އިންޑިއާގެ ބެންގަލޫރު އުތުރުގެ އާރްޓީ ނަގަރުގެ ހޮޓަލެއްގެ ކޮޓަރިއެއްގެ ތެރޭގައި ދިވެއްސަކު މަރުވެފައި އޮއްވާ ފެނިއްޖެއެވެ.
އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި މަރުވެފައި އޮއްވައި ފެނިފައި ވަނީ އުމުރުން 43 އަހަރުގެ ހަސަން ސުހެއިލްއެވެ.
ފުލުހުންނާ ހަވާލާދީ އިންޑިއާގެ ނޫހެއް ކަމަށްވާ ޑީއެޗްއިން ރިޕޯޓުކުރި ގޮތުގައި ސުހެއިލް މަރުވެފައި ވަނީ ކާޑިއެކް އެރެސްޓެއް ޖެހިގެންނެވެ.
ސުހެއިލް ވަނީ މިމަހުގެ 10 ވީ އާދިއްތަ ދުވަހު ފަތުރުވެރިއެއްގެ ގޮތުގައި އިންޑިއާއަށް ގޮސް، އާރްޓީ ނަގަރުގެ ހޮޓަލަކަށް ޗެކް-އިން ވެފައެވެ. އޭނާ މަރުވެފައި އޮއްވާ ފެނިފައި ވަނީ ބުދަ ދުވަހުއެވެ.
އިންޑިއާ ފުލުހުންގެ ތަހުގީގަށް އެނގިފައިވާ ގޮތުގައި އަންގާރަ ދުވަހުގެ ފަހުން އޭނާ ހޮޓަލުގެ ކޮޓަރިން ނުނިކުމެއެވެ. ބުދަ ދުވަހު އޭނާ ދޮރު ނުހުޅުވުމުން ހޮޓެލްގެ މުވައްޒަފުން ވަނީ ފުލުހުންގެ ހެލްޕްލައިންއަށް ގުޅާފައި ކަމަށާއި އެއަށްފަހު ފުލުހުންގެ ޓީމެއް ހޮޓަލަށް ގޮސް ސްޕެއާ ތަޅުދަނޑިއެއް ބޭނުންކޮށްގެން ކޮޓަރި ހުޅުވާފައިވާ ކަމަށް އެ ނޫހުން ރިޕޯޓުކޮށްފައިވެއެވެ.
އިންޑިއާގެ ފުލުހުން ބުނި ގޮތުގައި ކޮޓަރިއަށް ވަން ވަގުތު ފެނުނީ ސުހެއިލް ހޭނެތިފައި އޮއްވައި ކަމަށެވެ. އޭނާއަށް އޮތީ ހޮޑުވެސް ލެވިފައި ކަމަށް ފުލުހުން ބުންޏެވެ.
ފުލުހުން ވަނީ އޭނާގެ ހަށިގަނޑު ރަމައްޔާ ހޮސްޕިޓަލްގެ މޯޗަރީއަށް ފޮނުވައިފައެވެ. އަދި ޕޯސްޓްމޯޓަމް ހަދާނީ އޭނާގެ އާއިލާ އައިސް ރުހުން ދިނުމުން ކަމަށް ފުލުހުންނާ ހަވާލާދީ ޑީއެޗްއިން ރިޕޯޓުކޮށްފައިވެއެވެ.
އާރްޓީ ނަގަރު ފުލުހުން ވަނީ އެކަން މޯލްޑިވްސް ހައިކޮމިޝަނާއި އިމިގްރޭޝަން އޮފީހަށް އަންގާފައެވެ.
ސުހެއިލް އެނބުރި ރާއްޖެ އައުމަށް ޓިކެޓް ނަގާފައި އޮތީ މިއަދަށެވެ. އޭގެ ކުރިން މަދްޔާ ޕްރަދޭޝްއާއި މުމްބާއީއަށް ދިއުމަށް ސުހެއިލް ވަނީ ރާވާފައެވެ.