މި ސަރުކާރުން ވޭޕް ކުރުމާ ދެކޮޅަށް ގެންގުޅޭ ސިޔާސަތުތަކަށް ސިއްހީ ދާއިރާގެ ފަންނީ މުވައްޒަފުން އެއްބާރުލުން ދިނުމަށް ރައީސް ޑރ. މުޙައްމަދު މުޢިއްޒުގެ އަނބިކަނބަލުން ސާޖިދާ މުޙައްމަދު މިއަދު އެދިވަޑައިގެންފިއެވެ.
މި ސަރުކާރަށް އެއް އަހަރުވީއިރު ހެލްތު މިނިސްޓްރީގެ ސިވިލް ސާވިސް މުވައްޒަފުންގެ އަގު ވަޒަން ކުރުމަށް ބޭއްވި ރަސްމިއްޔާތެއްގައި ސާޖިދާ ވިދާޅުވީ، އާންމު ސިއްހަތުގެ ދުޅަހެޔޮކަމަށް ޓަކައި އަޅަން ޖެހޭ ކަމަށް ސިއްހީ ދާއިރާއިން ގަބޫލުކުރާ ބައެއް ފިޔަވަޅުތައް މި ސަރުކާރުން އަޅާ މަންޒަރު ފެންނަ ކަމަށެވެ.
"އެހެންވީމަ މި ކަމަށް އަޅުގަނޑުމެން ވަކި މުވައްޒަފުންގެ ހައިސިއްޔަތުން ވެސް ނުކުމެ މި ކަންތައްތައް ޕްރޮމޯޓްކޮށް، މި ކަންތައްތައް ކުރިއެރުވުމަށް އިތުރަށް ސަރުކާރަށް އެއްބާރުލުން ދިނުމަކީ ވަރަށް މުހިންމު ކަމެއް،" ސިއްހީ ދާއިރާގައި މަސައްކަތް ކުރައްވާތާ ގިނަ އަހަރުތަކެއް ވެފައިވާ ސާޖިދާ ވިދާޅުވިއެވެ.
ސާޖިދާ ވިދާޅުވީ ސިއްހީ ދާއިރާއިން ގިނަ ދުވަސްތަކެއް ވަންދެން ކުރަން ބޭނުންވެފައި އޮތް ކަންތައްތަކުގެ ތެރޭގައި ވޭޕްއާ ދެކޮޅަށް ފިޔަވަޅު އެޅުން ހިމެނޭ ކަމަށެވެ.
"މި ކަންކަމުގައި އަޅުގަނޑުމެން އެބަ ޖެހޭ ޓެކްނިކަލް މީހުންގެ ހައިސިއްޔަތުން ނުކުންނަން، މިއީ ސަރުކާރުގެ ޕޮލިސީއެއް ނޫން ހަމައެކަނި، މިއީ ޕަބްލިކް ހެލްތު އިންޓަވެންޝަންއެއް. މި އަންޓަވެންޝަންގައި އަޅުގަނޑުމެން އެއަށް ސަޕޯޓް ނުދިނިއްޔާ ދެން އެެހެން ފަރާތެއް ނޯންނާނެ،" އެ ކަމަނާ ވިދާޅުވިއެވެ.
ސާޖިދާ ވިދާޅުވީ އެފަދަ ކަންކަމުގައި އެންމެން އެކުގައި މަސައްކަތް ކުރަން ޖެހޭ ކަމަށެވެ. އެގޮތުން ސިޔާސަތުތައް ކަނޑައަޅާ ފަރާތްތަކާއި ސިވިލް ސާވިސް މުވައްޒަފުންނަކީ ވަކި ބަޔެއްގެ ގޮތުގައި ނުދެކި، އެންމެން އެކީގައި އެކަތިގަނޑަކަށް ވެގެން މަސައްކަތް ކުރަން އެ ކަމަނާ އިލްތިމާސްކުރެއްވިއެވެ.
އެ ރަސްމިއްޔާތުގައި ސާޖިދާ ވަނީ ހެލްތު މިނިސްޓްރީގެ ސިވިލް ސާވިސް މުވައްޒަފުންގެ މަސައްކަތުގެ އަގު ވަޒަންކުރައްވައި ދެއްވާ ޝުކުރުގެ ބެޖު ހަވާލުކޮށްދެއްވައިފައެވެ.
ރާއްޖޭގައި ވޭޕް މަނާކުރުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ބިލެއް ހުށަހަޅައި، މިމަހުގެ 12ގައި މަޖިލީހުން ވަނީ އެ ބިލް ފާސްކޮށްފައެވެ. އޭގެ ޖެހިގެން އައި ދުވަހު ރައީސް ޑރ. މުޙައްމަދު މުއިއްޒު ވަނީ ބިލް ތަސްދީގުކުރައްވައިފައެވެ.
އެ ބިލުގައިވާ ގޮތުން ރާއްޖެއަށް ވޭޕް އެތެރެކުރުން މިމަހުގެ 15ގައި ވަނީ މަނާކޮށްފައެވެ. އަދި ވޭޕް ވިއްކުމާއި ބޭނުންކުރުން އަންނަ މަހުގެ 15އިން ފެށިގެން މަނާވާނެއެވެ.
މީގެ އިތުރުން މި ސަރުކާރުން ދުންފަތާ ދެކޮޅަށް ކުރާ މަސައްކަތުގެ ތެރެއިން ސިނގިރޭޓުގެ އިމްޕޯޓު ޑިއުޓީ ވެސް ވަނީ ބޮޑުކޮށްފައެވެ. އެއާއެކު ސިނގިރޭޓު ފޮއްޓެއްގެ އަގު ވަނީ ވަރަށް ބޮޑަށް އުފުލިފައެވެ.