މިދިޔަ އޮކްޓޯބަރު މަހު ޒަކާތު ފަންޑުން ބޭސްފަރުވާއަށް ފަސް ލައްކަ ރުފިޔާ ޚަރަދުކޮށްފައިވާއިރު އޭގެ 35.1 ޕަސެންޓު ހޭދަކުރީ ކެންސަރު ފަރުވާއަށް ކަމަށް ޒަކާތު ހައުސްގެ ތަފާސްހިސާބުތަކުން ދައްކައިފިއެވެ.
ޒަކާތު ހައުސްއިން އަންނަނީ ކޮންމެ މަހަކު ވެސް ޒަކާތު ފަންޑުން މިސްކީނުންނާއި ފަގީރުންގެ ބޭސްފަރުވާއަށް އެހީ ދެވުނު ޚަރަދުތަކުގެ ތަފުސީލުތައް ހާމަކުރަމުންނެވެ. މިގޮތުން، މިއަދު އާންމުކުރި މިދިޔަ މަހުގެ ހިސާބުތައް ދައްކާ ގޮތުން، ނިމުނު މަހު ވަނީ 124 މީހަކަށް އެހީ ދީފައެވެ.
އެ ފަރާތްތަކުގެ ބޭސްފަރުވާއަށް 529،702 ރުފިޔާ ޚަރަދުކުރިއިރު، އެންމެ ގިނައިން ޚަރަދުކުރި ކެންސަރު ބައްޔަށް ވަނީ 348،037.50 ރުފިޔާ ޚަރަދުކޮށްފައެވެ. ކެންސަރު ބަލީގެ އިތުރުން ވެސް ހަތަރު ބައްޔަކަށް މިދިޔަ މަހު ޒަކާތު ހައުސްގެ ފަންޑުން އެހީދީފައިވެއެވެ. މިގޮތުން، ކިޑްނީ ބަލިތަކަށް 80،569.50 ރުފިޔާ ޚަރަދުކޮށްފައިވެއެވެ.
އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު: މިދިޔަ މަހު ޒަކާތު ފަންޑުގެ 35 އިންސައްތަ ކެންސަރަށް، ޖުމްލަ އެހީއަށް ފަސް ލައްކަ ރުފިޔާ ޚަރަދުކުރި ---- ފޮޓޯ/ އިސްލާމިކް މިނިސްޓްރީީ
ތަފާސްހިސާބުތަކުން ދައްކާ ގޮތުގައި، ހިތުގެ އޮޕަރޭޝަންތަކާއި ސިކުނޑީގެ އޮޕަރޭޝަންތަކަށް ޒަކާތު ހައުސްއިން ޚަރަދުކުރީ އެއްވަރެކެވެ. އެއީ ޖުމްލަ 67،848 ރުފިޔާއެވެ.
މީގެއިތުރުން، ޓްރާންސްޕްލާންޓަށް 25،443 ރުފިޔާ ޚަރަދުކޮށްފައިވާއިރު، އެހެނިހެން ކަންކަމަށް 470،696 ރުފިޔާ ހޭދަކޮށްފައިވެއެވެ.
ޒަކާތު ހައުސްއިން ބުނި ގޮތުން، މިދިޔަ މަހު އެހެނިހެން ކަންކަމުގެ ގޮތުގައި ޚަރަދުކުރީ އިދާރީ މުވައްޒަފުންގެ އުޖޫރަ ދިނުމަށާއި ރާއްޖޭން ބޭރަށް ދަތުރުކުރުމަށެވެ. އޭގެތެރޭގައި އިދާރީ މުވައްޒަފުންގެ އުޖޫރައަށް ދެ ލައްކަ ރުފިޔާ ހޭދަކޮށްފައިވެއެވެ. އަދި، ރާއްޖޭން ބޭރަށް ކުރި ދަތުރުތަކަށް 92،363.04 ރުފިޔާ ޚަރަދުކޮށްފައިވެއެވެ.
ނިމުނު މަހު ކޮށްފައިވާ ޚަރަދުތަކުގެ ތެރޭގައި ސެޕްޓެންބަރުގެ މަހު އެހީ ހަމަޖެހުނު މީހުންގެ ޚަރަދުތައް ވެސް ހިމެނޭ ކަމަށް ޒަކާތު ހައުސްއިން ބުނެއެވެ.