ރާއްޖެއަށް ވޭޕް އެތެރެކުރުން މިރެއިން ފެށިގެން މަނާވެއްޖެއެވެ.
ރައީސް ޑރ. މުޙައްމަދު މުއިއްޒު މިދިޔަ ބުދަ ދުވަހު ވަނީ ވޭޕް އެތެރެކޮށް އޭގެ ވިޔަފާރި ކުރުމާއި އެ ބޭނުން ކުރުން މަނާކުރުމަށް ދުންފަތް ކޮންޓްރޯލް ކުރުމާ ބެހޭ ގާނޫނަށް އިސްލާހު ގެނައުމުގެ ބިލު، ތަސްދީގު ކުރައްވާފައެވެ.
ސަރުކާރުގެ ފަރާތުން ރައްޔިތުންގެ މަޖިލީހަށް އެ ބިލު ހުށަހެޅުއްވީ ހެންވޭރު އުތުރު ދާއިރާގެ މެންބަރު އަހުމަދު އައިފާނެވެ.
މިގޮތުން، މަޖިލީހުން އެ ބިލް ފާސްކޮށްފައި ވަނީ 54 މެންބަރުންގެ ވޯޓުންނެވެ. އެ ބިލާ ދެކޮޅަށް އެއްވެސް މެންބަރަކު ވޯޓު ނުދެއްވި ނަމަވެސް ވަކި ގޮތަކަށް ވޯޓު ދެއްވަން ބޭނުންނުވާކަމަށް އަށް މެންބަރަކު ވޯޓުދެއްވިއެވެ.
މިމަހުގެ ހަވަނަ ދުވަހު ބޭއްވި އިޖުތިމާއީ ކޮމިޓީގައި އެ ބިލަށް ވަނީ އިސްލާހުތަކެއް ވެސް ގެނެސްފައެވެ. އެ އިސްލާހުތަކުގެ ތެރޭގައި، އީ-ސިނގިރޭޓު އަދި ވޭޕް ކުރުމަށް ބޭނުންކުރާ އާލާތެއް ކުޑަކުއްޖަކަށް ވިއްކައިފި ނަމަ، އެ ފަރާތެއް 50،000 ރުފިޔާއިން ޖޫރިމަނާ ކުރުން ހިމެނެއެވެ.
އޭގެއިތުރުން، ގާނޫނާ ޚިލާފަށް އަމަލުކުރާ ފަރާތްތަކާމެދު ގާނޫނުގެ ދަށުން އެޅޭނެ ފިޔަވަޅުތައް އިތުރުކުރުމަށާއި އެ ނޫންވެސް ގާނޫނު ތަންފިޒުކުރުމުގައި ދިމާވާ ދަތިތައް ހައްލުކުރުމެވެ.
އެހެންވެ، ސަރުކާރުން ނިންމާފައިވާ ގޮތަށް މިރެއިން ފެށިގެން ވޭޕްކުރުމަށް ބޭނުންކުރާ ތަކެތި ރާއްޖޭގައި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރު ކުރުމާއި ހިލޭބެހުން މަނާވާނެއެވެ.
ދުންފަތުގެ އިސްތިއުމާލު ކުރުމާ ދެކޮޅަށް މި ސަރުކާރުން އަޅަމުންދާ ފިޔަވަޅުތަކުގެ ތެރެއިން އެކްސްޕޯޓް އިމްޕޯޓްގެ ގާނޫނަށް ބަދަލުގެނެސް، ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް ތިން ރުފިޔާއިން އަށް ރުފިޔާއަށް ވަނީ މަތިކޮށްފައެވެ. އެ ފިޔަވަޅުގެ ސަބަބުން ސިނގިރޭޓު ފޮއްޓެއްގެ އަގު ވަނީ ވަރަށް ބޮޑަށް އުފުލިފައެވެ.