މިވަގުތަށް ރާއްޖޭގެ ވައި ސާފުވެއްޖެ ކަމަށާއި ނަމަވެސް، ކުރިއަށް އޮތް ދުވަސްތަކުގައި އިތުރަށް ވައި ނުސާފުވުން އެކަށީގެންވާ ކަމަށް މޫސުމާ ބެހޭ ގައުމީ އިދާރާ، މެޓް އޮފީހުން ބުނެފިއެވެ.
ވޭތުވެދިޔަ ދެތިން ދުވަހު ރާއްޖޭގެ އުތުރާއި ދެކުނަށް ވަނީ ވައި ނުސާފުވެފައެވެ. އޭރު މެޓުން ބުނީ ވައި ނުސާފުވީ މި ސަރަހައްދުގައި އުފެދުން ކޮޅިގަނޑެއްގެ ސަބަބުން ކަމަށެވެ.
މިކަމާ ގުޅިގެން "ސަން"އަށް މައުލޫމާތު ދެއްވަމުން މެޓް އޮފީހުގެ އޮފިޝަލަކު ވިދާޅުވީ އިރުވައި މޫސުމާ ދިމާކޮށް އާންމުގޮތެއްގައި ރާއްޖޭގެ ވައި ނުސާފު ވާކަމަށެވެ. ނަމަވެސް މިއަހަރުގެ އިރުވައި މޫސުން ފެށުންކަން އަދި މެޓުން އިއުލާނު ކޮށްފައި ނުވާކަން އޭނާ ފާހަގަކުރެއްވިއެވެ.
އިރުވައި މޫސުން ފެށުމާއެކު އަނެއްކާ ވެސް ވައި ނުސާފުވާނެ ކަމަށް އޭނާ ވަނީ ލަފާކޮށްފައެވެ.
"އުތުރާ މެދުރާއްޖެތެރޭގެ އެކި ހިސާބުތަކަށް އެކި ވަރަށް ނުސާފުވާނީ. އެކަމަކު ވައި ނުސާފުވުން އާންމުކޮށް ދެމިގެން ދޭ ޑިސެމްބަރުން ފެށިގެން ގާތްގަނޑަކަށް މާޗު މަހާ ހަމައަށް،" އޭނަ ވިދާޅުވިއެވެ.
މޫސުން ބަދަލުވެ ވައި ޖެހޭ މިސްރާބު ބަދަލުވުމުގެ ސަބަބުން ރާއްޖޭގެ ވައި ނުސާފު ވަނީ، އިންޑިއާގައި އުފެދޭ ހިރަފުހާއި ކުނޑިތައް ވަޔާއެކު ރާއްޖެއަށް އައުމުގެ ސަބަބުންނެވެ.
ރާއްޖޭގެ ވައި އާންމުކޮށް ނުސާފުވަނީ "ހޭޒް"ގެ ސަބަބުންނެވެ.
"ފޮގް ވުން" އަދި "މިސްޓް" އާ ޚިލާފަށް ހޭޒް އަކީ ވައިގެ ތެރޭގައި ހުންނަ ވަރަށް ކުދި ހިކި ޕާޓިކަލް ތަކެކެވެ. އެއީ ދުންފިންޏެއް ނޫނެވެ. ހަމަ ލޮލަށް ނުފެނުނު ކަމުގައި ވީނަމަވެސް، މި ޕާޓިކަލްތަކުގެ ސަބަބުން ޖައްވު ނުސާފުވެ ދުރު ފެންނަ މިންވަރު ދަށްވެއެވެ.