އިސްރާއީލުން ފަލަސްތީނުގެ ޣައްޒާއަށް ދެމުންގެންދާ ހަމަލާތަކުގެ ސަބަބުން ގެދޮރު ގެއްލި ހާލުގައިޖެހިފައިވާ އާންމުންނަށް އެހީތެރިކަން ފޯރުކޮށްދިނުމަށް ހޮނިހިރު ދުވަހު ޣައްޒާއަށް ވަތް 108 އެހީގެ ގާފިލާ ތެރެއިން 98 ގާފިލާ ލޫޓުވާފައިވާ ކަމަށް އދގެ ފަލަސްތީނު ރެފިއުޖީ އޭޖެންސީ (އުންރުވާ)އިން ބުނެފިއެވެ.
އުންރުވާގެ ސީނިއާ އިމަޖެންސީ އޮފިސަރު ލޫއީސް ވޯޓާރިޖް ވިދާޅުވީ, އެ ލޫޓުވުމަކީ 13 މަހަށް ވުރެ ގިނަ ދުވަސްވެފައިވާ ހަނގުރާމައިގައި މިހާތަނަށް ކުރިމަތިވި އެންމެ ބޮޑު ހާދިސާ ކަމަށެވެ. ނަމަވެސް, ލޫޓުވީ ކޮން ބައެއް ކަމެއް އުންރުވާއިން ހާމައެއްނުކުރެއެވެ.
"ކާބޯތަކެތި ނުލިބުމުގެ ސަބަބުން ދެ މިލިއަނަށްވުރެ ގިނަ މީހުންގެ ފުރާނައަށް އިތުރަށް ނުރައްކާވާނެ," ވޯޓާރިޖް ވިދާޅުވެއެވެ.
އިސްރާއީލުން ބުނީ ޣައްޒާއަށް އެކަށީގެންވާ ވަރަށް އެހީ ވެއްދުމަށް ކުރެވެން ހުރި ހުރިހާ މަސައްކަތެއް ކުރާ ކަމަށާއި، އިންސާނީ އެހީ ފޯރުކޮށްދިނުމަށް ހުރަސް ނާޅާ ކަމަށެވެ.
ނަމަވެސް، އދގެ އެހީ ފޯރުކޮށްދޭ އޮފިޝަލަކު ވިދާޅުވީ، ޣައްޒާއަށް އެހީ ފޯރުކޮށްދިނުން މިހާރު ވަރަށް ބޮޑަށް ދަތިވެފައިވާ ކަމަށެވެ. ޙާއްސަކަށް ޣައްޒާގެ އުތުރަށް އެހީ ފޯރުކޮށްދިނުން މިހާރު ނާދިރު ކަމަށް ވެސް އޮފިޝަލް ވިދާޅުވެއެވެ.
އިސްރާއީލުން ޣައްޒާއަށް އެއްގަމު މަގުން ހަމަލާތައް ދޭން ފެށިފަހުން ޣައްޒާގެ އުތުރުގައި އޮންނަ ޖަބަލިއާ، ބައިތު ހަނޫން، އަދި ބެއިތް ލަހިއްޔާއަށް ކާބޯތަކެއްޗާއި އެހީގެ އެހެން ސާމާނު ވެސް ފޯރުކޮށްދިނުން މަސް ދުވަސްވަންދެން މަނާކޮށްފައިވެއެވެ.
އދގެ އޮފީސް ފޯ ދަ ކޯޑިނޭޝަން އޮފް ހިއުމަނިޓޭރިއަން އެފެއާޒް (އޯސީއެޗްއޭ) އިން ލަފާކުރާ ގޮތުގައި ޣައްޒާގެ އުތުރުގައި އަދިވެސް 75،000 އާއި 95،000 އާ ދެމެދުގެ އަދަދަކަށް މީހުން އެބަތިއްބެވެ.
އެ ސަރަހައްދުގައި ވަރަށް ގިނަ އަދަދަކަށް އިސްރާއީލު ސިފައިން ތިބިއިރު، ފަލަސްތީނުގެ ސިއްހީ އޮފިޝަލުން ބުނާ ގޮތުގައި މިދިޔަ މަހު އަލުން ހަމަލާތައް ފެށިފަހުން އެ ސަރަހައްދުން ފަލަސްތީނުގެ 1،000 އަށް ވުރެ ގިނަ މީހުން ވަނީ ޝަހީދުކޮށްލާފައެވެ.
އިސްރާއީލުން މިދިޔަ އަހަރުގެ އޮކްޓޯބަރު މަހުގެ ހަތްވަނަ ދުވަހު ޣައްޒާއަށް ދޭން ފެށި ހަމަލާތަކުގައި މިހާތަނަށް 43،922 ފަލަސްތީނު މީހުން ވަނީ ޝަހީދުވެފައެވެ.
އިސްރާއީލުން ވަނީ އުންރުވާއިން އެ ގައުމުގައި ހަރަކާތްތެރިވުން މަނާކޮށް، އެ ޖަމިއްޔާއާ ގުޅުން ކަނޑާލާފައެވެ. އަދި، އެ ޖަމިއްޔާއާއި ހަމާސްއާ ގުޅުން އޮންނަ ކަމަށް ވެސް އިސްރާއީލުން ބުނެއެވެ. ނަމަވެސް، އުންރުވާއިން ވަނީ އެކަން ދޮގުކޮށްފައެވެ. އެ އިދާރާއިން އިންޒާރު ދީފައިވަނީ އިސްރާއީލާއި ހިފާފައިވާ އިރުމަތީ ގުދުސްގައި ހިންގާ ހަރަކާތްތައް ހުއްޓާލުމުން ޣައްޒާގެ އެތެރޭގައި ބޮޑެތި އެހީގެ މަސައްކަތްތަކަށް ހުރަސް އެޅޭނެ ކަމަށެވެ.
ޣައްޒާ، ހިފާފައިވާ ހުޅަނގު އައްސޭރި، ލުބުނާން، އުރުދުން އަދި ސޫރިއާގެ ހުރިހާ ހިސާބެއްގައި ތިބި ފަލަސްތީނުގެ ގާތްގަނޑަކަށް ހަ މިލިއަން ރެފިއުޖީންނަށް އުންރުވާއިން އެހީތެރިކަން ފޯރުކޮށްދެއެވެ.