އަންނަ އަހަރުގެ ރަމަޟާންމަހު ކޮންމެ ގޭބިސީއަކަށް ކާޑުގެ ބާވަތްތަކުގެ ބަދަލުގައި މަސްދަޅުކޭހެއް ހަދިޔާކުރުމަށް ނިންމަވާފައިވާ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ރައީސް މިކަން ހާމަ ކުރެއްވީ ސަރުކާރަށް އަހަރެއް ފުރުން ފާހަގަކުރުމަށް މިރޭ ސޯޝަލް ސެންޓަރުގައި ބޭއްވި ރަސްމިއްޔާތުގައު ވާހަކަ ދައްކަވަމުންނެވެ.
ރައީސް ވިދާޅުވި ގޮތުގައި ކުރިޔަށް އޮތް ރަމަޟާންމަހުގައި ކޮންމެ ގޭބިސީއަކަށް މަސްދަޅުކޭހެއް ދިނުމަށް އެ މަނިކުފާނު ވަނީ އެސްޓީއޯގެ އެމްޑީއަށް ދަންނަވައިފައެވެ.
މިދިޔަ ރަމަޟާންމަހުގެ ތެރޭގައި ސަރުކާރުން ވަނީ ކަރަންޓާއި ފެން ބިލުތަކުން ރައްޔިތުންނަށް ޑިސްކައުންޓެއް ދީފައެވެ. ރައީސް މިރޭ ހާމަކުރެއްވި މައުލޫމާތުގައިވާ ގޮތުން އެއީ ޖުމްލަ 142 މިލިއަން ރުފިޔާގެ ޑިސްކައުންޓެކެވެ.
މީގެ އިތުރުން 82،000 ގޭބިސީއަކަށް 1.6 މިލިއަން ކިލޯގެ ކާޑުގެ ބާވަތްތައް ވެސް ސަރުކާރުން މިދިޔަ ރޯދަމަހާ ދިމާކޮށް ވަނީ ހިލޭ ފޯރުކޮށްދީފައެވެ.