މިނިސްޓްރީ އޮފް ހަޔާ އެޑިއުކޭޝަން ލޭބާ އެންޑް ސްކިލްސް ޑިވެލޮޕްމަންޓް އިން އިންތިޒާމް ކޮށްގެން މިދިޔަ ހުކުރު އަދި ހޮނިހިރު ދުވަހު ކުރިއަށް ގެންދިޔަ "ދާލަން ކެރިއާ އެކްސްޕޯ 2024" ގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ސްޓޯލަށް ބޮޑުތަރުހީބެއް ލިބިފައި ވާކަމަށް އެެ ކުންފުނިން ބުނެފިއެވެ.
ހުޅުމާލެ، ސެންޓްރަލް ޕާކުގައި ކުރިއަށް ގެންދިޔަ މި އެކްސްޕޯގައި އެމްއޭސީއެލްގެ ސްޓޯލަށް ޖުމްލަ 3،377 މީހުން ވަނީ ޒިޔާރަތްކޮށްފައެވެ. އަދި އޭގެ ތެރެއިން 600 މީހުން ވަޒީފާއަށް އެދި ފޯމު ފުރިހަމަކޮށްފައިވާއިރު، 103 މީހަކު އިންޓާންޝިޕް ފުރުސަތުގައި ބައިވެރިވުމަށް އެދި ފޯމު ފުރިހަމަ ކޮށްފައި ވާކަމަށް އޭމްއޭސީއެލްއިން ބުނެއެވެ.
މިއެކްސްޕޯގައި އެމްއޭސީއެލްގެ ފަރާތުން ވަނީ އެ ކުންފުނީގެ 20 ޑިޕާޓްމަންޓަކުން ބައިވެރިވެ، ވެލާނާ އިންޓަނޭޝަނަލް އެއާޕޯޓުގެ އޮޕަރޭޝަންސް ކުރިއަށްދާ ގޮތާއި، ކުރެވޭ މުހިއްމު މަސައްކަތްތައް އެކްސްޕޯގެ ބައިވެރީންނަށް ދައްކާލާފައެވެ.
އެގޮތުން އެމްއޭސީއެލްގެ ވަޒީފާއަށް ކުރިމަތިލި މީހުންގެ ތެރެއިން ހަތަރު މީހަކަށް ފެއާގެ ތެރެއިން ވަނީ ވަޒީފާގެ ލިޔުން ހަވާލުކޮށްފައެވެ. މިފަރާތްތަކަށް ވަޒީފާގެ ލިޔުން ހަވާލުކޮށްދެއްވީ އެމްއޭސީއެލް ގެ ޑެޕިއުޓީ މެނޭޖިން ޑިރެކްޓަރު މުޖުތަބާ ލަތީފްއެވެ.
އަދި ބާކީ ހުރި އެޕްލިކޭޝަންތައް ވެސް ޕްރޮސެސް ކުރުމަށްފަހު އިތުރު މީހުންނަށް ވަޒީފާގެ ފުރުސަތު ތަނަވަސް ވާނެ ކަމަށް އެމްއޭސީއެލްއިން ބުނެއެވެ. މީގެ އިތުރުން ސްޓޯލަށް ޒިޔާރަތްކޮށް ރެޖިސްޓާ ކުރި މީހުންގެ މެދުގައި ނެގި ގުރުއަތުން ހޮވުނު ފަސް މީހަކަށް ލެޕްޓޮޕް އަދި 10 މީހަކަށް އެހެނިހެން ހަދިޔާތައް އެމްއޭސީއެލްއިން ވަނީ ދީފައެވެ.
މިނިސްޓްރީ އޮފް ހަޔާ އެޑިއުކޭޝަން، ލޭބާ، އެންޑް ސްކިލްސް ޑިވެލޮޕްމަންޓްއިން އިންތިޒާމުކޮށްގެން ކުރިއަށް ގެންދިޔަ "ދާލަން ކެރިއާ އެކްސްޕޯ 2024"ގެ މައިގަނޑު މަޤުޞަދަކީ ވަޒީފާ ހޯދާ ފަރާތްތަކާއި ވަޒީފާދޭ ފަރާތްތަކުގެ ގުޅުވައި ދިނުމެވެ.
އެމްއޭސީއެލްއިން ބުނީ މި އެކްސްޕޯގައި އެ ކުންފުނިން ބައިވެރިވެފައިވަނީ ރާއްޖޭގެ އިގުތިސާދާއި، ކުރިއަރަމުން އަންނަ އޭވިއޭޝަން ދާއިރާގައި ޒުވާނުންނަށް ހުޅުވިފައިވާ ވަޒީފާގެ ފުރުސަތުތައް ދައްކުވައިދިނުމުގެ މަގުސަދުގައި ކަމަށެވެ.