"އުރީދޫ ފަން ރަން 2024"ގައި ރަޖިސްޓާވުމުގެ ސުންގަޑި ހަމަވާން ކުޑަތަންވެއްޖެއެވެ.
އުރީދޫއިން ބުނީ އަންނަ ޑިސެމްބަރު މަހުގެ 20 ވަނަ ދުވަހު ބާއްވާ އުރީދޫ ފަން ރަންގައި ހަ އަހަރުން މަތީގެ އެންމެންނަށް ވެސް ބައިވެރިވެވޭނެ ކަަމަށެވެ. އަދި މި ދުވުމަކީ ފަސް ކިލޯމީޓަރުގެ ދުވުމެއް ކަމަށް އުރީދޫއިން ބުނެއެވެ.
އުރީދޫއިން ބުނީ ފަން ރަންގެ ކިޓްތައް ލިބެން ހުންނާނީ ދެ ކެޓަގަރީއަކުން ކަމަށެވެ. އެއީ ސްޓޭންޑަޑް ކިޓް އާއި ފަން ކިޓް ކެޓަގަރީއެވެ. އެގޮތުން، ސްޓޭންޑަޑް ކިޓްގައި ހިމެނެނީ ފަން ރަން ޓީޝާޓާއި ރިސްޓްބޭންޑެކެވެ. މި ކިޓްގެ އަގަކީ 100 ރުފިޔާ ކަމަށް އުރީދޫން ބުނެފައިވެއެވެ.
މީގެ އިތުރުން ފަން ކިޓްގައި އުރީދޫ ފަން ރަން ޓީޝާޓްގެ އިތުރުން ރިސްޓްބޭންޑަކާއި ފޮތި ދަބަސް، އައިނު އަދި ބަންޑާނާ ހިމެނޭއިރު މި ކިޓްގެ އަގަކީ 210 ރުފިޔާއެވެ.
އުރީދޫއިން ބޭއްވި ކަލާ ރަންގެ ތެރެއިން --- ސަން ފޮޓޯ: އަހްމަދު އަވްޝަން އިލްޔާސް
އުރީދޫއިން ބުނީ ފަން ރަންގެ އަމާޒަކީ، ދުޅަހެޔޮ ދިރިއުޅުމަކަށް ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައިދިނުން ކަމަށެވެ. މި ހަރަކާތުގ ތެރެއިން ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ސްޓޭޝަންތަކުގައި، ކުލައިގެ އިތުރުން ފެން އަދި މަޖާ ހަރަކާތްތަކެއް ކުރިއަށްގެންދާނެއެވެ.
މިއީ ވަކި ވަގުތެއްގެ ތެރޭގައި ނިންމަން ޖެހޭ ދުވުމަކަށް ނުވާތީ، ހިނގާފައާއި ޖޮގްކޮށްފައާއި ދުވެފައި ނުވަތަ ނަށަމުންވެސް މި ދުވުން ނިންމިދާނެ ކަމަށް އުރީދޫއިން ވަނީ ބުނެފައިވެއެވެ.
އުރީދޫ ފަން ރަން އަކީ ކޮންމެ އަހަރަކު އުރީދޫއިން ބާއްވަމުންދާ ހަރަކާތްތަކުގެ ތެރެއިން އާއްމުންގެ މެދުގައި އެންމެ މަގުބޫލު އެއް ހަރަކާތެވެ. މިދިޔަ އަހަރު ހުޅުމާލޭގައި ކުރިއަށް ގެންދިޔަ މި ހަރަކާތްތަކުގައިވެސް 5،000 އަށްވުރެ ގިނަ މީހުން ވަނީ ބައިވެރިވެފައެވެ.