އިސްރާއީލުން ފަލަސްތީނުގެ ޣައްޒާގައި ކުރަމުންދާ އަނިޔާވެރި ހަނގުރާމަ ހުއްޓާލުމަށް ކުރާ މަޝްވަރާތަކުގައި ލުބުނާނުން ނިންމާ ކޮންމެ ނިންމުމަކަށް އީރާނުން ތާއީދުކުރާނެ ކަމަށް އީރާނުގެ އިސް އޮފިޝަލަކު ހުކުރު ދުވަހު ވިދާޅުވެއްޖެއެވެ.
މަޝްރަހު ދިރާސާކުރާ ފަރާތްތަކުން ބުނާ ގޮތުގައި އެއީ އިސްރާއީލާއި ލުބުނާނާ ދެމެދު ހިނގަމުންދާ ހަނގުރާމަ ނިމުމަކަށް ގެނައުމަށް އީރާނުގެ ތާއީދުކުރާ ކަމުގެ ސިގްނަލެކެވެ.
އީރާނުގެ ރޫހީ ލީޑަރަށް ލަފާއަރުއްވާ ވެރިޔާ، އަލީ ލާރިޖާނީ ބެއިރޫތަށް ކުރެއްވި ދަތުރުފުޅުގައި އެގޮތަށް ވިދާޅުވީ އިސްރާއީލުން ލުބުނާނުގެ ހަތިޔާރުއެޅި ޖަމާއަތް ހިޒްބުاللهގެ ކޮންޓްރޯލްގެ ދަށުގައިވާ ސަރަހައްދުތަކަށް ވަރުގަދަ ބޮމުގެ ހަމަލާތަކެއް ދީފައިވާ ދަނޑިވަޅެއްގައެވެ. އަދި ހަނގުރާމަ ހުއްޓުވުމާ ގުޅޭ އެއްބަސްވުމުގެ ދެލިކޮޕީއެއް އެމެރިކާއިން ލުބުނާނުގެ ގާނޫނުހަދާ މަޖިލީހުގެ ރައީސް ނަބީހް ބައްރީއާ ހިއްސާކޮށްފައިވަނިކޮށެވެ.
ލުބުނާނުގެ އިސް ދެ ސިޔާސީ މަސްދަރަކުން ރޮއިޓާސްއަށް މައުލޫމާތު ދެމުން ބުނީ ލުބުނާނުގެ ގާނޫނު ހަދާ މަޖިލީހުގެ ރައީސް ނަބީހް ބައްރީއަށް ބުރާސްފަތި ދުވަހު އެ ދެލިކޮޕީ ހިއްސާކޮށްފައިވާ ކަމަށެވެ.
ބައްރީއަކީ ހިޒްބުاللهއާ ގާތް ގުޅުންތަކެއް ބާއްވަމުން ގެންދަވާ، އެ ޖަމާއަތަށް ތާއީދު ކުރައްވާ ބޭފުޅެކެވެ.
ލުބްނާންގެ މަސްދަރުތަކުން ބުނީ، ހަމަލާ ބަދަލު ކުރުން ހުއްޓައިލުމަށް އެމެރިކާއިން ހުށަހަޅާފައިވާ ހުށަހެޅުމާ މެދު ލުބްނާންގެ ސަރުކާރުން ދެކޭ ގޮތް ބެލުމަށް އެމެރިކާއިން އެދިފައިވާ ކަމުގައެވެ.
އެ ދެލިކޮޕީއަކީ އިސްރާއީލާއި ލުބުނާނާ ދެމެދު ހިނގަމުންދާ ހަނގުރާމަ ހުއްޓުވުމަށް ލިޔުމުން އެމެރިކާއިން ހުށަހެޅި ފުރަތަމަ ދެލިކޮޕީ ކަމަށް މަސްދަރުތަކާ ހަވާލާދީ ރޮއިޓާސްއިން ރިޕޯޓުކުރެއެވެ. ނަމަވެސް އެ ދެލިކޮޕީގައި ހިމެނޭ ކަންކަމާ ބެހޭ ތަފްސީލެއް މަސްދަރުތަކުން ހާމައެއް ނުކުރެއެވެ.
ހިޒްބުاللهއާއި އިސްރާއީލާ ދެމެދު ހަމަލާ ބަދަލު ކުރަން ފަށާފައި ވަނީ، މީގެ 13 މަސް ކުރިން ޣައްޒާގެ މުސްލިމުންނާ ދެކޮޅަށް އިސްރާއީލުން ފެށި ހަނގުރާމައާ ގުޅިގެންނެވެ. ހިޒްބުالله އިން އިސްރާއީލުގެ ރަށްތަކާއި އަސްކަރިއްޔާއަށް ހަމަލާ ދޭން ފަށާފައި ވަނީ ފަލަސްތީނުގެ މިނިވަންކަމަށް ޖިހާދު ކުރަމުންދާ މުޖާހިދުންނާއި، ފަލަސްތީނުގެ މުސްލިމުންނަށް ވާގިވެރިވުމުގެ ގޮތުންނެވެ.
ނަމަވެސް، އެ ކަމުގެ ބަދަލު ހިފުމުގެ ގޮތުން ލުބްނާންގެ އާންމު ރައްޔިތުންނަށް އަމާޒުކޮށް ސެޕްޓެމްބަރު 23 ވަނަ ދުވަހު އިސްރާއީލުން ވަނީ ހަމަލާތައް ދޭން ފަށާފައެވެ. އިސްރާއީލުން މިހާރު އެންމެ ވަރުގަދަޔަށް ހަމަލާތައް ދެމުން އަންނަނީ ވެރިރަށް ބެއިރޫތާއި، ދެކުނުގެ ރަށްތަކަށެވެ.
ލުބްނާނުގެ މުސްލިމުންނާ ދެކޮޅަށް އިސްރާއީލުން ހިންގަމުންދާ އުދުވާނުގައި ޝަހީދު ކޮށްލާފައިވާ މީހުންގެ އަދަދު ވަނީ 3,386އަށް އަރައިފައެވެ. އޭގެ ތެރޭގައި ގިނަ އަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ސިއްހަތާބެހޭ ވުޒާރާއިން ހާމަކޮށްފައިވެއެވެ. ހަމަލާތަކުގައި ޒަޚަމު ކޮށްލާފައިވާ މީހުންގެ އަދަދު 14,417އަށް އަރައެވެ. އަދި ހަމަލާތަކުގެ ސަބަބުން ގެދޮރު ނެތިކޮށްލާފައިވާ މީހުންގެ އަދަދު 1.2 މިލިޔަނަށް ވަނީ އަރައިފައެވެ.