އިހުސާންކަމަކީ މުކައްލަފެއްގެ އެންމެހައި އަމަލުތަކުގައި ހުރުން ލާޒިމު ސިފައެއް ކަމަށް ބުނެ، މިއަދުގެ ހުކުރު ޚުތުބާގައި އިހުސާންތެރިވުމަށް ގޮވާލައި ނަސޭހަތްތެރިވެއްޖެއެވެ.
މިއަދުގެ ޚުތުބާ ޚާއްސަކޮށްފައި ވަނީ އިހުސާންކަމަށެވެ.
އިހުސާންކަމަކީ އިޚްލާސްތެރިކަމާއި، ތެދުވެރިކަމާއި، ހެޔޮކޮށް ހިތުމެވެ. އެއީ އިސްލާމްކަމާއި އީމާންކަމަށް ފަހު، މުއުމިނެއްގެ ހަޔާތުގައި ނުހަނު މަތިވެރި ދަރަޖައެއް ލިބިގެންވާ ކަމެކެވެ. އިހުސާންކަމުގެ އަނެއް މާނައަކީ ކަމޭހިތުމާއި، އޯގާވެރިވުމާއި، ހެޔޮކޮށް ހިތުމެވެ.
އެގޮތުން އިހުސާންކަމަކީ، މުކައްލަފެއްގެ އެންމެހައި އަމަލުތަކުގައި ހުރުން ލާޒިމު ސިފައެއްކަން ފާހަގަކުރައްވާ މިއަދުގެ ޚުތުބާގައި ގޮވައިލީ އިހުސާންތެރިވުމަށެވެ.
މުކައްލަފަކީ އިވުން ނުވަތަ ފެނުން މި ދެ ހިއްސުން ކުރެ ހިއްސެއް ސަލާމަތުން ހުރުމާއެކު، ރަސޫލު ބޭކަލަކު ދީނަށް ގޮވާލެއްވި ގޮވާލެއްވުން އެ މީހަކާ ހަމައަށް ވާސިލުވެފައިވާ، ބުއްދިހުރި ބާލިޣުވެފައިވާ މީހާއެވެ.
އިހުސާންތެރިވާންޖެހޭނީ އެމީހެއްގެ އިސްލާމްކަމާއި، އީމާންކަމާއި، އަޅުކަމުގައެވެ. އަދި އޭނާ އެހެންމީހުންނާ ކުރާ މުއާމަލާތުގައްޔާއި، އަމިއްލަ ނަފުސަށް ކުރާ މުއާމަލާތުގައި ވެސްމެއެވެ. އަދި އޭނާގެ މާލީ މުއާމަލާތާއި، އަބުރު ހިފެހެއްޓުމާއި، އިލްމު އުނގެނުމާއި، އެންމެހައި އަމަލުތަކުގައި ވެސް އިހުސާންތެރިވާންޖެހޭނެއެވެ.
ޚުތުބާގައި ބުނީ އަޅުކަމުގައި އިހުސާންތެރިކަމަކީ މާތް ﷲގެ އެއްކައުވަންތަކަން ގަބޫލުކޮށް، އެކަލާނގެއާ އެހެން ފަރާތެއް ބައިވެރިނުކުރުން ކަމަށެވެ. އަދި ހުރިހާ ކަމެއް މިންވަރުކުރައްވަނީ މާތްﷲކަން ގަބޫލުކޮށް، މިންވަރަށް އީމާންވުމަކީ ވެސް އިހުސާންކަމުގެ ތެރެއިންވާ ކަމެއް ކަމަށް ޚުތުބާގައި ބުންޏެވެ. ހަމައެއާއެކު އިހުސާންކަމަކީ ޝަހާދަތުގެ ދެކަލިމަ ތެދުކޮށް، އެއާ އެއްގޮތަށް އަމަލުކުރުމާއި، މާތްﷲ އަށް އީމާންވުމާއެކު ކީރިތި ރަސޫލާއަށް ފުރިހަމައަށް ތަބާވުމެވެ.
"އިހުސާންކަމުގެ މަތިވެރި ސިފަ ލިބިގެންވާ މުއުމިނާ، އޭނާގެ އަޅުކަމުގައި މާތްﷲ އަށް އިޚްލާސްތެރިވާނެ. ނަމާދުގައި ދެއްކުންތެރިކަމެއް ނުހުންނާނެ. ގިޔާމާއި، ރުކޫއާއި، ސުޖޫދުގައި މަޑުމައިތިރިވާނެ. ޒަކާތް ނެރޭނީ، ﷲގެ ރުހިވޮޑިގަތުން އަދައިގެން. އޭނާﷲ ދެއްވި ނިއުމަތަށް ޝުކުރުވެރިވާ ހާލު، ފަރްޟު ޒަކާތުގެ އިތުރުން، ގިނަގިނައިން ސަދަގާތްކޮށް އުޅޭނެ،" ޚުތުބާގައި ބުންޏެވެ.
"...އިހުސާންތެރިޔާ ރޯދަ ހިފާނީ، ކެއިންބުއިން ދޫކޮށްލުމުން އެކަންޏެއް ނޫން. އޭގެ އިތުރުން އޭނާ ރޯދައަށް ހުންނައިރު އޭނާގެ ދުލާއި، ލޮލާއި، ހިތާއި، އެންމެހާ ގުނަވަންތައް އުރެދުންތަކުން އެއްކިބާކުރާނެ. ބެލުންތައް ތިރިކޮށް، ބަސްމަގު ރިވެތިކުރާނެ. އަނިޔާވެރި އަމަލުތަކުން އޭނާގެ އަތްފައި ރައްކާތެރިކުރާނެ. ފާފަވެރިވާފަދަ ކުށްހީތަކުން އޭނާގެ ހިތް ރައްކާތެރިކުރާނެ،"
ޚުތުބާގައި ބުނީ އަޅުތަކުންގެ މައްޗަށް އިހުސާންތެރިވާންޖެހޭނެ ކަމަށާއި އޭގެތެރެއިން އެންމެ އައުލާކަން ބޮޑު ބަޔަކީ، މައިންބަފައިން ކަމަށެވެ.
އިހުސާންކަމުގައި، ގާތްތިމާގެ މީހުންނާ އޮންނަ ރަހިމުގެ ގުޅުން ދެމެހައްޓަންޖެހެއެވެ. އެއީ، އުމުރާއި ރިޒްގުގައި ބަރަކާތް ލައްވައި، މަރުމަތި އަމާންވާނޭ ކަމެއްކަމަށް ޚުތުބާގައި ބުންނެވެ. ހަމައެފަދައިން ރަޙިމުގެ ގުޅުން ދެމެހެއްޓުމަކީ، ސުވަރުގެ ވަނުމަށް މަގުފަހިވާ ކަމެއް ކަމަށް ވެސް ޚުތުބާގައި ބުންޏެވެ.
ހަމައެއާއެކު ޚުތުބާގައި ބުނީ ގާތްތިމާގެ މީހުން ފިޔަވައި ޔަތީމުންނާއި، މިސްކީނުންނާއި، ހަނގުރާމައިގެ އަސީރުން ފަދަ ނިކަމެތީންނަށް އެހީތެރިކަން ފޯރުކޮށްދީ، ކާންދީ އުޅުމަކީ ވެސް އިހުސާންތެރިކަމުގެ ތެރޭގައި ހިމެނޭ މުހިންމު ބައެއް ކަމަށެވެ.