ފިލިޕީންސްގެ ކެޓަންޑޫއަންސްގެ އިރުމަތީ އައްސޭރިފަށަށް ސުޕަ ތޫފާން މަން-ޔީ އެރުމާ ގުޅިގެން ބައި މިލިއަނަށް ވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފިއެވެ.
އެ ތޫފާނުގައި ވައިޖެހެނީ ގަޑިއަކު 160 މޭލު (ގަޑިއަކު 260 ކިލޯމީޓަރަށް) ކަމުން މަން-ޔީއަކީ ކެޓަގަރީ 5ގެ ތޫފާނެއް ކަމުގައި ވަނީ ކަނޑައަޅައިފައެވެ.
ރޮއިޓާސްއިން ރިޕޯޓްކޮށްފައިވާ ގޮތުގައި އެގައުމުގެ ބިކޯލް ސަރަހައްދުގެ ފަސް ލައްކައަށް ވުރެ ގިނަ މީހުން ވަނީ ވަނީ އެ ސަރަހައްދުތަކުން ނެރެފައެވެ. އެ އަދަދު އިތުރުވާނެ ކަމަށް ވަނީ ބެލެވިފައެވެ.
މީގެ އިތުރުން އެގައުމުގެ އުތުރު ސަމާރު ޕްރޮވިންސުން 26،000 މީހުން ހުކުރު އަދި ހޮނިހިރު ދުވަހު އެހެން ސަރަހައްދުތަކަށް ބަދަލުކޮށްފައިވާ ކަމަށް އެ ގައުމުގެ ސަރުކާރުން ހިންގާ ފިލިޕީންސް ނިއުސް އެޖެންސީ (ޕީއެންއޭ)އިން ބުނެއެވެ.
ޕީއެންއޭއިން ރިޕޯޓްކޮށްފައިވާ ގޮތުގައި އިރުމަތީ ސަމާރު ޕްރޮވިންސުން އިތުރު 18،000 މީހުން ކުރިން ނެރެފައިވާއިރު، އިރުމަތީ ސަމާރުގެ އާޓޭޗޭ ޑިސްޓްރިކްޓް ހޮސްޕިޓަލުގެ ބަލިމީހުންނާއި މުވައްޒަފުން ވަނީ އެ ސަރަހައްދުގެ މުނިސިޕަލް ހޯލަށް ބަދަލުކޮށްފައެވެ.
މަން-ޔީގެ ބާރުގަދަވެ، ހުކުރު ދުވަހުގެ ކުރީކޮޅު ޓްރޮޕިކަލް ތޫފާނެއްގެ އޮވެފައި، ހޮނިހިރު ދުވަހުގެ ކުރީކޮޅު ވަނީ ސުޕަ ތޫފާނަކަށް ބަދަލުވެފައެވެ.
ފިލިޕީންސްގެ މޫސުމާބެހޭ އިދާރާ، ޕަގަސާއިން ވަނީ ކެޓަންޑޫއަންސް ސަރަހައްދަށް ސިގްނަލް 5 ގެ އިންޒާރު ދީފައެވެ. މިއީ ތޫފާންގެ ސަބަބުން ނުރައްކާތެރިކަމުގެ އިންޒާރު ނެރޭ އެންމެ މަތީ ލެވެލްއެވެ.
ތޫފާންގެ ކުރިން ފިލިޕީންސްގެ ބައެއް ސަރަހައްދުތަކުގައި ވަނީ ސްކޫލްތައް ބަންދުކޮށް، ކަނޑުދަތުރުފަތުރު ކުރުން ހުއްޓާލައިފައެވެ. އަދި ބައެއް ވައިގެ ދަތުރުތައްވެސް ވަނީ ކެންސަލްކޮށްފައެވެ. ސަރުކާރުގެ އިދާރާތަކުން ވަނީ ރައްޔިތުންނަށް ރައްކާތެރިކަމުގެ ފިޔަވަޅުތައް އެޅުމަށް އިރުޝާދު ދީފައެވެ.
ތޫފާން މަން-ޔީގެ ސަބަބުން ފިލިޕީންސްގެ އިގްތިސާދަށް ވެސް ބޮޑެތި ގެއްލުންތަކެއް ލިބިދާނެ ކަމަށް ބެލެވެއެވެ. ޚާއްސަކޮށް ދަނޑުވެރިކަމާއި މަސްވެރިކަމުގެ ދާއިރާއަށް މީގެ ސަބަބުން ނޭދެވޭ އަސަރުތަކެއް ކުރާނެ ކަމަށް ލަފާކޮށްފައިވެއެވެ. އެހެންކަމުން، ސަރުކާރުން ވަނީ މި ދާއިރާތަކަށް ލިބިދާނެ ގެއްލުން ކުޑަކުރުމަށްޓަކައި ޚާއްޞަ ފިޔަވަޅުތަކެއް އަޅަން ފަށާފައެވެ.
މަން-ޔީ އަކީ ފާއިތުވި ދެ ހަފުތާއެއްހާ ދުވަހުގެ ތެރޭގައި ފިލިޕީންސްއަށް އަރާ ހަތަރު ވަނަ ތޫފާނަށެވެ. ކުރީގެ ތިން ތޫފާނާ ޚިލާފަށް މަން-ޔީ ދަތުރުކުރަމުންދަނީ ޕިލިޕީންސްގެ ދެކުނަށް ކަމުން އޭގެ އަސަރު ވަރަށް ގިނަ ބަޔަކަށް ކުރާނެ ކަމަށް މަޝްރަހު ދިރާސާކުރާ ފަރާތްތަކުން ބުނެއެވެ.
ކޮންމެ އަހަރަކު ވެސް ފިލިޕީންސްއަށް 20 އާ ގާތްކުރާ އަދަދަކަށް ޓްރޮޕިކަލް ސައިކްލޯން އަރައެވެ. މިފަދަ ކާރިސާތަކުގެ ސަބަބުން ގިނަ އަދަދެއްގެ މީހުންގެ ފުރާނަ ގެއްލި، ގިނަ އަދަދެއްގެ މުދަލަށް ގެއްލުންވެއެވެ.