މޮބައިލް ފޯނުތަކަކާއި، އެނޫންވެސް އިލެކްޓްރޯނިކް ސާމާނުތަކެއް ވަގަށް ނެގި މައްސަލައިގައި ދެމީހުން ހައްޔަރުކޮށް، އެ ދެމީހުންގެ ބަންދަށް 15 ދުވަސް ޖަހާފައިވާ ކަމަށް ފުލުހުން މިއަދު ބުނެފިއެވެ.
މި މައްސަލައިގެ ތުހުމަތުގައި ހައްޔަރުކޮށްފައިވަނީ ހ. ސަމާގްރީންގެ، މާލެ، އިބްރާހީމް ޒަކަރިއްޔާ، 33، އާއި ކުރިބޯށިގެ، ސ. ހިތަދޫ، މުހައްމަދު ޒަރީރު، 36 އެކެވެ.
މިކަމާ ގުޅިގެން މީޑިއާތަކާ ހިއްސާކުރި މެސެޖެއްގައި ފުލުހުން ބުނީ ހެންވޭރު ގެއަކުން ވައްކަން ކުރި މައްސަލައެއް ނޮވެމްބަރު މަހުގެ 14 ވަނަ ދުވަހު ރިޕޯޓުކޮށްފައިވާ ކަމަށެވެ.
ފުލުހުން ބުނި ގޮތުގައި އެ ދެ މީހުން ވަގަށް ނަގާފައިވާ ކަމަށް ތުހުމަތުކުރެވޭ އިލެކްޓްރޯނިކް ބައެއް ތަކެތި ގެއެއްގެ ތެރޭގައި ފޮރުވާފައިހުއްޓައި، ފުލުހުން އެ ތަކެތި ވަނީ ހޯދާފައެވެ. އަދި ހޯދި ތަކެތީގެ ތެރޭގައި ލެޕްޓޮޕްތަކަކާއި، ޓެބްލެޓްތަކަކާއި، މޮބައިލް ފޯނުތަކެއްގެ އިތުރުން އެހެނިހެން ތަކެތި ހިމެނޭ ކަމަށް ފުލުހުން މައުލޫމާތުދިނެވެ.
މި މައްސަލައާ ގުޅިގެން ހައްޔަރުކުރި ދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް ވަނީ އަމުރުކޮށްފައި ކަމަށް ފުލުހުން ބުންޏެވެ.
އޭގެތެރެއިން އިބްރާހީމް ޒަކަރިއްޔާ ކޯޓަށް ހާޒިރުކޮށްފައި ވަނީ އިއްޔެ ކަމަށާއި މުހައްމަދު ޒަރީރު ހާޒިރުކޮށްފައި ވަނީ މިއަދު ކަމަށް ފުލުހުން ބުންޏެވެ.
ފުލުހުން ބުނީ މި މައްސަލަ ފުލުހުން އަދިވެސް ގެންދަނީ ތަހުގީގުކުރަމުން ކަމަށެވެ.
މީގެ ކުރިން ވެސް ގޭގެއަށް ވަދެ ވައްކަންކުރާ މައްސަލަތަކުގައި މީހުން ހައްޔަރުކޮށް ވަގަށް ނެގި ތަކެތި ފުލުހުން ހޯދާފައި އެބަހުއްޓެވެ. މިފަހުން ހުކުރު ދުވަހު ވެސް ހުޅުމާލެ އަމީން އެވެނިއު އެޕާޓްމަންޓަކަށް ބަޔަކު ވަދެ، ތަކެއްޗަށް ގެއްލުންދިން މައްސަލައެއް ފެންމަތިވެފައިވެއެވެ.