އެކުވެރި އަރަބި އިމާރާތް (ޔޫއޭއީ)އާއި ތައިލޭންޑުގެ ހޮސްޕިޓަލްތަކަކުން އާސަންދަ ހަމަޖެހޭ ހިސާބަށް މިހާރު އެ މަސައްކަތް ގޮސްފައިވާ ކަމަށް އެންސްޕާގެ ސީއީއޯ ހީނާ ވަލީދު މިއަދު ވިދާޅުވެއްޖެއެވެ.
އާސަންދައިގެ ޚިދުމަތްތަކުގެ އަގުތަކާއި، އެ ސްކީމްގެ ދަށުން ދޫކުރެވޭ ބޭހުގެ އަގުތަކާ ގުޅޭގޮތުން މިއަދު ރައްޔިތުންގެ މަޖިލީހުގެ އިޖުތިމާއީ ކޮމިޓީއަށް ހާޒިރުވެވަޑައިގެން ހީނާ ވިދާޅުވީ، ޔޫއޭއީއާއި ތައިލޭންޑުން އާސަންދަ ލިބޭގޮތް ހެދުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެއް ކަމަށެވެ. އެ މަނިކުފާނު އެ ވައުދު ފުއްދަވާނެކަމުގެ ޔަގީންކަން ވެސް ހީނާ ދެއްވިއެވެ.
ހަމައެހެންމެ މިހާރު އެ ޚިދުމަތް، ޔޫއޭއީއާއި ތައިލެންޑްގެ ހޮސްޕިޓަލްތަކުން ހަމަޖެހޭ ހިސާބަށް ވާސިލުވެފައިވާ ކަމަށް ހީނާ ވިދާޅުވިއެވެ.
އާސަންދައިން މިހާރު ޔޫއޭއީ އަދި ތައިލެންޑްގެ ހޮސްޕިޓަލްތަކާއެކީގައި މަސައްކަތްތަކެއް ކުރެވި އަޅުގަނޑުމެންނަށް ބަޔަކާ އެކީގައި ކުރިއަށްދެވޭނެ ހިސާބަށް ވާސިލުވެފައި އެބަވޭ. އެހެންވީމާ އެ ޚިދުމަތް ދެވޭނެ ދުވަހަކާ އެ ކަމާ ބެހޭ އިތުރު ތަފުސީލުތައް އަޅުގަނޑުމެން ވަރަށް އަވަހަށް ހާމަކުރަމުންދާނަން، އެންސްޕާގެ ސީއީއޯ ހީނާ ވަލީދު
މި އަހަރުގެ ޖެނުއަރީ މަހުގެ 13 ވަނަ ދުވަހު ޗައިނާއަށް ރައީސް މުއިއްޒު ކުރެއްވި ފުރަމާނަ ދަތުރުފުޅު ނިންމަވައިލެއްވުމަށް ފަހު، ވެލާނާ އިންޓަނޭޝަނަލް އެއާޕޯޓުގައި ހުންނަވައި މީޑިއާތަކަށް ދެއްވި ސްޓޭޓްމަންޓެއްގައި ރައީސް ވިދާޅުވީ، މިހާރު އާސަންދަ ލިބޭ ގައުމުތަކަށް ވުރެ މާ ފެންވަރު ރަނގަޅު، މާ މަތީ ފަންތީގެ ގައުމުތަކުން އާސަންދަ ލިބޭގޮތް ހަމަޖައްސަން މަސައްކަތްކުރައްވާނެ ކަމަށެވެ.
އެގޮތުން، ޔޫއޭއީއާއި ތައިލޭންޑުން އާސަންދަ ލިބޭގޮތް ހަމަޖައްސާނެ ކަމަށް ރައީސް އެ ދުވަހު ވިދާޅުވިއެވެ.
މިހާރު އާސަންދައިގެ ދަށުން އާންމުގޮތެއްގައި ފަރުވާ ހޯދުމަށް ދިވެހިން ރާއްޖެއިން ބޭރަށް ދަނީ އަވައްޓެރި އިންޑިއާ، ސްރީލަންކާއަށެވެ.