތުރުވެރިކަމުގެ ސިނާއަތާ ގުޅުން ނެތް ވިޔަފާރިއެއް ކަމަށްވާނަމަ ހުރީ ބަންދުކުރާ ހިސާބުގައި ކަމަށެވެ.