އަލަށް ތައާރަފު ކުރާ ޚިދުމަތްތަކާއެކު ހުޅުމާލޭ ހޮސްޕިޓަލް ޓާޝަރީ ފެންވަރުގައި ރަސްމީކޮށް މިއަދު ހުޅުވައިފިއެވެ.
މި ކަމަށް ޓަކައި ބޭއްވި ޚާއްސަ ރަސްމިއްޔާތުގައި ހުޅުމާލޭ ހޮސްޕިޓަލް ޓާޝަރީ ފެންވަރުގައި ރަސްމީކޮށް ހުޅުއްވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
ޓާޝަރީ ފެންވަރުގައި ހުޅުމާލޭ ހޮސްޕިޓަލް ހުޅުވިއިރު، އަލަށް ތައާރަފު ކުރި ޚިދުމަތްތަކުގެ ތެރޭގައި ޚާއްސަ އޮޕަރޭޝަން ތިއޭޓާ ކޮމްޕްލެކްސްއެއް ހިމެނެއެވެ. އެ ކޮމްޕްލެކްސް ތަރައްގީކޮށްފައިވަނީ ހަތަރު އޮޕަރޭޝަން ތިއޭޓަރާ އެކުގައެވެ. އެއީ ކަށީގެ ބަލިތަކާއި ލޮލުގެ ބަލިތަކާއި އަންހެނުންނަށް ޚާއްސަ އަދި އާންމު ބަލިތަކަށް ޚާއްސަ އޮޕަރޭޝަން ތިއޭޓަރެކެވެ. މީގެ ކުރިން އެ ހޮސްޕިޓަލުގައި ހުންނަނީ އެންމެ އޮޕަރޭޝަން ތިއޭޓަރެކެވެ.
ހަމައެއާއެކު މިއަދު ހުޅުމާލޭ ހޮސްޕިޓަލުގައިވަނީ އިތުރު 10 އެނދާއެކު އައިސީޔޫގެ ޚިދުމަތް ވެސް ތައާރަފު ކޮށްފައެވެ. މި ޚިދުމަތް ތައާރަފުކޮށްފައިވަނީ އެންމެ ފަހުގެ ޒަމާނީ ވަސީލަތްތަކާއި ޓެކްލޮނޮޖީއާއެކު، 24 ގަޑިއިރު ޚިދުމަތް ދެވޭނެ ގޮތަށެވެ.
މީގެ އިތުރުން ވިހެއުމުގެ ތެރޭގައި ދިމާވާ ކްރިޓިކަލް ހާލަތްތަކުގައި ފަރުވާދިނުމަށް، ނިއޯނޭޓަލް އިންޓެންސިވް ކެއާ ޔުނިޓު (އެންއައިސީޔޫ)ގެ ޚިދުމަތް ވަނީ 14 އެނދާ އެކު ތައާރަފުކޮށްފައެވެ.
މީގެ އިތުރުން ވެސް މި ހޮސްޕިޓަލުގައި ސީއެސްއެސްޑީ ފަދަ ޑިމާޓްމެންޓްތައް ގާއިމްކޮށް، އައު ޚިދުމަތްތައް ވަނީ ތައާރަފުކޮށްފައެވެ.
މީގެ ކުރިން ހުޅުމާލޭ ހޮސްޕިޓަލަށް އިމަޖެންސީކޮށް ގެނެވޭ ބަލިމީހުންނަށް ފޯރުކޮށްދެވެނީ ކުދިފަރުވާތަކެވެ. އެހެން ކަމުން އިތުރު ފަރުވާއަށް ބަލިމީހާ ފޮނުވައިލަންޖެހެނީ އެހެން ހޮސްޕިޓަލަކަށެވެ. އެހެން ނަމަވެސް މިއަދު ތައަރާފު ކުރި ޚިދުމަތްތަކާއެކު ހުޅުމާލޭ ހޮސްޕިޓަލުގައި އިމަޖެންސީ ފަރުވާގެ ޚިދުމަތްތައް ވެސް ދެވޭނެއެވެ.
މީގެ ކުރިން އެ ހޮސްޕިޓަލް ހުރީ ލެވެލް ދޭއްގެ ހޮސްޕިޓަލެއްގެ ގޮތުގައެވެ. އެހެން ނަމަވެސް މިއަދުން ފެށިގެން އެ ހޮސްޕިޓަލުން ޓާޝަރީ ފެންވަރުގައި ޚިދުމަތްތައް ލިބޭނެއެވެ.