ސަރުކާރަށް އަހަރެއްވީއިރު، މި ސަރުކާރާމެދު އޮތް އެންމެ ބޮޑު ހިތްހަމަ ނުޖެހުމަކީ ބަޖެޓުން ކުރި ޚަރަދުތައް ނޭންގޭތީކަމަށާއި ސަރުކާރު ޖަވާބުދާރީ ކުރުވަން މަގުމައްޗަށް ނުކުންނަން ތައްޔާރު ކަމަށް ދަ ޑިމޮކްރެޓްސްގެ ނައިބު ރައީސް މުހައްމަދު ޝިފާޒް މިރޭ ވިދާޅުވެއްޖެއެވެ.
މި ސަރުކާރަށް އަހަރެއް ފުރުމާ ގުޅިގެން ޑިމޮކްރެޓްސްއިން މިރޭ ކުރިއަށް ގެންދިޔަ ބަހުސްގައި ވާހަކަ ދައްކަވަމުން ޝިފާޒް ވިދާޅުވީ، މި ސަރުކާރާ މެދު އިންތިހާއަށް ހިތްހަމަ ނުޖެހުން އެބަ އޮތްކަމަށެވެ.
"އެންމެ ބޮޑު ހިތްހަމަ ނުޖެހުމަކީ ވެރިކަމަށް އައި އިރުގައި އޮތް ގާތްގަނޑަކަށް 49 ބިލިއަނުގެ ބަޖެޓެއް، އަހަރު ނިމެން ތިން މަހަށް ކައިރިވީތަނާ މި ޖެހުނީ ސަޕްލިމެންޓްރީ ބަޖެޓެއް ހުށަހަޅަން ފަސް ބިލިއަން އިތުރަށް. ރައްޔިތުން ސުވާލު މިކުރީ ކޮބައިތޯ އެ ފައިސާ، ފާސްކުރި ބަޖެޓަށް ވީ ގޮތެއް ސާފުކޮށެއް ނުދެވުނު،" ޝިފާޒް ވުދާޅުވިއެވެ.
އޭނާ ވަނީ ދައުލަތުގެ ބަޖެޓުން ބޮޑު ޖަރީމާއެއް ހިންގާފައި ވާކަމަށް މި ސަރުކާރަށް ތުހުމަތު ކޮށްފައެވެ.
"ޑރ. މުއިއްޒަށް މި ދަންނަވަނީ ތިން ހަފުތާވަންދެއް ފިނޭންސް މިނިސްޓްރީ ބަންދުނުކޮށް މުވައްޒަފުން ބައިތިއްބައިގެން ކޮން ބިލުތަކެއްތޯ މަޖިލީހަށް ހުށަހަޅަން ފޯޖުކޮށްގެން ހައްދަވަން މަސައްކަތް ކުރީ،" މި ސަރުކާރުން ޚަރަދުތަކުގެ ތަފުސީލު ހާމަކުރައްވާނެ ކަމަށް ގަބޫލުނުކުރައްވާކަން ފާހަގަކުރައްވައި ޝިފާޒު ވިދާޅުވިއެވެ.
ބަޖެޓުން ރަށްރަށުގައި އެއްވެސް މަޝްރޫއެއް ކުރިއަށް ނުގެންދަކަމަށް ޝިފާޒު ވިދާޅުވިއެވެ. އަދި މަސްވެރިންނަށް ފައިސާ ނުދޭކަމަށާއި ޕްރައިވެޓު ސެކްޓާ ވިޔަފާރިތައް ވެސް މިހާރު ނެތް ކަމަށް އޭނާ ވިދާޅުވިއެވެ.
ސަރުކާރަށް ފާޑުވިދާޅުވަމުން ޝިފާޒު ވަނީ، މި ސަރުކާރުން އާސަންދަ "ކަނޑައިލާ" ބޯހިޔާވަހި ކަމުގެ މަޝްރޫއެއް ވެސް ކުރިއަށް ނުގެންދާއިރު ބަޖެޓު ބޭނުންވަނީ ކޮންކަމަކަށްތޯ ސުވާލު އުފައްދައިފައެވެ.
"އެމަނިކުފާނަށް މަދުވާ އެއްވެސް ކަމެއް ނެތް، ހުރިހާ ތަކުލީފެއް ދިވެހި ރައްޔިތުންނަށް، މިއަދު އަޅުގަނޑު ދަންނަވަން ބޭނުންވަނީ އެންމެ ކަމެއް. އަޅުގަނޑުމެންގެ އެކްޓިވިޓީ ކަލަންޑަރަށް އިތުރުކުރަންވީ މަގުމަތީގެ މުޒާހަރާތައް،" އޭނާ ވިދާޅުވިއެވެ.
އޭނާ ވިދާޅުވީ، މިއަދަށްވުރެ މާ ދަތި ހާލެއްގައި ގާނޫނު އަސާސީ ހޯދި މީހުން ވެސް ޑިމޮކްރެޓްސްގައި އެބަ ތިބި ކަމަށެވެ. އެހެންކަމުން މަގުމައްޗަށް ނުކުމެ ރައްޔިތުންގެ އަޑު ރައީސަށް އިއްވަން ޖެހިލުން ނުވާނެ ކަމަށް އޭނާ ވިދާޅުވިއެވެ.
އަދި ޑިމޮކްރެޓުން އޮތީ މި ސަރުކާރު ޖަވާބުދާރީ ކުރުވަން ކުރަންޖެހުނު ކޮންމެ ކަމެއް ކުރަން ތައްޔާރަށް ކަމަށް ޝިފާޒު ވިދާޅުވިއެވެ.