އިންޑިއާގެ ސެންޓްރަލް ބޯޑް އޮފް ފިލްމު ސެޓިފިކޭޝަން (ސީބީއެފްސީ)ގެ ހުއްދައާ އެކު ކަންގަނާގެ ފިލްމު "އިމަޖެންސީ" އަންނަ އަހަރުގެ ޖަނަވަރީ މަހު ރިލީޒްކުރާނެކަން އިއުލާނުކޮށްފިއެވެ.
މީގެ ކުރިން ހަތަރު ފަހަރެއްގެ މަތިން ފިލްމު ރިލީޒްކުރުން ފަސްވެފައިވާއިރު މި ފިލްމަށް ވަރަށް ގިނަ މައްސަލަތަކެއް ވަނީ ކުރިމަތިވެފައެވެ. މިދިޔަ ސެޕްޓެމްބަރު މަހު ފިލްމު "އިމަޖެންސީ" ރިލީޒްކުރާނެކަން އިއުލާނުކުރުމާ އެކު ފިލްމާ ދެކޮޅަށް ބަޔަކު މީހުން ވަނީ ކޯޓަށް މައްސަލަ ހުށަހަޅާފައެވެ. އެއާއެކު ސެންސަރު ބޯޑުގައި ފިލްމު ތާށިވެ، ރިލީޒްކުރުން ވަނީ ލަސްކުރަންޖެހިފައެވެ.
މި ފިލްމުގެ އާ ޕޯސްޓަރުތަކެއް ދައްކާލާފައިވާއިރު ފިލްމު ބެލުންތެރިންނާ ހަމައަށް ގެނެސްދޭން ނިންމާފައިވަނީ ޖަނަވަރީ މަހުގެ 17 ވަނަ ދުވަހުއެވެ. ކަންގަނާ ޕްރޮޑިއުސްކޮށް ޑައިރެކްޓަރެއްގެ ގޮތުގައި މަސައްކަތްކުރާ މި ފިލްމުގެ ލީޑް ބަތަލާއަކީ ވެސް ޚުދު ކަންގަނާއެވެ.
ފިލްމު "އިމަޖެންސީ"ގައި ބަތަލާ ކަންގަނާ--ފޮޓޯ/ފޭސްބުކް
ފިލްމު "އިމަޖެންސީ"އަކީ އިންޑިއާގެ ކުރީގެ ބޮޑުވަޒީރު އިންދިރާ ގާނދީގެ ވެރިކަމުގައި ސިޔާސީ މަސްރަހު ހޫނުވެ ޤައުމަށް އައި ހަލަބޮލިކަމުގެތެރޭ އިއުލާނުކުރި ކުއްލި ހާލަތު ބަޔާންކޮށް އެ ދުވަސްވަރަށް ބިނާކޮށް އުފައްދާފައިވާ ފިލްމެކެވެ. މި ބައޮގްރަފިކަލް ޕޮލިޓިކަލް ޑްރާމާއިން ކަންގާނާ ފެންނާނީ ބޮޑުވަޒީރު އިންދިރާ ގާނދީގެ ރޯލުންނެވެ.
ކަންގަނާގެ އިތުރުން ފިލްމުން ފެންނާނެ މުހިއްމު ތަރިންގެ ތެރޭ އެކްޓަރު އަނޫޕަމް ޚޭރު، ޝްރެޔަސް ތަލްޕަޅޭ، މިލިންދު ސޯނަމް، ވިޝާލް ނައިރް އަދި ކުރީގެ އެކްޓަރު ސަތިޝް ކޯޝިކް ހިމެނެއެވެ. މީގެ އިތުރުން ގިނަ ދުވަސްތަކަކަށް ފަހު ކުރީގެ މަޝްހޫރު ބަތަލާ މަހީމާ ޗައުދަރީ މި ފިލްމުން ފެންނާނެއެވެ.