ހެނދުނުން ފެށިގެން މާލެއަށް ބޯކޮށް ވެހެމުން އަންނަ ވާރޭގައި މަގުތަކުގައި ވަރަށް ބޮޑަށް ފެންބޮޑުވެއްޖެއެވެ.
ހުއްޓާނުލާ މާލެއަށް ހެނދުނުން ފެށިގެން ވާރޭ ވެހެމުން އަންނައިރު، އާންމުކޮށް ފެންބޮޑުވާ ބޮޑެތި މަގުތަކުގައި ވަނީ ފެންބޮޑުވެފައެވެ. އޭގެތެރޭގައި މަޖީދީމަގާއި އަމީނީމަގުފަދަ ބާރުބޮޑު ސަރަހައްދުތައް ވެސް ހިމެނެއެވެ.
އެހެންވެ، މަގުތަކުން ފެން ހިންދުމަށް އެމްއެންޑީއެފް ފަޔާ އެންޑް ރެސްކިޔު ސާވިސްގެ ފަޔާ ފައިޓަރުން އަންނަނީ މަގުތަކުގައި ހަރަކާތްތެރި ވަމުންނެވެ.
މި ވިއްސާރަ އާ ގުޅޭގޮތުން މޫސުމާ ބެހޭ ގައުމީ އިދާރާގެ އޮފިޝަލަކު 'ސަން'އަށް ވިދާޅުވީ، މި ދުވަސްވަރަކީ ދެ މޫސުން ބެދޭ ދުވަަސްވަރު ކަމަށާއި އެހެންވެ، އެކަމުގެ ސަބަބުން ވިއްސާރަ ކުރާނެ ކަމަށެވެ.
އެގޮތުން، ކުރިއަށް އޮތް ތިން ދުވަހު ވެސް ރާއްޖޭގެ އެކި ސަރަހައްދުތަކަށް ވިއްސާރަ ކުރާނެ ކަމަށް އޮފިޝަލް ވިދާޅުވިއެވެ.
ބޯކޮށް ވާރޭވެހި، ގުގުރާނެ ކަމަށް ލަފާކޮށް، މެޓުން ވަނީ ހެނދުނު 08:50 އިން މެންދުރު 13:00އަށް ބ އަތޮޅުން ފެށިގެން ވ އަތޮޅަށް ރީނދޫ ސަމާލު ވެސް ނެރެފައެވެ. އަދި، ހެނދުނު 10:00 އިން ފެށިގެން 13:30އާ ހަމައަށް ވ އަތޮޅުން ފެށިގެން އައްޑޫ ސިޓީއާ ހަމައަށް ވަނީ ހުދު ސަމާލު ވެސް ނެރެފައެވެ.