ދައުލަތުގެ ބޭރު ފައިސާގެ ރިޒާވް ރަނގަޅު ކުރުމަށް ޓަކައި ރިޒާވް ބޭންކް އޮފް އިންޑިއާ (އާރްބީއައި)އާއެކު ހެދި 400 މިލިއަން ޑޮލަރުގެ ކަރަންސީ ސްވޮޕް އެއްބަސްވުމުގެ ދަށުން މަރުކަޒީ ބޭންކު، އެމްއެމްއޭއިން އެ ފައިސާ ނަގައިފިއެވެ.
އެމްއެމްއޭއިން ބުނީ މިފަދަ ފައިސާ ބޭރުގެ ބޭންކުތަކުގައި އިންވެސްޓް ކުރި ނަމަވެސް، މިދިޔަ އޮކްޓޫބަރުގައި އެ އިދާރާއިން 120 މިލިއަން ޑޮލަރު ރާއްޖޭގެ ބޭންކުތަކުގައި އިންވެސްޓް ކޮށްފައިވާ ކަމަށެވެ. މި ނިންމުމުގެ މަގުސަދަކީ މި އިންވެސްޓްމަންޓުން ލިބޭ ނަފާ ވީހާ ވެސް ބޮޑުކުރުމާއި މާލީ ދާއިރާގެ ކުރިއެރުމާއި ހަމަޖެހުމަށް މަގުފަހިކޮށް މުޅި އިގްތިސާދަށް ފައިދާވާނެ ގޮތަށް މިކަންކުރުން ކަމަށް އެމްއެމްއޭއިން ބުނެއެވެ.
މި ބަދަލުތަކާ އެކު، ސެޕްޓެމްބަރު މަސް ނިމުނުއިރު އޮފިޝަލް ރިޒާވް އެސެޓްސް 371.2 މިލިއަން ޔޫއެސް ޑޮލަރުގައި ހުރި ނަމަވެސް، އޮކްޓޯބަރު ނިމުނުއިރު އޮފިޝަލް ރިޒާވް އެސެޓްސް ވަނީ 614.6 މިލިއަން ޔޫއެސް ޑޮލަރަށް އިތުރުވެފައެވެ.
މީގެ އިތުރުން މި މުއްދަތުގައި އަދަ ފޮރިން ކަރަންސީ އެސެޓްސްގެ ގޮތުގައި ހުރީ 122.5 މިލިއަން ޔޫއެސް ޑޮލަރު ކަމަށާއި، މި ދެ ބަޔަކީ ވެސް އެމްއެމްއޭގެ ފޮރިން ކަރަންސީ އެސެޓްގެ ތެރޭގައި ހިމެނޭ ދެބައި ކަމަށް އެ އިދާރާއިން ބުނެފައިވެއެވެ.
އެމްއެމްއޭއިން އާރްބީއައިއާ އެކު 400 މިލިއަން އެމެރިކާ ޑޮލަރު އަދި 30 ބިލިއަން އިންޑިއަން ރުޕީސްގެ ކަރަންސީ ސްވޮޕް ފެސިލިޓީ އެއްބަސްވުމެއްގައި ސޮއިކުރީ މިދިޔަ އޮކްޓޫބަރު މަހުގެ ކުރީކޮޅު، ރައީސް ޑރ. މުހައްމަދު މުއިއްޒު އިންޑިއާއަށް ކުރެއްވި ރަސްމީ ދަތުރުފުޅުގެ ތެރެއިންނެވެ.
ޑޮލަރު ނުވަތަ ޔޫރޯ ސްވޮޕް ފެސިލިޓީއަކީ ކުރު މުއްދަތުގެ ފޮރިން އެކްސްޗޭންޖް ބޭނުންތަކަށް އެހީތެރިވާނެ ފިޔަވަޅެއް ކަމަށް ސަރުކާރުން އޭރު ވެސް ބުންޏެވެ.
އެގޮތުން އިންޑިއަން ރުޕީސް ސްވޮޕް ފެސިލިޓީ މެދުވެރިކޮށް އިންޑިއާއާއި ދިވެހިރާއްޖެއާ ދެމެދު ކުރެވޭ ވިޔަފާރީގެ މުއާމަލާތްތައް އެ ގައުމަކަށް ނިސްބަތްވާ ފައިސާއިން ކުރުމަށް މަގުފަހިވާނެ ކަމަށާއި މިއީ ދެ ގައުމު ދޭތެރޭ ކުރެވޭ ވިޔަފާރި އިތުރުވެ ހަރުދަނާ ވާނެ ކަމެއް ކަމަށް ސަރުކާރުން ބުނެފައިވެއެވެ.