ގިނަ ޚިދުމަތްތައް އެއް ސެންޓަރަކުން ލިބޭގޮތަށް، ރާއްޖޭގެ ނޭޝަނަލް އިމަޖެންސީ ކޯލް ސެންޓަރު 911 މިރޭ އިފުތިތާހު ކޮށްފިއެވެ.
މިކަމަށްޓަކައި ބޭއްވި ޖަލްސާގައި ވާހަަކަ ދައްކަވަމުން ހޯމްލޭންޑް މިނިސްޓަރު އަލީ އިހުސާން ވިދާޅުވީ ނޭޝަނަލް އިމަޖެންސީ ކޯލް ސެންޓަރުގެ ނަންބަރު 911ގެ ގޮތުގައި ރައީސް ޑރ. މުހައްމަދު މުއިއްޒު ކަނޑައެޅުއްވީ އެއީ އެންމެން ވެސް ދަންނަ ނަންބަރަކަށް ވާތީ ކަމަށެވެ.
ދުނިޔޭގެ ވަރަށް ގިނަ ގައުމުތަކެއްގައި އިމަޖެންސީ ސާވިސް ނަންބަރެއްގެ ގޮތުގައި 911 ބޭނުން ކުރެއެވެ. އެ ގޮތުން އެ ނަންބަރު ކަނޑައެޅުއްވީ، އެއީ ފިލްމުތަކުންނާއި ކާޓޫނުތަކުން ވެސް އެ ނަންބަރު ފެނި، އެއީ މީހުން ދަންނަ ނަންބަރެއް ކަމަށް ފާހަގަ ކުރެވުމުން ކަމަށް އިހުސާން ވިދާޅުވިއެވެ.
އެހެން ނަމަވެސް އިމަޖެންސީ ސާވިސް ސެންޓަރެއްގެ މަސައްކަތް ރަސްމީކޮށް އިފުތިތާހުކުރިއިރު، އެ ޚިދުމަތް ފެށިގެން އަންނަނީ ސަރުކާރުން އެންމެ ބޭނުންވާ މިންވަރުގައި ނޫންކަމަށަށް އިިހުސާން ވިދާޅުވިއެވެ. އެހެންކަމުން މި ޚިދުމަތް އިތުރަށް ފުޅާކޮށް، މިއަށްވުރެ ފުރިހަމައަށް މި ޚިދުމަތް ދެވޭނެ ގޮތްތަކެއް ހޯއްދަވާނެ ކަމަށް މިނިސްޓަރު ވިދާޅުވިއެވެ.
ގިނަ ޚިދުމަތްތަކާއެކު އިމަޖެންސީ ކޯލް ސެންޓަރު 911 އިފުތިތާހުކުރުން -- ފޮޓޯ/ ހޯމް މިނިސްޓްރީ
އެ ގޮތުން ކޮމިއުނިކޭޝަންސް ސިސްޓަމްތައް އިތުރަށް ތަރައްގީކޮށް، ޖީއައިއެސް މެޕް ކުރެވޭނެ ނިޒާމަކަށް ބަދަލުވެ، ޑިސްޕެޗް ސޮފްޓްވެއާ ވެސް ރާއްޖޭގެ ހުރިހާ ދިމާލަކަށް ވިއުގަ ކުރެވޭނެ ކަމަށް ވިދާޅުވިއެވެ. އަދި ރެސްޕޮންސް ޓައިމް އަވަސް ކުރެވޭނެ ގޮތްތައް ވެސް ހަމަޖެއްސުމަށް ޓަކައި މަަސައްކަތް ކުރާނެ ކަމަށް އިހުސާން ވިދާޅުވިއެވެ.
މި ޚިދުމަތް އިތުރަށް ފުޅާކުރުމަށް ޓަކައި، ކޯލް ސެންޓަރުގައި މަސައްކަތްކުރާ މުވައްޒަފުންނަށް ރާއްޖެއިންނާ ރާއްޖޭން ބޭރުން ވެސް ތަމްރީނުތައް ދޭނެ ކަމަށް ވިދާޅުވިއެވެ.
"އަޅުގަނޑުމެން ރައްޔިތުންނަށް އަރުވާ ޔަގީންކަމަކީ، މި ޚިދުމަތުގެ ފެންވަރު ދާނީ ދުވަހެއް ދުވަހަކަށް ރަނގަޅުވަމުންކަން. މީގެ އިތުރުން ރާއްޖޭގެ އެކި ހިސާބުތަކުގައި ހުރި އެކި ޑިސްޕެޗު ސެންޓަރުތަކުން މި ޚިދުމަތް ލިބެމުން އަންނައިރު، މި ޚިދުމަތުގެ ފުރިހަމަކަން އަޅުގަނޑުމެން ޔަގީންކުރާނަން" އިހުސާން ވިދާޅުވިއެވެ.
އެކި ސަރަހައްދުތަކުގައި މިހާރު ހުރި އިމަޖެންސީ ފެސިލިޓީތަކުގެ ޚިދުމަތް އިތުރަށް ހަރުދަނާ ކުރުމުގެ މަސައްކަތް ކުރަމުން ގެންދަވާނެ ކަމުގެ ޔަގީންކަން ވެސް މިނިސްޓަރު ދެއްވިއެވެ.
އިމަޖެންސީ ޚިދުމަތްތައް އެއް ނަންބަރެއްގެ ދަށުން ލިބޭނެ ގޮތް ހަމަޖެއްސެވުމަކީ ރައީސް މުއިއްޒުގެ ރިޔާސީ ވައުދެކެވެ. މިރޭ އިފުތިތާހު ކުރި އިމަޖެންސީ ކޯލް ސެންޓަރުގެ ދަށުން، ފުލުހުން، އެމްއެންޑީއެފް، އެމްބިއުލާންސް، ކޯސްޓްގާޑު އަދި ފަޔާ އެންޑް ރެސްކިޔު ސާވިސްގެ ޚިދުމަތްތައް ލިބިގެންދާނެއެވެ.