ފިލްމު "މަހާރާޖް"އިން މި އަހަރުގެ ޖޫން މަހު ބޮލީވުޑަށް ތައާރަފްވި ޒުވާން އެކްޓަރު ޖުނެއިދު ޚާންގެ އިތުރު ދެ ފިލްމެއް އަންނަ އަހަރު ބެލުންތެރިންނަށް ގެނެސްދޭނެ ކަމަށް ރިޕޯޓުތައް ބުނެފިއެވެ.
ގިނަ ބަޔަކު ފާހަގަކުރާ ލޯބިވެރިންގެ ދުވަހާ ދިމާކޮށް އަންނަ އަހަރުގެ ފެބްރުއަރީ މަހު ރިލީޒް ކުރުމަށް ތައްޔާރުވަމުން އަންނަ ދެ ފިލްމުގެ ތެރެއިން އެއް ފިލްމަކީ ޖުނައިދުގެ ބައްޕަ އެކްޓަރު އާމިރު ޚާން ޕްރޮޑިއުސްކުރާ ފިލްމެއް ކަމަށް ރިޕޯޓުތައް ބުނެއެވެ.
މި ފިލްމުން ޖުނައިދުއާ އެކު ބަތަލާގެ ރޯލްއިން ފެންނާނީ ސައުތު ސިނަމާގެ ބަތަލާ ސައި ޕައްލަވީ ކަމަށް ވެސް ފިލްމީ ޚަބަރުތައް ބުނެއެވެ. އަންނަ އަހަރު ޖުނައިދު ފެންނާނެ ދެވަނަ ފިލްމަކީ ދާދިފަހުން ފިލްމު އިންޑަސްޓްރީއާ ގުޅުނު ޒުވާނާ ޚުޝީ ކަޕޫރާ އެކު ކުޅޭ ރޮމޭންޓިކް ކޮމެޑީ ޑްރާމާއެކެވެ.
ފިލްމީ ތަރި ޚުޝީ ކަޕޫރު އަދި ޖުނައިދު ޚާން--ފޮޓޯ/ޓައިމްސްނައު
ޚުޝީ ކަޕޫރާ އެކު ޖުނައިދު ކުޅޭ ލޯބީގެ ފިލްމުގެ ޕްރޮޑިއުސަރަކީ ޚުޝީގެ ބައްޕަ ޕްރޮޑިއުސަރު ބޮނީ ކަޕޫރެވެ. މި ފިލްމަކީ، 2022 ވަނަ އަހަރު ރިލީޒްކުރި ތަމަޅަ ފިލްމު "ލަވް ޓުޑޭ"ގެ ރިމޭކްއެކެވެ.
އާމިރު ޚާންގެ ޕްރޮޑިއުސްކޮށް ކުރީގެ އަންހެނުން ކިރަން ރާއޯ ޑައިރެކްޓްކުރި ފިލްމު "ލާޕަތާ ލޭޑީސް"ގެ ޕްރޮމޯޝަންތައް އެމެރިކާގައި މި ދުވަސްވަރު ކުރިއަށްގެންދާތީ މި ފިލްމާ ގުޅޭގޮތުން އާމިރު ރަސްމީކޮށް ވާހަކަދައްކާފައެއް ނުވެއެވެ.
ފިލްމު "މަހާރާޖް"ގައި ޖުނައިދު ކުޅެފައިވާ ރޯލަށް ބެލުންތެރިންގެ ފަރާތުން ތައުރީފުކޮށްފައިވާއިރު ފިލްމު ކްރިޓިކުން ވެސް ވަނީ ޖުނައިދުގެ އެކްޓިންގް ހުނަރަށް ތައުރީފުކޮށްފައެވެ.