މީގެކުރިންވެސް އެކީގައި ބައެއް ފިލްމުތަކުން ފެނިފައިވާ ބޮލީވުޑްގެ ދެ އެކްޓަރުން ކަމަށްވާ އަޖޭ ދޭވްގަން އާއި އަކްޝޭ ކުމާރު އަނެއްކާވެސް އެކީގައި ފިލްމެއްގެ މަސައްކަތް ކުރަމުން އަންނަކަން އިއުލާނުކޮށްފިއެވެ.
މީގެކުރިން ދެ ތަރިން އެކީގައި ސްކްރީން ހިއްސާކުރި ނަމަވެސް މިފަހަރުގެ ފިލްމުގައި އަޖޭ އިށީންނަނީ ޑައިރެކްޓަރުގެ ގޮނޑީގައެވެ. ދާދިފަހުން ބޭއްވުނު ހިންދުސްތާނު ޓައިމްސް ލީޑަޝިޕް ސަމިޓް 2024ގައި އަޖޭ ވަނީ ކުރިއަށްހުރި ފިލްމުތަކާ ބެހޭގޮތުން މީޑިއާއަށް މައުލޫމާތުދީފައެވެ.
އަޖޭ ބުނިގޮތުގައި މިހާރު މަސައްކަތް ފަށާފައިވާ ފިލްމުގެ ލީޑް ރޯލަކީ އަކްޝޭއެވެ. އެ ފިލްމާބެހޭ މައުލޫމާތު ވަރަށް އަވަހަށް ބެލުންތެރިންނާ ހިއްސާކުރާނެ ކަމަށްވެސް ކާމިޔާބު ފިލްމުތައް ޑައިރެކްޓްކޮށްފައިވާ އަޖޭ ވަނީ ބުނެފައެވެ.
ހިންދުސްތާނު ޓައިމްސް ލީޑަޝިޕް ސަމިޓް 2024ގައި އަޖޭ އާއި އަކްޝޭ ބައިވެރިވަނީ--ފޮޓޯ/ހިންދުސްތާން ޓައިމްސް
ދެ އެކްޓަރުން އެކީގައި ބައިވެރިވި މި ސަމިޓުގައި އަކްޝޭ ވަނީ ބެލުންތެރިން އެންމެ ބޮޑަށް އިންތިޒާރުކުރާ އޭނާގެ ފިލްމު "ހެރާ ޕެރީ 3"އާ ބެހޭގޮތުން ވެސް ވާހަކަ ދައްކާފައެވެ. އެގޮތުން އަންނަ އަހަރުގެ އެ ފިލްމުގެ މަސައްކަތް ފަށަން ތައްޔާރުވަމުން އަންނަކަމަށް އަކްޝޭ ވަނީ ބުނެފައެވެ.
އަޖޭ އެންމެފަހުން ޑައިރެކްޓްކުރި ފިލްމަކީ މިދިޔަ އަހަރު ރިލީޒްކުރި ފިލްމު "ބޯލާ"އެވެ. ޑައިރެކްޓަރެއްގެ ގޮތުގައި އަޖޭ އެންމެ ފުރަތަމަ ބެލުންތެރިންނަށް ގެނެސްދިން ފިލްމަކީ 2008 ވަނަ އަހަރު ރިލީޒްކުރި ފިލްމު "ޔޫ މީ އޯރް ހަމް"އެވެ.
އޭގެ ފަހުން ފިލްމު "ޝިވާއޭ" އަދި "ރަންވޭ 34" އަޖޭ ޑައިރެކްޓްކުރިއިރު މި ހުރިހާ ފިލްމެއްގެ ވެސް ލީޑް ރޯލަކީ ވެސް އޭނާއެވެ.
އަޖޭ އާއި އަކްޝޭ ފިލްމު އިންޑަސްޓްރީއަށް ތައާރަފްވެފައި ވަނީ ވެސް އެއް ދުވަސްވަރެއްގައެވެ. ނަމަވެސް މިހާތަނަށް ވެސް ދެ މީހުންނަކީ ވެސް ވަރަށް ގާތް ގުޅުމެއް އޮންނަ އެއްވެސް ވަރަކަށް ވާދަވެރިކަމެއް ދެމެދުގައި އޮތް އެކްޓަރުންނެއް ނޫނެވެ.
އަކްޝޭ އެންމެ ފަހުން އަޖޭއާ އެކު ފެނިފައި ވަނީ މި މަހުގެ 1 ވަނަ ދުވަހު ރިލީޒްކުރި އަޖޭގެ ފިލްމު "ސިންގްހަމް އަގެއިން"އިންނެވެ.